(vovworld) - ຕອນເຊົ້າວັນທີ 6/11 ຢູ່ຮ່າໂນ້ຍ, ກະຊວງແຮງງານທະຫານເສຍອົງຄະ ແລະ ສັງຄົມ, ຄະນະກຳມະການແຫ່ງຊາດເພື່ອຄວາມກ້າວໜ້າຂອງແມ່ຍິງຫວຽດນາມ ສົມທົບກັບສະຖານທູດອົດສະຕາລີປະຈຳຫວຽດນາມ ຈັດຕັ້ງການໂອ້ລົມສົນທະນາ, ແບ່ງປັນບົດຮຽນ ເພື່ອຊຸກຍູ້ການເຂົ້າຮ່ວມຂອງແມ່ຍິງໃນສະພາແຫ່ງຊາດ, ສະພາປະຊາຊົນຂັ້ນຕ່າງໆ. ກ່າວຄຳເຫັນທີ່ການໂອ້ລົມ, ທ່ານລັດຖະມົນຕີຊ່ວຍວ່າການກະຊວງແຮງງານ ທະຫານເສຍອົງຄະ ແລະ ສັງຄົມ ໃຫ້ຮູ້ວ່າ: ໃນຫຼາຍທົດສະຫວັດຜ່ານມາ, ຫວຽດນາມແມ່ນປະເທດທີ່ມີພື້ນຖານດີ ໃນການຮັບປະກັນສິດໃຫ້ແກ່ແມ່ຍິງເຂົ້າຮ່ວມຂົງເຂດການເມືອງ. ອັດຕາສ່ວນສະມາຊິກສະພາແຫ່ງຊາດຍິງ ຊຸດທີ 13 ບັນລຸກວ່າ 24%. ທ່ານລັດຖະມົນຕີຊ່ວຍ ຫງວຽນຈ້ອງດ່າມ ຢັ້ງຢືນວ່າ:
“ວິວັດການສູ້ຊົນບັນລຸໄດ້ບັນດາເປົ້າໝາຍຄວາມສະເໝີພາບລະຫວ່າງຍິງ-ຊາຍຢ່າງແທ້ຈິງ ແມ່ນໄລຍະຍາວ ແລະ ຮຽກຮ້ອງໃຫ້ພວກເຮົາ ຕ້ອງມານະພະຍາຍາມໃນການປະກາດໃຊ້ ແລະ ປະຕິບັດນະໂຍບາຍກໍ່ຄື ຊອກຫາບັນດາກົນໄກທີ່ເໝາະສົມ ເພື່ອໃຫ້ແມ່ຍິງ ແລະ ເດັກຍິງໄດ້ເຂົ້າຮ່ວມ, ໄດ້ຊົມໃຊ້ບັນດາໝາກຜົນຂອງການພັດທະນາເສດຖະກິດ-ສັງຄົມທີ່ນຳມາໃຫ້ດ້ວຍຄວາມຍຸດຕິທຳ. ໃນນັ້ນ, ມີເລື່ອງເພດຍິງເຂົ້າຮ່ວມໃນບັນດາຕຳແໜ່ງສຳຄັນ ເພື່ອເສີມຂະຫຍາຍພາລະບົດບາດຂອງຕົນເອງໃນສັງຄົມ”.