(ພາບ:TTXVN)

   ໃນລະຫວ່າງວັນທີ 11-12 ພະຈິກ, ເວທີປາໄສສັນຕິພາບ ປາຣີ ຄັ້ງທີ 5 ດ້ວຍຫົວຂໍ້: “ຜ່ານຜ່າບັນດາວິກິດການ” ໄດ້ຈັດຂຶ້ນຢູ່ນະຄອນຫຼວງ ປາຣີ ໂດຍມີການເຂົ້າຮ່ວມຂອງປະທານາທິບໍດີ ຝະລັ່ງ Emmanuel Macron, ເຈົ້າຍິງ Rania ຂອງຈໍແດນ, ປະທານນາທິບໍດີ ອັກຊັງຕິນ Alberto Fernandez ແລະ ປະທານນາທິບໍດີ Colombia Gustavo Petro. ເວທີປາໄສສັນຕິພາບ ປາຣີ ຄັ້ງທີ 5 ຍັງໄດ້ເຕົ້າໂຮມຜູ້ຕາງໜ້າ 4000 ທ່ານມາຈາກບັນດາປະເທດ, ອົງການຈັດຕັ້ງສາກົນ, ບໍລິສັດ, ທະນາຄານພັດທະນາ, ກອງທຶນການເງິນ, ອົງການບໍ່ຂຶ້ນກັບລັດຖະບານ ແລະ ອົງການຈັດຕັ້ງສັງຄົມພົນລະເຮືອນມາຈາກທຸກພາກເພື້ນໃນທົ່ວໂລກ.

ເວທີປາໄສສັນຕິພາບ ປາຣີ ຄັ້ງທີ 5 ປີ 2022 ໄດ້ສຸມໃສ່ປຶກສາຫາລືບັນດາບັນຫາຄື: ການຈຳກັດບັນດາຜົນຮ້າຍໂດຍກົງ ຈາກການປະທະກັນຄັ້ງຕ່າງໆ ສຳລັບຊາວລົບໄພ, ການຄ້ຳປະກັນທັນຍາຫານ ແລະ ພະລັງງານ ກໍ່ຄືການເພີ່ມຂຶ້ນເງິນໜີ້ສິນ; ຫລຸດຜ່ອນສະພາບແຕກແຫງບັນດາການພົວພັນໃນໂລກໃນລະດັບຕ່ຳສຸດ ໂດຍເລີ່ມຈາກລັດທິອາລັກຂາວັກຊິນ ຫຼືການຂັດແຍ້ງກ່ຽວກັບຄວາມຮັບຜິດຊອບດ້ານການປ່ຽນແປງຂອງດິນຟ້າອາກາດ; ຊຸກຍູ້ການປະຕິຮູບບັນດາລະບອບລະບຽບການຫຼາຍຝ່າຍ ແລະ ບາງບັນຫາອື່ນໆອີກ.