ເຫດແຜ່ນດິນໄຫວເກີດຂຶ້ນໃນວັນທີ 06 ກຸມພາ ໄດ້ເຮັດໃຫ້ຊາວ ຕວກກີ ແລະ ຊີຣີ ກວ່າ 24.000 ຄົນເສຍຊີວິດ (ພາບປະກອບ: AFP/TTXVN)

        ວັນທີ 10 ກຸມພາ, ສຳນັກຂ່າວສານທາງການ SANA ຂອງ ຊີຣີ ໃຫ້ຂ່າວວ່າ: ລັດຖະບານປະເທດນີ້ໄດ້ອະນຸມັດຂໍ້ຕົກລົງສະໜອງເຄື່ອງອຸປະຖຳມະນຸດສະທຳໄປຍັງທຸກເຂດໃນທົ່ວປະເທດ, ລວມທັງເຂດທີ່ຢູ່ນອກການຄວບຄຸມຂອງລັດຖະບານ. ເຄື່ອງອຸປະຖຳຈະໄດ້ແຈກຢາຍດ້ວຍການໜູນຊ່ວຍຂອງສະຫະປະຊາຊາດ, ອົງການກາຊີກວົງເດືອນແດງ ຊີຣີ ແລະ ສະພາກາແດງສາກົນ ເພື່ອຮັບປະກັນໃຫ້ໄປເຖິງຜູ້ທີ່ມີຄວາມຕ້ອງການ. ໃນຂະນະນັ້ນ, ວັນທີ 09 ກຸມພາ, ຂ້າຫຼວງໃຫຍ່ສະຫະປະຊາຊາດກ່ຽວກັບສິດທິມະນຸດ, ທ່ານ Volker Turk ກໍ່ຮຽກຮ້ອງຢຸດຕິການຍິງປືນໃນທັນທີຢູ່ ຊີຣີ ເພື່ອສ້າງເງື່ອນໄຂສະດວກແກ່ການກູ້ໄພກູ້ຊີບຜູ້ປະສົບເຄາະຮ້າຍຈາກເຫດແຜ່ນດິນໄຫວ.

        ກ່ອນໜ້ານັ້ນໃນວັນດຽວກັນ, ລົດຂົນສົ່ງເຄື່ອງອຸປະຖຳຂະບວນທີ 2 ຂອງສະຫະປະຊາຊາດ, ລວມມີລົດບັນທຸກ 14 ຄັນນຳເອົາເຄື່ອງຂອງໃຊ້ທີ່ຈຳເປັນໄດ້ມາຮອດທິດຕາເວັນຕົກສ່ຽງເໜືອຂອງ ຊີຣີ. ຈຳນວນເຄື່ອງດັ່ງກ່າວສາມາດຕອບສະໜອງໃຫ້ 1.100 ຄອບຄົວ.

        ຕາມການສະຖິຕິ, ໄລ່ຮອດເວລາ 20 ໂມງຂອງວັນທີ 10 ກຸມພາ (ຕາມເວລາ UTC), ເຫດແຜ່ນດິນໄຫວເກີດຂຶ້ນໃນວັນທີ 06 ກຸມພາ ໄດ້ເຮັດໃຫ້ຊາວ ຕວກກີ ແລະ ຊີຣີ ກວ່າ 24.000 ຄົນເສຍຊີວິດ, ນັບພັນໆຄົນຖືກບາດເຈັບ. ຢ່າງໜ້ອຍສຸດມີປະຊາຊົນ 870.000 ຄົນຢູ່ທັງ 2 ປະເທດພວມໄດ້ຮັບການໜູນຊ່ວຍດ້ານທັນຍາຫານ ແລະ ບັນດາເຄື່ອງຂອງໃຊ້ທີ່ຈຳເປັນ ໃນສະພາບອາກາດໜາວຈັດ.