ເອກອັກຄະລັດຖະທູດຫວຽດນາມປະຈຳແບນຊີກແລະອີຢູປະຕິເສດຖ້ອຍທຳນອງທີ່ຜິດພາດຂອງເອກອັກຄະລັດຖະທູດຈີນ
ທ່ານ ຟ້າມແຊງເຈົາ, ເອກອັກຄະລັດຖະທູດ ຫວຽດນາມ
(ພາບ: Vietnam+)
(vovworld) – ວັນທີ 17/7, ທ່ານ ຟ້າມແຊງເຈົາ, ເອກອັກຄະລັດຖະທູດ ຫວຽດນາມ ປະຈຳລາຊະອານາຈັກ ແບນຊີກ, ລຸກຊຳບວກ ແລະ ຢູ່ຄຽງຂ້າງສະຫະພາບເອີລົບ (EU) ໄດ້ມີບົດຂຽນໃນເວັບໄຊ NewEurope ດ້ວຍຫົວຂໍ້ວ່າ: “ຄວາມຈິງທີ່ປະກອບສ່ວນເຮັດໃຫ້ນ້ຳຢູ່ທະເລຕາເວັນອອກສະອາດ”, ໃນນັ້ນໄດ້ປະຕິເສດຖ້ອຍທຳນອງທີ່ຜິດພາດຂອງເອກອັກຄະລັດຖະທູດ ຈີນ ປະຈຳແບນຊິກ ແລະ ອີຢູ ຢ໋າງແຢນອີ໋ ກ່ຽວກັບບັນຫາທະເລຕາເວັນອອກ.
ທ່ານເອກອັກຄະລັດຖະທູດ ຫວຽດນາມ ຟ້າມແຊງເຈົາ ຢືນຢັນວ່າ: ຫວຽດນາມ ມີພະຍານຫຼັກຖານດ້ານນິຕິກຳ, ປະຫວັດສາດຢ່າງພຽງພໍເພື່ອພິສູດໃຫ້ເຫັນວ່າ: ລັດ ຫວຽດນາມ ໄດ້ສ້າງຕັ້ງ ແລະ ປະຕິບັດອະທິປະໄຕຢູ່ໝູ່ເກາະ ຮ່ວາງຊາ ນັບແຕ່ສະຕະວັດທີ 17. ສິ່ງດັ່ງກ່າວໄດ້ລະບຸໄວ້ຢ່າງຈະແຈ້ງໃນບັນດາເອກະສານປະຫວັດສາດທາງການຂອງ ຫວຽດນາມ ແລະ ບັນດາປະເທດໃນໂລກ. ກົງກັນຂ້າມ, ຝ່າຍ ຈີນ ພັດບໍ່ມີພະຍານຫຼັກຖານໃດໆເພື່ອສາມາດພິສູດໄດ້ວ່າຈົນໄດ້ກຳນົດ ແລະ ປະຕິບັດອະທິປະໄຕສຳລັບໝູ່ເກາະນີ້.
ທ່ານເອກອັກຄະລັດຖະທູດ ຟ້າມແຊງເຈົາ ກໍ່ເນັ້ນໜັກວ່າ: ເພື່ອພິສູດໃຫ້ໂລກເຫັນໄດ້ວ່າ: ຈີນມີເຈດຕະນາດີຢາກເຮັດໃຫ້ສະພາບການຢູ່ທະເລຕາເວັນອອກມີຄວາມສະຫງົບ ແລະ ເພື່ອພິສູດໃຫ້ເຫັນການກະທຳຂອງ ຈີນຍາມໃດກໍ່ໄປຄຽງຄູ່ກັບຄຳເວົ້າ, ຈີນຕ້ອງຢຸດຕິບັນດາການກະທຳລ່ວງລ້ຳອະທິປະໄຕ, ອຳນາດອະທິປະໄຕ ແລະ ອຳນາດສານຂອງບັນດາປະເທດບ້ານໃກ້ເຮືອນຄຽງ, ປະຕິບັດກົດໝາຍສາກົນຢ່າງຖືກຕ້ອງ, ພິເສດແມ່ນ UNCLOS 1982 ແລະ ບໍ່ໄດ້ຕັ້ງຮ້ານເຈາະນ້ຳມັນ ແລະ ນຳກຳລັງປ້ອງກັນເຂົ້າເຄື່ອນໄຫວໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ ຄືນໃໝ່ອີກ.