ງານວາງສະແດງຫົວເລື່ອງ “ ການເດີນທາງມຸ່ງໄປສູ່ຄວາມໃຝ່ຝັນ - 50 ປີແຫ່ງການປະຕິບັດຄຳພິໄນກຳຂອງປະທານໂຮ່ຈິມິນ ”

ສະເຫຼີມສະຫຼອງ 50 ປີແຫ່ງການປະຕິບັດຄຳພິໄນກຳຂອງປະທານໂຮ່ຈິມິນ (1969-2019), ໂດຍໄດ້ຮັບການຊີ້ນຳຈາກຄະນະໂຄສະນາສຶກສາສູນກາງ, ຕອນບ່າຍວັນທີ 19 ສິງຫາ, ຢູ່ຮ່າໂນ້ຍ ກະຊວງວັດທະນະທຳ, ກິລາ ແລະ ທ່ອງທ່ຽວ, ຫໍພິພິທະພັນໂຮ່ຈິມິນ ສົມທົບກັບກົມສຳເນົາເອກະສານ ຫ້ອງວ່າການສູນກາງພັກ ຈັດງານວາງສະແດງຫົວເລື່ອງ “ ການເດີນທາງມຸ່ງໄປສູ່ຄວາມໃຝ່ຝັນ - 50 ປີແຫ່ງການປະຕິບັດຄຳພິໄນກຳຂອງປະທານໂຮ່ຈິມິນ ” ຂຶ້ນ.

    ດ້ວຍເອກະສານ, ວັດຖຸພັນ, ຮູບພາບ ແລະ ຮູບເງົາເອກະສານ 250 ຢ່າງ, ງານວາງສະແດງໄດ້ແນະນຳບັນດາຜົນງານທີ່ພົ້ນເດັ່ນຂອງຫວຽດນາມ ທີ່ບັນລຸມາໄດ້ບົນເສັ້ນທາງທີ່ສະຫງ່າງາມຜ່ານ 50 ປີທີ່ຜ່ານມາ, ອັນໄດ້ຫັນຄວາມຫວັງສຸດທ້າຍຂອງປະທານໂຮ່ຈິມິນກ່ອນທີ່ລ່ວງລັບໄປ ໃຫ້ປະກົດຜົນເປັນຈິງເທື່ອລະກ້າວ. ທ່ານ ຮອງສາດສະດາຈານ, ປອ ໂດ້ວັນຈຸ ຮອງປະທານຜູ້ປະຈຳການ, ເລຂາທິການໃຫຍ່ສະມາຄົມມໍລະດົກວັດທະນະທຳຫວຽດນາມ ເວົ້າວ່າ :

    “ ທຸກໆຄົນເມື່ອເຂົ້າມາຊົມເບິ່ງທີ່ງານວາງສະແດງ ລ້ວນແຕ່ສາມາດເຫັນໄດ້ເຖິງບັນດາຜົນງານຕົ້ນຕໍຂອງປະເທດຊາດພາຍຫຼັງ 50 ປີແຫ່ງການປະຕິບັດຄຳພິໄນກຳຂອງປະທານໂຮ່ຈິມິນ. ສິ່ງທີ່ຫວັງຢ່າງຍິ່ງທີ່ສຸດຂອງທົ່ວພັກ, ທົ່ວກອງທັບ ແລະ ທົ່ວປວງຊົນຫວຽດນາມ ແມ່ນປະຕິບັດຄຳພິໄນກຳຂອງປະທານໂຮ່ຈິມິນໃຫ້ເປັນຢ່າງດີ. ຄວາມຫວັງສຸດທ້າຍຂອງປະທານໂຮ່ຈິມິນກ່ອນທີ່ລ່ວງລັບໄປນັ້ນ ແມ່ນປະເທດຊາດມີເອກະລາດ, ເສລີພາບ, ພໍ່ແມ່ປະຊາຊົນ ໃຜໆກໍໄດ້ກິນອີ່ມ, ນຸ່ງອຸ່ນ ”