ໄທ:ນາຍົກລັດຖະມົນຕີຍິ່ງລັກຊິນນະວັດກ່າວຫາສານລັດຖະທຳມະນູນສວຍໃຊ້ສິດອຳນາດ
ທ່ານນາງນາຍົກລັດຖະມົນຕີຊົ່ວຄາວ ຍິ່ງລັກ ຊິນນະວັດ
(ພາບ: AFP/TTXVN)
(vovworld) – ວັນທີ 9/4, ທ່ານນາງນາຍົກລັດຖະມົນຕີຊົ່ວຄາວ ຍິ່ງລັກ ຊິນນະວັດ ໄດ້ໃຫ້ຂໍ້ສັງເກດວ່າ: ສານລັດຖະທຳມະນູນຂອງປະເທດນີ້ບໍ່ມີພື້ນຖານເພື່ອພິຈາລະນາກໍລະນີຮ້ອງຟ້ອງຕ້ານທ່ານນາງ ທີ່ກ່ຽວຂ້ອງເຖິງຂໍ້ຕົກລົງຍົກຍ້າຍບຸກຄະລາກອນ. ໃນຖະແຫຼງການຢູ່ ແວບໄຊສັງຄົມຂອງຕົນ, ທ່ານນາງ ຍິ່ງລັກ ຖືວ່າ: ສານລັດຖະທຳມະນູນບໍ່ມີພື້ນຖານໃດເພື່ອດຳເນີນເຫດການນີ້. ການກະທຳດັ່ງກ່າວຂອງສານອາດຈະແມ່ນບາດລ້ຽວສຳລັບຂະແໜງບໍລິຫານ ໄທ ເມື່ອເປັນຄັ້ງທຳອິດທີ່ອົງການເອກະລາດ ຮັບຮູ້ພິຈາລະນາການຮ້ອງຟ້ອງທີ່ກ່ຽວຂ້ອງເຖິງຂໍ້ຕົກລົງຍົກຍ້າຍບຸກຄະລາກອນພົນລະເຮືອນ. ທ່ານນາງນາຍົກລັດຖະມົນຕີ ຍິ່ງລັກ ກໍ່ຮຽກຮ້ອງໃຫ້ບັນດາອົງການທີ່ກ່ຽວຂ້ອງ, ບັນດາອົງການເອກະລາດພິຈາລະນາຢ່າງລະອຽດການເຄື່ອນໄຫວຂອງອົງການປະຕິບັດກົດໝາຍ ໂດຍອີງໃສ່ຫຼັກການດຸ່ນດຽງ, ຫຼີກລ້ຽງບໍ່ໃຫ້ກ່າຍກອງກັນກ່ຽວກັບຄວາມຮັບຜິດຊອບ ແລະ ສິດອຳນາດລະຫວ່າງບັນດາອົງການນິຕິບັນຍັດ, ບໍລິຫານ ແລະ ຕຸລາການ.
ຖະແຫຼງການດັ່ງກ່າວໂດຍທ່ານນາງນາຍົກລັດຖະມົນຕີ ໄທ ຍົກອອກມາພາຍຫຼັງສານລັດຖະທຳມະນູນ ໄທ ຮັບໃບຮ້ອງຟ້ອງຂອງກຸ່ມສະມາຊິກສະພາແຫ່ງຊາດ ເອກະລາດ ກ່າວຫາທ່ານນາງນາຍົກລັດຖະມົນຕີ ຍິ່ງລັກ ລະເມີດລັດຖະທຳມະນູນເມື່ອອອກຂໍ້ຕົກລົງຍົກຍ້າຍທ່ານ ທະວິນ ປລຽນສີ ອອກຈາກຕຳແໜ່ງ ເລຂາທິການໃຫຍ່ ສະພາປ້ອງກັນຄວາມສະຫງົບແຫ່ງຊາດ (NSC) ເມື່ອປີ 2011.