ໄທມອບຫຼຽນໄຊອັນສູງສົ່ງໃຫ້ຫົວໜ້າໃຫຍ່ເສນາທິການກອງທັບປະຊາຊົນຫວຽດນາມ
ພົນເອກ ທະນະສັກ ປະຕິມາປະກອນ ແລະ ພົນໂທ ໂດ໋ບ໋າຕິ
(vovworld) - ຕອນບ່າຍວັນທີ 8/9, ທີ່ສຳນັກງານກອງເສນາທິການກອງທັບ ໄທ ຢູ່ນະຄອນຫຼວງບາງກອກ, ພົນເອກ ທະນະສັກ ປະຕິມາປະກອນ, ຮອງນາຍົກລັດຖະມົນຕີ ທັງເປັນລັດຖະມົນຕີການຕ່າງປະເທດ, ຜູ້ບັນຊາການສູງສຸດກອງທັບ ໄທ, ຕາງໜ້າໃຫ້ພະບາດສົມເດັດພະເຈົ້າມະຫາຊີວິດ ໄທ, ມອບຫຼຽນໄຊອັນສູງສົ່ງໃຫ້ພົນໂທ ໂດ໋ບ໋າຕິ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບປະຊາຊົນ ຫວຽດນາມ. ກ່າວຄຳເຫັນຢູ່ທີ່ນີ້, ພົນໂທ ໂດ໋ບ໋າຕິ ສະແດງຄວາມພາກພູມໃຈ, ຄວາມເອກອ້າງທະນົງໃຈຍ້ອນໄດ້ຮັບຫຼຽນໄຊອັນສູງສົ່ງໂດຍພະບາດສົມເດັດພະເຈົ້າມະຫາຊີວິດ, ເຊິ່ງແມ່ນຫຼຽນໄຊອັນສູງສົ່ງສຳລັບບັນດາພົນລະເມືອງ ໄທ ແລະ ພົນລະເມືອງຕ່າງປະເທດມີຄຸນງາມຄວາມດີທີ່ມີຕໍ່ລາຊະອາຈັກ ໄທ. ພົນໂທ ໂດ໋ບ໋າຕິ, ກ່າວວ່າ:
“ເລື່ອງຂ້າພະເຈົ້າໄດ້ຮັບຫຼຽນໄຊອັນສູງສົ່ງໃນມື້ນີ້, ແມ່ນສັນຍາລັກຂອງຄວາມສາມັກຄີມິດຕະພາບ, ການຮ່ວມມື, ການພົວພັນຄູ່ຮ່ວມມືຍຸດທະສາດ ຫວຽດນາມ - ໄທ, ແມ່ນການຕີລາຄາໝາກຜົນແຫ່ງການພົວພັນການທະຫານ - ປ້ອງກັນຊາດ ຫວຽດນາມ ແລະ ໄທ ໃນໄລຍະຜ່ານມາ, ພ້ອມທັງແມ່ນການພິສູດຢ່າງມີຊີວິດຊີວາທີ່ສຸດຂອງຄວາມສາມັກຄີ, ການພົວພັນມິດຕະພາບລະຫວ່າງບັນດາປະເທດ ອາຊຽນ, ສູ້ຊົນເພື່ອສັນຕິພາບ, ສະຖຽນລະພາບ, ການຮ່ວມມືໃນພາກພື້ນ, ມຸ່ງໄປເຖິງການສ້າງປະຊາຄົມ ອາຊຽນ ໃນປີ 2015 ແລະ ກໍ່ແມ່ນຄວາມເອກອ້າງທະນົງໃຈຂອງກອງທັບປະຊາຊົນ ຫວຽດນາມ.”
ພົນໂທ ໂດ໋ບ໋າຕິ ສະແດງຄວາມຫວັງວ່າ ການພົວພັນ ຫວຽດນາມ - ໄທ ຈະພັດທະນາກ່ວາອີກໃນທຸກຂົງເຂດ, ເພື່ອສັນຕິພາບ, ສະຖຽນລະພາບ ແລະ ການຮ່ວມມືຢູ່ພາກພື້ນ ແລະ ຢູ່ໃນໂລກ.