( vovworld ) – ຕອນເຊົ້າວັນທີ 17/2, ຢູ່ຮ່າໂນ້ຍ, ກະຊວງແຜນການ ແລະ ການລົງທຶນໄດ້ຈັດກອງປະຊຸມສະຫລຸບ 20 ປີແຫ່ງການກໍ່ສ້າງ ແລະ ພັດທະນາເຂດອຸດສາຫະກຳ, ເຂດຜະລິດສົ່ງອອກ, ເຂດເສດຖະກິດຢູ່ຫວຽດນາມ. ປະຈຸບັນ, ຫວຽດນາມ ມີເຂດອຸດສາຫະກຳ, ເຂດຜະລິດສົ່ງອອກ 267 ແຫ່ງ, ປະກອບສ່ວນປະມານ 40% ຍອດທຶນ FDI, ກ່ວາ 30% ມູນຄ່າສົ່ງອອກແຕ່ລະປີ ແລະດຶງດູດຜູ້ອອກແຮງງານກ່ວາ 1.600.000 ຄົນ. ທີ່ກອງປະຊຸມ, ຜູ້ຕາງໜ້າບັນດາກະຊວງ, ຂະແໜງການ, ທ້ອງຖິ່ນຕ່າງໆໄດ້ປຶກສາຫາລື ແລະ ສະເໜີຫຼາຍຄຳເຫັນເພື່ອແນໃສ່ພັດທະນາບັນດາເຂດອຸດສາຫະກຳ, ເຂດຜະລິດສົ່ງອອກ, ເຂດເສດຖະກິດໃນໄລຍະທີ່ຈະມາເຖິງ. ໃນນັ້ນ, ສະເໜີໃຫ້ຕ້ອງພັດທະນາຕາມລວງເລິກ, ເພີ່ມທະວີລັກສະນະຮ່ວມສຳພັນ, ພັດທະນາດ້ານເສດຖະກິດ, ສັງຄົມ, ສິ່ງແວດລ້ອມ...ແບບຍືນຍົງ. ກ່າວຄຳເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີ ຮ່ວາງຈູງຫາຍ ໄດ້ຊີ້ບອກ 3 ການບຸກທະລຸເພື່ອພັດທະນາເສດຖະກິດເຂດອຸດສາຫະກຳ, ເຂດຜະລິດສົ່ງອອກ, ແລະ ເຂດເສດຖະກິດ ຊື່ງລວມມີ: ພື້ນຖານໂຄງລ່າງ, ການບຳລຸງສ້າງຊັບພະຍາກອນມະນຸດ ແລະ ບຸກທະລຸກ່ຽວກັບການປະຕິຮູບລະບົບກົດໝາຍ. ທ່ານຮອງນາຍົກລັດຖະມົນຕີຮຽກຮ້ອງໃຫ້ບັນດາເຂດອຸດສາຫະກຳ, ເຂດຜະລິດສົ່ງອອກ, ເຂດເສດຖະກິດຕ້ອງບັນລຸໄດ້ບັນດາຈຸດໝາຍຮອດປີ 2015 ຕ້ອງດຶງດູດທຶນຕື່ມອີກແຕ່ 2,5 ເຖິງ 3 ຕຶ້ໂດລາສະຫະລັດ. ທ່ານຮອງນາຍົກລັດຖະມົນຕີ ຮ່ວາງຈູງຫາຍເວົ້າວ່າ: “ພາຍຫລັງກອງປະຊຸມຄັ້ງນີ້, ກະຊວງແຜນການ ແລະການລົງທຶນຈະຕ້ອງຮັບຟັງ ແລະ ຄົ້ນຄ້ວາເພື່ອໃຫ້ພວກເຮົາປະຕິບັດ, ຄົ້ນຄ້ວາຮູບແບບບໍລິຫານບັນດາເຂດອຸດສາຫະກຳ, ເສດຖະກິດໃນໄລຍະທີ່ຈະມາເຖິງຄືນແນວໃດ ເພື່ອໃຫ້ບັນລຸປະສິດທິຜົນ, ແກ້ໄຂຈຸດອ່ອນ, ພິເສດແມ່ນຈຸດອ່ອນກ່ຽວກັບບັນຫາຮ່ວມມືລະຫວ່າງບັນດາກະຊວງ, ທ້ອງຖິ່ນຕ່າງໆ, ບັນດາເຂດອຸດສາຫະກຳ“.