(vovworld)- “ຫວຽດນາມ ເຕັມໄປດ້ວຍໄມຕິຈິດມິດຕະພາບ ແລະ ກ້າວຂຶ້ນຢ່າງແຮງ, ມາເລເຊຍ ປະກອບດ້ວຍຫລາຍຊົນເຜົ່າ ຫລື ອິນໂດເນເຊຍ ເປັນພື້ນຖານວັດທະນະທຳທີ່ເປັນເອກະລັກສະເພາະ”. ນັ້ນແມ່ນຂໍ້ສັງເກດຂອງບັນດາແຂກເຂົ້າຊົມງານວາງສະແດງວັດທະນະທຳ ອາຊຽນ ເຊິ່ງຈັດຂຶ້ນຢູ່ຮ່າໂນ້ຍຫວ່າງແລ້ວນີ້ ເນື່ອງໃນໂອກາດສະເຫລີມສະຫລອງ 47 ປີແຫ່ງວັນສ້າງຕັ້ງ ອາຊຽນ ແລະ 19 ປີແຫ່ງວັນຫວຽດນາມ ເຂົ້າເປັນສະມາຊິກຂອງອາຊຽນ.
ບັນດາຜູ້ຊົມເຂົ້າຮ່ວມງານວາງສະແດງ
ພາບ:TTXVN
|
ຫໍສະຫມຸດແຫ່ງຊາດໄດ້ຮັບເລືອກເຟັ້ນເປັນສະຖາທີ່ວາງສະແດງວັດຖຸພັນກວ່າ 1000 ຢ່າງໃນງານວາງສະແດງຄັ້ງນີ້. ຈາກປະຕູເຂົ້າຫ້ອງວາງສະແດງ, ທ່ານສາມາດເຫັນໄດ້ປ້າຍໂຄສະນາຂະຫນາດໃຫຍ່, ໃນນັ້ນແນະນຳລາຍລະອຽດບັນດາຂໍ້ມູນກ່ຽວກັບ 10 ປະເທດສະມາຊິກອາຊຽນ ຄື: ເນື້ອທີ່, ຈຳນວນພົນລະເມືອງ, ຊີວິດທາງດ້ານວັດທນະທຳຫລືພື້ນຖານເສດຖະກິດຂອງບັນດາປະເທດ ອາຊຽນ. ນອກນັ້ນ ຍັງມີບັນດາຮູບພາບກ່ຽວກັບທັດສະນີຍະພາບກໍຄືບັນດາງານບຸນວັດທະນະທຳທີ່ເປັນເອກະລັກສະເພາະຂອງແຕ່ລປະເທດ ອາຊຽນຄື: ປະເທດໄທ ດ້ວຍຮູບພາບຂອງວັດ ພະແກ້ວ, ວັດອາລຸນ, ບຸນສົງການ; ປະເທດກຳປູເຈຍ ດ້ວຍຮູບພາບ ອັງກໍວັດ, ອັງກຳທອມ; ຫວຽດນາມ ດ້ວຍຮູບພາບວັດເສົາດຽວ, ອ່າວຮ້າລອງ…. ໄດ້ ຊ່ວຍໃຫ້ຜູ້ຊົມເຂົ້າໃຈໂດຍສັງເຂບກ່ຽວກັບແຕ່ລະປະເທດສະມາຊິກອາຊຽນ. ຢູ່ເບື້ອງຂວາ ຫ້ອງວາງສະແດງ, ຜູ້ຊົມໄດ້ພົບເຫັນປື້ມ, ຫນັງສືພິມກ່ຽວກັບບັນດາຫົວເລື່ອງວັດທະນະທຳ, ເສດຖະກິດ, ການຮ່ວມມືພົ້ນເດັ່ນຂອງບັນດາປະເທດ ອາຊຽນ ດ້ວຍຫລາຍພາສາຕ່າງກັນຄື: World Food Thailand, Todays Singapore, ປະຫວັດສາດກຳປູເຈຍ. ທ່ານນາງ ຟານທິກີມຢູງ, ຜູ້ອຳນວຍການຫໍສະຫມຸດແຫ່ງຊາດ ໃຫ້ຮູ້ວ່າ:
“ບັນດາເອກະສານທີ່ໄດ້ແນະນຳໃນງານວາງສະແດງຄັ້ງນີ້ແມ່ນອຸດົມສົມບູນ ແລະ ຫລາຍຮູບຫລາຍແບບ. ເອກະສານເຫລົ່ານັ້ນແມ່ນນຳມາຈາກຫໍສະຫມຸດແຫ່ງຊາດຫວຽດນາມ ແລະ ຫໍສະຫມຸດແຫ່ງຊາດຂອງບັນດາປະເທດສະມາຊິກອາຊຽນ ກໍ່ຄືສະຖານທູດບັນດາປະເທດສະມາຊິກ ອາຊຽນຢູ່ ຮ່າໂນ້ຍ.”
ປື້ມກ່ຽວກັບອາຊຽນ
ພາບ:.vnanet.vn
|
ນອກຈາກບັນດາເອກະສານທີ່ແນະນຳກ່ຽວກັບວັດທະນະທຳເປັນເອກະລັກສະເພາະຂອງແຕ່ລະປະເທດອາຊຽນແລ້ວ, ງານວາງສະແດງຄັ້ງນີ້ ຍັງສຸມໃສ່ແນະນຳບັນດາເອກະສານກ່ຽວກັບວັດທະນະທຳທະເລຕາເວັນອອກ - ຊຶ່ງແມ່ນຂົງເຂດວັທະນະທຳທີ່ໃຫມ່ອ່ຽມ ແລະ ບໍ່ມີຫລາຍຄົນຮູ້ຈັກເຖິງຄື: ປື້ມແນະນຳໂດຍສັງເຂບກ່ຽວກັບທະເລຕາເວັນອອກ, ອາຊີຕາເວັນອອກສ່ຽງໃຕ້ ຊາຕະກຳດຽວ, ອະນາຄົດດຽວ. ນີ້ແມ່ນບັນດາເອກະສານສ່ອງແສງເຖິງວິວັດແຫ່ງການພັດທະນາອັນຍາວນານ, ລຽນຕິດໃນການສ້າງ, ຂຸດຄົ້ນ ແລະ ການຄ້າລະຫວ່າງບັນດາປະເທດໃນພາກພື້ນອາຊີຕາເວັນອອກສຽງໃຕ້. ທ່ານນາງ ຟານທິກີມຢູງ ໃຫ້ຮູ້ວ່າ:
“ຕາມທັດສະນະຂອງພວກຂ້າພະເຈົ້າແລ້ວ, ວັດທະນະທຳອາຊຽນ ບໍ່ພຽງແຕ່ແມ່ນວັດທະນະທຳເວົ້າລວມ. ວັດທະນະທຳທະເລກໍແມ່ນຈຸດພິເສດສະເພາະ. ທຳມະດາພວກເຮົາພຽງສຸມໃສ່ແນະນຳວັດທະນະທຳອາຫານການກິນ, ວັດທະນະທຳການສະແດງສິລະປະ, ມໍລະດົກວັດທະນະທຳຂອງແຕ່ລະປະເທດເທົ່ານັ້ນ, ຫາກບໍ່ທັນເອົາໃຈໃສ່ເຖິງວັດທະນະທຳທະເລ. ນີ້ກໍແມ່ນຫນຶ່ງໃນບັນດາປັດໄຈເພື່ອຮ່ວມສຳພັນບັນດາປະເທດອາຊີຕາເວັນອອກສ່ຽງໃຕ້ນຳກັນ. ເພາະວ່າ ບັນດາປະເທດ ອາຊີຕາເວັນອອກສ່ຽງໃຕ້ ສ່ວນຫລາຍແມ່ນຢູ່ທະເລຕາເວັນອອກ. ທະເລຕາເວັນອອກສວມບົດບາດສຳຄັນ ດ້ວຍບັນດາທ່າໄດ້ປຽບເພື່ອພັດທະນາການທ່ອງທ່ຽວ, ແມ່ນຂົວຕໍ່ການແລກປ່ຽນການຄ້າທີ່ສຳຄັນ. ຜ່ານນັ້ນ, ບັນດາປະເທດ ອາຊີຕາເວັນອອກສ່ຽງໃຕ້ຈະພ້ອມກັນວາງແຜນນະໂຍບາຍພັດທະນາຢູ່ທະເລຕາເວັນອອກ, ເສີມຂະຫຍາຍຄວາມສາມາດບົ່ມຊ້ອນຢູ່ທະເລຕາເວັນອອກ. ນີ້ແມ່ນຈຸດພິເສດສະເພາະເຊິ່ງພວກເຮົາບໍ່ທັນຂຸດຄົ້ນໝົດເທື່ອ.”
ໃນເວລາ 3 ອາທິດ, ງານວາງສະແດງໄດ້ດຶງດູດແຂກເຂົ້າຊົມເປັນຈຳນວນຫລວງຫລາຍ. ຕາມຄະນະຈັດຕັ້ງແລ້ວ, ສະເລ່ຍແຕ່ລະມື້ມີປະມານ 2000 ເທື່ອຄົນມາຢ້ຽມຊົມ ຊື່ງລວມມີ ຊາວຮ່າໂນ້ຍ ແລະ ນັກທ່ອງທ່ຽວເປັນຈຳນວນຫລວງຫລາຍ.
ຕໍ່ຈາກງານວາງສະແດງ ວັດທະນະທຳອາຊຽນແລ້ວ, ກະຊວງວັດທະນະທຳ ກິລາ ແລະ ທ່ອງທ່ຽວ ສືບຕໍ່ຈັດຕັ້ງການເຄື່ອນໄຫວຫລາຍຢ່າງ ເພື່ອມຸ່ງໄປເຖິງການສ້າງຕັ້ງປະຊາຄົມອາຊຽນ ໃນປີ 2015. ພິເສດແມ່ນງານວາງສະແດງບັນດາວັດຖຸພັນຂອງບັນດາປະເທດ ອາຊຽນ ຢູ່ ໝູ່ບ້ານວັດທະນະທຳທ່ອງທ່ຽວບັນດາເຜົ່າຫວຽດນາມ ຢູ່ ດົງໂມ, ເຊີນໄຕ.