ພາບປະກອບ:internet
|
(vovworld)- ໃນຄວາມມານະພະຍາຍາມມຸ່ງໄປເຖິງການສ້າງຕັ້ງປະຊາຄົມ ອາຊຽນ, ບັນດາປະເທດສະມາຊິກ ອາຊຽນ ພວມຮີບເຮັ່ງກະກຽມໃຫ້ແກ່ການສ້າງປະຊາຄົມເສດຖະກິດ ອາຊຽນ, ເປັນຂີດໝາຍແຫ່ງການເຊື່ອມໂຍງກັບບັນດາພື້ນຖານເສດຖະກິດພາກພື້ນ ອາຊີຕາເວັນອອກສ່ຽງໃຕ້ຢ່າງຮອບດ້ານ. ເຖິງຢ່າງໃດກໍຕາມ, ປີ 2015 ພຽງແຕ່ເປັນຂີດໝາຍໃນການພັດທະນາເສດຖະກິດຂອງ ອາຊຽນ. ສະນັ້ນ, ພາຍຫລັງປີ 2015, ປະຊາຄົມເສດຖະກິດ ອາຊຽນ ຈະເປັນແນວໃດ. ນັກຂ່າວວິທະຍຸກະຈາຍສຽງຫວຽດນາມ ຈະເຕື້ອງເຖິງບັນຫານີ້ຜ່ານບົດຂຽນທີ່ພາດຫົວຂໍ້ວ່າ: “ປະຊາຄົມເສດຖະກິດ ອາຊຽນຫລັງປີ 2015”.
ໄລ່ມາຮອດປະຈຸບັນ, ແຜນການສ້າງປະຊາຄົມເສດຖະກິດ ອາຊຽນ ສຳເລັດໄດ້ກວ່າ 80%. ປະຈຸບັນ, ບັນດາປະເທດສະມາຊິກພວມປຶກສາຫາລືກ່ຽວກັບການມອບສັນຍາແລກປ່ຽນສິນຄ້າ ອາຊຽນ ໃຫ້ແກ່ບັນດາປະເທດສະມາຊິກດ້ອຍພັດທະນາກວ່າໃນກຸ່ມຄື: ກຳປູເຈຍ, ລາວ, ມຽນມາ ແລະ ຫວຽດນາມ, ລົບລ້າງຮົ້ວປອດພາສີ, ສ້າງເງື່ອນໄຂສະດວກກ່ຽວກັບການພົວພັນແລກປ່ຽນສິນຄ້າຢູ່ ອາຊຽນ, ພັດທະນາການເຊື່ອມໂຍງດ້ານພາສີ. ຕາມແຜນການ, ທ້າຍປີ 2015, ປະຊາຄົມເສດຖະກິດ ອາຊຽນ ຈະໄດ້ຮັບການສ້າງຂຶ້ນໂດຍອີງໃສ່ 4 ເສົາຄ້ຳ ສ້າງເປັນຕະຫລາດດຽວ ແລະ ຮາກຖານການຜະລິດລວມ, ສ້າງເຂດເສດຖະກິດແກ້ງແຍ້ງ; ການພັດທະນາເສດຖະກິດຢ່າງສະຫມ່ຳສະເໝີລະຫວ່າງບັນດາປະເທດສະມາຊິກອາຊຽນ ແລະ ເຊື່ອມໂຍງເຂົ້າກັບພື້ນຖານເສດຖະກິດທົ່ວໂລກ. ພາຍຫລັງໄດ້ຮັບການສ້າງຂຶ້ນ, ເລື່ອງສ້າງເປັນຕະຫລາດລວມເຮັດໃຫ້ສິນຄ້າ, ບໍລິການ, ການເຄື່ອນໄຫວການລົງທຶນມີຄວາມເສລີໃນການຈໍລະຈອນ, ການຍົກຍ້າຍແຮງງານມີສີມືໃນພາກພື້ນ. ບັນດາຮົ້ວພາສີ, ປອດພາສີ ໄດ້ຮັບການແກ້ໄຂ ຈະຊ່ວຍໃຫ້ບັນດາວິສາຫະກິດຍູ້ແຮງການສົ່ງອອກ, ຫລຸດຜ່ອນລາຍຈ່າຍການນຳເຂົ້າ, ຫລຸດຜ່ອນຄ່າຜະລິດຕະພັນ. ສິ່ງດັ່ງກ່າວຊ່ວຍໃຫ້ພາກພື້ນ ອາຊຽນ ມີຄວາມຂະຫຍັນຂັນເຄື່ອນກວ່າ, ມີສະມັດຕະພາບສູງ ກວ່າ ແລະ ມີກຳລັງແກ້ງແຍ້ງອັນໃຫຍ່ຫລວງເມື່ອທຽບໃສ່ບັນດາພາກພື້ນອື່ນໃນໂລກ. ສາດສະດາຈານ, Hidetoshi Nishimura, ຜູ້ອຳນວຍການບໍລິຫານສະຖາບັນຄົ້ນຄ້ວາເສດຖະກິດ ອາຊຽນ ແລະ ອາຊີຕາເວັນອອກສ່ຽງໃຕ້ ຢືນຢັນ: ການເຊື່ອມໂຍງເຂົ້າກັບເສດຖະກິດໃນອາຊຽນ ໄດ້ຮັບການສົ່ງເສີມຈາກບັນດາການເຄື່ອນໄຫວເສດຖະກິດຢ່າງແທດຈິງ.
“ປະຊາຄົມເສດຖະກິດ ອາຊຽນ ມີສອງຈຸດໝາຍຕົ້ນຕໍ, ບໍ່ພຽງແຕ່ແມ່ນຄວາມເສລີດ້ານການຄ້າເທົ່ານັ້ນ ຫາກແມ່ນຮາກຖານຜະລິດຫນຶ່ງດຽວ. ສິ່ງດັ່ງກ່າວຕິດພັນກັບເຄືອຂ່າຍຜະລິດທີ່ກ້າວຫນ້າຊື່ງຖືກສ້າງຂຶ້ນຢູ່ພາກພື້ນໃນ 3 ທົດສະວັດຜ່ານມາ. ນີ້ແມ່ນຜົນງານດີເລີດ, ເປັນເອກະລັກສະເພາະ. ເຄືອຂ່າຍຜະລິດນີ້ ບໍ່ມີ ຢູ່ ສະຫະພາບເອີລົບ ແລະ ບັນດາປະເທດຝ່າຍຕາເວັນຕົກ. ຕົວຢ່າງຄື: ພາກສ່ວນຫນຶ່ງແຫ່ງການຜະລິດຂອງໄທຖືກມອບໂອນໃຫ້ແກ່ກຳປູເຈຍ. ບັນດາກຳມະກອນມີສີມື ຢູ່ ໄທ ຈະສົ່ງໄປຍັງກຳປູເຈຍ ເພື່ອດຳເນີນບັນດາຊຸດບຳລຸງສ້າງ.”
ເຖິງຢ່າງໃດກໍຕາມ, ການຮ່ວມສຳພັນລະຫວ່າງບັນດາປະເທດ ອາຊຽນ ບໍ່ທັນສູງ. ສະນັ້ນ ເພື່ອໃຫ້ປະຊາຄົມເສດຖະກິດ ອາຊຽນ ສ້າງຕັ້ງຂຶ້ນ ແລະ ພັດທະນາຫລັງປີ 2015, ບັນດາປະເທດ ອາຊຽນ ຈະເພີ່ມທະວີການຮ່ວມສຳພັນພາຍໃນກຸ່ມ ແລະ ພາກພື້ນ. ທ່ານ George Yeo, ປະທານກຸ່ມບໍລິສັດ Kerry Logistics, ອະດີດລັດຖະມົນຕີການຕ່າງປະເທດ ສິງກະໂປ ຢືນຢັນວ່າ:
“ການພົວພັນລະຫວ່າງ ອາເມລິກາ - ຈີນ, ຈີນ - ອິນເດຍ ຈະສົ່ງຜົນສະທ້ອນຢ່າງເລິກເຊິ່ງເຖິງອະນາຄົດຂອງ ອາຊຽນ. ອາຊຽນ ຮັກສາບົດບາດຕັດສິນຊີ້ຂາດຫລືບໍ່ ແມ່ນອີງໃສ່ເລື່ອງ ອາຊຽນ ມີຄວາມສາມັກຄີ, ເຊື່ອມໂຍງ ແລະ ຮ່ວມສຳພັນກວ່າຫລືບໍ່ ຜ່ານບັນດາເສັ້ນທາງບົກ, ທາງອາກາດ, ຮ່ວມສຳພັນເອເລັກໂຕນິກ ແລະ ການຍົກຍ້າຍຂອງປະຊາຊົນຫລືບໍ່?”
ເປັນທີ່ຈະແຈ້ງແລ້ວວ່າ: ປີ 2015 ເປັນຂີດໝາຍປະຫວັດສາດແຫ່ງການສ້າງຕັ້ງຂອງປະຊາຄົມເສດຖະກິດ ອາຊຽນ. ພາຍຫລັງປີ 2015, ບັນດາປະເທດສະມາຊິກ ຈະມີຫລາຍວຽກຕ້ອງເຮັດ, ພິເສດ ແມ່ນເລື່ອງລົບລ້າງຮົ້ວພາສີ, ຊຸກຍູ້ການລົງທຶນເພື່ອກາຍເປັນເຂດລົງທຶນທີ່ດູດດື່ມ, ພັດທະນາພື້ນຖານເສດຖະກິດລວມ ເພື່ອຫລຸດຜ່ອນຊ່ອງຫວ່າງລະຫວ່າງຜູ້ທຸກຍາກ ແລະ ຮັ່ງມີ ລະຫວ່າງບັນດາປະເທດໃນພາກພື້ນ.