(vovworld)- ຜາດອນ ອີນສະແຫວງ ປີນີ້ອາຍຸ 32 ປີ, ລາວໄດ້ຮຽນຈົບປະລິຍາໂທຢູ່ ມະຫາວິທະຍາໄລວັດທະນະທຳ ຮ່າໂນ້ຍ ແລະ ປະຈຸບັນພວມສືບຕໍ່ຄົ້ນຄ້ວາປະລິຍາເອກ. ເພື່ອນຜາດອນ ຍັງເປັນລູກເຂີຍຂອງຄອບຄົວຊາວຫວຽດນາມ ມາເປັນເວລາ 5 ປີແລ້ວ, ລາວເວົ້າພາສາຫວຽດນາມ ຄືພາສາແມ່. ໂດຍໄດ້ດຳລົງຊີວິດ ແລະ ເຮັດວຽກຢູ່ ຮ່າໂນ້ຍ ເປັນເວລາຫລາຍປີ, ຜາດອນ ໄດ້ມີໂອກາດພົບປະກັບໝູ່ເພື່ອນຢູ່ ຮ່າໂນ້ຍ ຫລາຍຄົນ ແລະ ຮູ້ໄດ້ວ່າ ແມ່ຍິງ ຮ່າໂນ້ຍ ນິຍົມເຄື່ອງເງິນເອ້ຢ້ອງຂອງລາວ,ໄທ. ສະນັ້ນ ລາວໄດ້ປຶກສາຫາລືກັບຄອບຄົວ ແລະ ຕັດສິນໃຈນຳ ເຄື່ອງເງິນມາຈາກລາວ, ໄທເພື່ອເອົາໄປຂາຍຢູ່ ຮ່າໂນ້ຍ ຈຸດປະສົງກໍຢາກແນະນຳສິລະປະຜະລິດເຄື່ອງເງິນທີ່ເປັນເອກະລັກສະເພາະຂອງລາວ ແລະ ໄທມາໃຫ້ໝູ່ເພື່ອນຫວຽດນາມ.
 |
ຮ້ານຂາຍຜະລິດຕະພັນລາວ, ໄທ ຂອງ ເພື່ອນຜາດອນ ຖືກຕັ້ງຢູ່ ຕາແສງ ຟູເທ້ືອງ, ເມືອງ ໄຕໂຮ່ - ຮ່າໂນ້ຍ. ດ້ວຍເນື້ອທີ່ 50 ຕາລາງແມັດ, ເພື່ອນ ຜາດອນ ໄດ້ວາງສະແດງສິນຄ້າຢ່າງງາມຕາ ແລະ ສ້າງຄວາມສະດວກໃຫ້ລູກຄ້າໃນການຊອກຊື້ເຄື່ອງຂອງ. ເຄື່ອງເງິນຂອງລາວ, ໄທ ວາງຂາຍຢູ່ທີ່ນີ້ ມີຫລາຍປະເພດຄື: ແຫວນ,ຕຸ້ມຫູ, ສາຍຄໍ, ກີ້ສາຍຄໍ, ປອກແຂນ, ໂມງ ...ເພື່ອນ ຜາດອນ ໃຫ້ຮູ້ວ່າ: ເມື່ອເປີດຮ້ານຄ້າຂ້າພະເຈົ້າພຽງມີຈຸດປະສົງແມ່ນຢາກຂາຍເຄ່ືອງເງິນຂອງລາວ, ໄທ ເທົ່ານັ້ນ, ແຕ່ໄລຍະທຳອິດ ລູກຄ້າບໍ່ທັນຮູ້ຈັກຫລາຍປານໃດແລະເມື່ອໄດ້ຮັບຂ່າວວ່າ ຕະຫລາດຫວຽດນາມ ພວມນິຍົມຜະລິດຕະພັນທີ່ມີຕົ້ນກຳເນີດຈາກລາວ, ໄທ, ສະນັ້ນ ຂ້າພະເຈົ້າຈຶ່ງເອົາເຄື່ອງໃຊ້ໃນຄອບຄົວມາຂາຍນຳອີກ. ເຖິງວ່າ ຮ້ານຄ້າຂອງຜາດອນແມ່ນໃຫຍ່ໂຕພໍສົມຄວນກໍຕາມ ແຕ່ວິທີຂາຍເຄື່ອງຂອງ ເຈົ້າຂອງຮ້ານຄ້າສ່ວນຫລາຍແມ່ນຕິດຕໍ່ຄ້າຂາຍຜ່ານອິນເຕີແນັດ. ເພື່ອນ ຜາດອນ ໃຫ້ຮູ້ວ່າ:
ສຽງ ຜາດອນ
ຜະລິດຕະພັນເຄື່ອງເງິນລາວ, ໄທ ມີຈຸດທີ່ແຕກຕ່າງກັບເຄື່ອງເງິນຢູ່ ຫວຽດນາມ ນັ້ນແມ່ນ ສີຂອງມັນຢາກດຳຫນ້ອຍຫນຶ່ງ ແລະ ສ້າງຄວາມປະທັບໃຈ. ເມື່ອຜະລິດສິນຄ້າປະເພດນີ້, ຈຸດທີ່ຍາກກວ່າໝູ່ ນັ້ນແມ່ນຂັ້ນຕອນຕິດເມັດແກ້ວເພື່ອສ້າງຄວາມດູດດື່ມໃຫ້ຜະລິດຕະພັນ. ເພື່ອນ ຜາດອນ ບໍ່ແມ່ນຊ່າງຕີເງິນ-ຄຳ ແລະ ກໍບໍ່ທັນຮຽນຂະແຫນງໃດກ່ຽວຂ້ອງເຖິງຜະລິດຕະພັນປະເພດນີ້ ສະນັ້ນ ເມື່ອເລີ່ມດຳເນີນທຸລະກິດ ຜາດອນກໍປະສົບກັບຄວາມຫຍຸ້ງຍາກຫລາຍຢ່າງ.
ສຽງ ຜາດອນ
ເມື່ອລູກຄ້າເຂົ້າຊື້ເຄື່ອງໃຊ້ໃນຄອບຄົວຢູ່ຮ້ານຄ້າຂອງເພື່ອນຜາດອນ ສ່ວນຫລາຍເອື້ອຍນ້ອງຢາກຊື້ເຄື່ອງເງິນເອ້ຢ້ອງອີກ ເພາະຄວາມງາມ ແລະ ຈຸດເປັນເອກະລັກສະເພາະຂອງຜະລິດຕະພັນເຄື່ອງເງິນລາວ, ໄທ. ເພື່ອນ ຕ້າທູຮ່າ, ຜູ້ເຄີຍຊື້ເຄື່ອງຢູ່ ຮ້ານຄ້າຂອງ ຜາດອນ ໃຫ້ຮູ້ວ່າ:
“ຂ້າພະເຈົ້າຮູ້ຈັກຮ້ານຄ້ານີ້ຜ່ານໝູ່ເພື່ອນ. ຂ້າພະເຈົ້າມາຊື້ຫລາຍເທື່ອແລ້ວ ແລະ ມື້ນີ້ ພາເພື່ອນມາຊື້ເຄື່ອງເງິນ ເພາະເຫັນວ່າ ຜະລິດຕະພັນເຄື່ອງເງິນຂອງລາວ, ໄທ ແມ່ນງາມຫລາຍ, ຄຸນນະພາບດີ, ມີຫລາຍຮູບຫລາຍແບບ, ລາຄາເໝາະສົມ.”
ສຳລັບເພື່ອນຜາດອນແລ້ວ, ເລື່ອງດຳເນີນທຸລະກິດຄ້າຂາຍຜະລິດຕະພັນຂອງລາວ, ໄທບໍ່ນຳມາເຊິ່ງຜົນກຳໄລຫລາຍປານໃດ, ແຕ່ເພື່ອນດີໃຈຫລາຍ ເພາະຕົນເອງໄດ້ແນະນຳສິລະປະການຜະລິດເຄື່ອງເງິນຂອງລາວ, ໄທ ມາໃຫ້ໝູ່ເພື່ອນຫວຽດນາມ. ວຽກງານສຳຄັນຂອງເພີ່ອນ ຜາດອນປະຈຸບັນ ແມ່ນຊຸກຍູ້ການໂຄສະນາຜ່ານອິນເຕີແນດ ເພື່ອໃຫ້ເອື້ອຍນ້ອງແມ່ຍິງຫວຽດນາມ ຫລາຍຄົນຮູ້ຈັກເຖິງຜະລິດຕະພັນປະເພດນີ້. ເພື່ອນ ຜາດອນ ປາດຖະຫນາວ່າ ທ້າຍປີ 2014, ຕົ້ນປີ 2015 ຈະມີແຫລ່ງທຶນຮອນຢ່າງພຽງພໍເພື່ອເປີດຮ້ານຄ້າຕື່ມອີກ ແຫ່ງຫນຶ່ງຢູ່ ໃຈກາງນະຄອນຫລວງ.