(vovworld)- ງານມະຫາກຳປະກວດນັກຮ້ອງສຽງທອງໂທລະພາບ ອາຊຽນ ປີ 2012 ຫາກໍ່ສິ້ນສຸດລົງຢູ່ນະຄອນໂຮ່ຈິມີນ ດ້ວຍລາງວັນທີຫນຶ່ງປະເພດທຳນອງດົນຕີ Pop ແລະ ທຳນອງດົນຕີພື້ນເມືອງ ແມ່ນໄດ້ແກ່ນັກຮ້ອງສອງຄົນທີ່ມາຈາກ ອິນໂດເນເຊຍ. ຫວຽດນາມ ມີນັກຮ້ອງສອງຄົນເຂົ້າຮ່ວມງານມະຫາກຳດັ່ງກ່າວ ແລະ ນັກຮ້ອງ Duc Tuan ຂອງຫວຽດນາມຍາດໄດ້ສອງລາງວັນ. ນັ້ນແມ່ນລາງວັນພິເສດຊຶ່ງສະຫງວນໃຫ້ແກ່ນັກຮ້ອງທີ່ມີການສະແດງດີເດັ່ນສຸດ ແລະ ລາງວັນນັກຮ້ອງໄດ້ຮັບຄວາມນິຍົມຊົມຊອບທີ່ສຸດ.
ງານມະຫາກຳປະກວດນັກຮ້ອງສຽງທອງໂທລະພາບ ອາຊຽນ ປີ 2012 ໂດຍມີການເຂົ້າຮ່ວມຂອງນັກຮ້ອງ 18 ຄົນທີ່ມາຈາກ 10 ຄະນະສິລະປະກອນຄື: ໄທ, ມ້ຽນມາ, ກຳປູເຈຍ, ລາວ, ສິງປະໂປ, ມາເລເຊຍ, ອິນໂດເນເຊຍ, ບຣູໄນ ແລະ ຫວຽດນາມ. ນັກຮ້ອງແຕ່ລະຄົນໄດ້ສະແດງໃຫ້ເຫັນສີສັນທຳນອງດົນຕີສະເພາະຂອງ ແຕ່ລະປະເທດ, ເຖິງວ່າ ເຂົາເຈົ້າສະແດງຜ່ານພາສາຂອງຊາດໃດຫນຶ່ງກໍຕາມ ແຕ່ສຽງເພງແຕ່ລະບົດນັ້ນລ້ວນແຕ່ສ້າງຄວາມປະທັບໃຈໃຫ້ແກ່ຜູ້ຊົມ. ໃນລາຍການສະແດງບົດເພງຂອງຕົນ, ນັກຮ້ອງ Muhammad Inata Kusuma Negara ມາຈາກ ອິນໂດເນເຊຍ ໄດ້ສ້າງຄວາມປະທັບໃຈໃຫ້ແກ້ຜູ້ຊົມ ແລະ ຄະນະຈັດຕັ້ງ ຜ່ານບົດເພງພື້ນເມືອງມ່ວນໆທີ່ມີຊື່ວ່າ: DangDut Rel ດ້ວຍພາສາອິນໂດເນເຊຍ ແລະ ຍາດໄດ້ລາງວັນທີຫນຶ່ງໃນປະເພດເພງພື້ນເມືອງ. ເຖິງວ່າຮ້ອງເພງດ້ວຍພາສາອິນໂດເນເຊຍ ແຕ່ນັກຮ້ອງຜູ້ນີ້ໄດ້ເຮັດໃຫ້ຜູ້ຊົມຮູ້ສຶກໄດ້ເນື້ອໃນຂອງບົດເພງ;
ສຽງເພງ: DangDut Rel Kereta ApiTenabang
ສຳລັບນັກຮ້ອງສະໝັກຫລິ້ນ ທະນາພັດ ຢັດຈະຣູນ ມາຈາກໄທ ແລ້ວ, ເລື່ອງເຂົ້າຮ່ວມງານມະຫາກຳປະກວດນັກຮ້ອງສຽງທອງອາຊຽນຄັ້ງນີ້ ຈະຊ່ວຍໃຫ້ອ້າຍມີໂອກາດແນະນຳວັດທະນະທຳຂອງຊາດໄທມາໃຫ້ທ່ານຜູ້ຊົມທີ່ນິຍົມດົນດີ ແລະ ຈະມີໝູ່ເພື່ອນຕື່ມອີກ. “ເມື່ອມາຢ້ຽມຢາມ ຫວຽດນາມ, ຂ້າພະເຈົ້າມີຄວາມຮູ້ສຶກຄືດັ່ງຢູ່ໃນຄອບຄົວຂອງຕົນ. ຊາວ ຫວຽດນາມ ແມ່ນຜູ້ສະຫນິດສະຫນົມ ແລະ ຮັກແພງແຂກ. ຂ້າພະເຈົ້າຢາກເປີດກ້ວາງຄວາມເຂົ້າໃຈກ່ຽວກັບດົນຕີ ແລະ ແລກປ່ຽນບົດເພງພ້ອມກັບນັກຮ້ອງຫລາຍຄົນທີ່ມາຈາກບັນດາປະເທດໃນອາຊຽນ.”
ບັນດານັກຮ້ອງເຂົ້າຮ່ວມງານປະກວດນັກຮ້ອງສຽງທອງ ອາຊຽນ 2012
ພາບ: internet
|
ໂດຍມີຄວາມເປັນກຽດແມ່ນຫນຶ່ງໃນນັກຮ້ອງສອງຄົນຂອງຫວຽດນາມເຂົ້າຮ່ວມງານມະຫາກຳປະກວດນັກຮ້ອງສຽງທອງ ອາຊຽນ, ນັກຮ້ອງ Duc Tuan ໄດ້ແບ່ງປັນວ່າ: “ງານມະຫາກຳຄັ້ງນີ້ແມ່ນກາລະໂອກາດເພື່ອໃຫ້ຂ້າພະເຈົ້າເຂົ້າຮ່ວມການພົບປະແລກປ່ຽນ ແລະ ຮູ້ຈັກເຖິງດ້ານວັດທະນະທຳຂອງປະເທດເພື່ອນມິດຕື່ມອີກ. ຂ້າພະເຈົ້າມີຄວາມປິຕິຊົມຊື່ນເມື່ອໄດ້ຮັບເລືອກເປັນຕົວແທນໃຫ້ແກ່ຫວຽດນາມ. ເຖິງວ່າພວກຂ້າພະເຈົ້າພວມຄາວຽກຫລາຍເພື່ອກະກຽມໃຫ້ແກ່ງານປະກວດສຽງເພງອື່ນກໍຕາມ, ແຕ່ຂ້າພະເຈົ້າກໍພະຍາຍາມຈົນສຸດຄວາມສາມາດຂອງຕົນເພື່ອອຸທິດສ່ວນໃຫ້ແກ່ງານມະຫາກຳຄັ້ງນີ້. ດ້ວຍບົດເພງ One moment in time ທີ່ສະແດງໃນມື້ທີສອງຂອງງານມະຫາກຳ ແລະ ບົດເພງ Sway ທີ່ສະແດງພ້ອມກັບນັກຮ້ອງ Putri ມາຈາກ ບຣູໄນ ໃນງານລາຕີ, Duc Tuan ໄດ້ຮັບລາງວັນພິເສດຈາກຄະນະຈັດຕັ້ງ ທີ່ສະຫງວນໃຫ້ແກ່ນັກຮ້ອງທີ່ມີການສະແດງດີເດັ່ນທີ່ສຸດ ແລະ ອ້າຍຍັງຍາດໄດ້ລາງວັນນັກຮ້ອງທີ່ໄດ້ຮັບຄວາມນິຍົມຊົມຊອບທີ່ສຸດຈາກຜູ້ຊົມ.
ສຽງເພງ: Let us move ahead
ເຖິງວ່າ ບໍ່ສາມາດຍາດໄດ້ລາງວັນດີໃນງານປະກວດສຽງເພງດັ່ງກ່າວກໍຕາມ, ແຕ່ນັກຮ້ອງ Ezah Hashim ມາຈາກ ບຣູໄນ ກໍໄດ້ຮັບການສະຫນັບສະຫນູນ ແລະ ອາລົມຈິດຈາກຜູ້ຊົມເມື່ອສະແດງບົດເພງເວົ້າເຖິງຄວາມຮັກ ແລະ ພິເສດແມ່ນວິທີການຊຶ່ງນັກຮ້ອງຄົນນີ້ສະແດງຄວາມຮັກທີ່ມີຕໍ່ຫວຽດນາມ ຜ່ານຄຳເວົ້າດ້ວຍພາສາຫວຽດທີ່ວ່າ: “toi yeu Viet Nam” ແປ່ວ່າ ຂ້າພະເຈົ້າຮັກແພງຫວຽດນາມ.
“ຂ້າພະເຈົ້າຮູ້ສຶກດີໃຈຫລາຍ ເມື່ອມີຫນ້າໃນງານມະຫາກຳ ແລະ ນີ້ແມ່ນໂອກາດອັນລ້ຳຄ່າທີ່ມີຕໍ່ຂ້າພະເຈົ້າ. ບັນດາເຍື່ອງອາຫານຂອງຫວຽດນາມແມ່ນແຊບຫລາຍ, ຊາວຫວຽດນາມ ແມ່ນຜູ້ຮັກແພງແຂກ ແລະ ຂ້າພະເຈົ້າຮັກແພງຫວຽດນາມ.”
ຫວຽດນາມ ກໍສ້າງຄວາມປະທັບໃຈທີ່ມີຕໍ່ນັກຮ້ອງ Olivia Hutagalung ມາຈາກອິນໂດເນເຊຍ, ຊຶ່ງແມ່ນນັກຮ້ອງທີ່ຍາດໄດ້ລາງວັນທີຫນຶ່ງໃນປະເພດທຳນອງດົນຕີ Pop. ນາງແບ່ງປັນວ່າ: ໃນເວລາ 4 ວັນຢູ່ ຫວຽດນາມ ນາງກໍຍາດເວລາໄປຢ້ຽມຊົມນະຄອນໂຮ່ຈິມີນ ກໍຄືຊື້ຂອງຕ້ອນໃຫ້ແກ່ ໝູ່ເພື່ອນ ແລະ ຕົນເອງ.
ນັກຮ້ອງ Duc Tuan ຂອງຫວຽດນາມ
ພາບ: internet
|
ສຳລັບບັນດານັກຮ້ອງທີ່ເຂົ້າຮ່ວມງານມະຫາກຳປະກວດນັກຮ້ອງສຽງທອງໂທລະພາບ ອາຊຽນ 2012 ແລ້ວ, ຊຸມມື້ຢູ່ຫວຽດນາມໄດ້ສ້າງຄວາມປະທັບໃຈໃຫ້ແກ່ເຂົາເຈົ້າ ຊຶ່ງແມ່ນຄວາມຮັກແພງແຂກຂອງເພື່ອນມິດຫວຽດນາມຍາກທີ່ຈະຫລົງລືມໄດ້. ນີ້ກໍແມ່ນໄລຍະທີ່ເຕັມໄປດ້ວຍຄວາມອົບອຸ່ນສະຫນິດສະຫນົມ ລະຫວ່າງບັນດາເພື່ອນອາຊຽນ. ສິ້ນສຸດງານມະຫາກຳ ເຂົາເຈົ້າຈັບແຂນກັນພ້ອມກັນຂັບຮ້ອງບົດເພງທີ່ມີຊື່ວ່າ: Let us move ahead ແມ່ນຖືກກັບຄວາມໝາຍຂອງງານມະຫາກຳນັ້ນແມ່ນ ຊຸກຍູ້ນ້ຳໃຈມິດຕະພາບ, ການພົວພັນແລກປ່ຽນ ແລະ ສາມັກຄີ, ພ້ອມກັນມູ້ງໄປສູ່ປະຊາຄົມອາຊຽນຢ່າງໝັ້ນຄົງເຂັ້ມແຂງ.
ມີນຫງວຽດ