(VOVWORLD) - ແຂວງ ນະຄອນ ພະນົມ ຕັ້ງຢູ່ທາງທິດຕາເວັນອອກສ່ຽງເໜືອຂອງ ໄທ ເຊິ່ງແມ່ນບ່ອນທີ່ມີຊາວ ໄທ ເຊື້ອຊາດ ຫວຽດນາມ ດຳລົງຊີວິດເປັນຈຳນວນຫຼວງຫຼາຍ. ປະຊາຄົມ ຊາວ ໄທ ເຊື້ອຊາດ ຫວຽດນາມ ຢູ່ແຂວງ ນະຄອນ ພະນົມ ໄດ້ດຳລົງຊີວິດຢ່າງປອງດອງ ແລະ ອຸ້ມຊູຊ່ວຍເຫຼືອເຊິ່ງກັນແລະກັນ, ອັນໄດ້ປະກອບສ່ວນບໍ່ໜ້ອຍເຂົ້າໃນການພັດທະນາເສດຖະກິດ - ສັງຄົມຂອງແຂວງ ແລະ ອວ່າຍໜ້າເມືອຫາປະເທດຊາດ. ເພື່ອບັນລຸໄດ້ໝາກຜົນດັ່ງກ່າວ ແມ່ນຕ້ອງເວົ້າເຖິງການປະກອບສ່ວນຂອງ ສະມາຄົມ ໄທ - ຫວຽດນາມ ແຂວງ ນະຄອນ ພະນົມ ດ້ວຍບົດບາດເປັນບ່ອນອີງທາງດ້ານຈິດໃຈ ແລະ ເປັນສາຍໃຍຜູກພັນພໍ່ແມ່ພີ່ນ້ອງ ຊາວ ຫວຽດນາມ ອາໄສຢູ່ ໄທ.
 ພິທີສະເຫຼີມສະຫຼອງວັນກໍ່ສ້າງຫໍໂມງ ອະນຸສອນຂອງຊາວ ຫວຽດນາມ ອາໄສຢູ່ແຂວງ ນະຄອນ ພະນົມ ຄົບຮອບ 60 ປີ |
ໃນເວທີຂອງພິທີສະເຫຼີມສະຫຼອງວັນກໍ່ສ້າງຫໍໂມງ ອະນຸສອນຂອງຊາວ ຫວຽດນາມ ອາໄສຢູ່ແຂວງ ນະຄອນ ພະນົມ ຄົບຮອບ 60 ປີ, ບັນດາສະມາຊິກໃນສະມາຄົມ ລ້ວນແຕ່ນຸ່ງຊຸດເສື້ອຍາວປະຈຳຊາດ ແລະ ເມົາມົວຂັບຮ້ອງບັນດາບົດເພງຂອງ ຫວຽດນາມ, ຟ້ອນບັນດາວາດຟ້ອນທີ່ເປັນມູນເຊື້ອຂອງ ຫວຽດນາມ. ໃນສາຍຕາຂອງເຂົາເຈົ້າ ຕ່າງກໍສະແດງໃຫ້ເຫັນຄວາມເອກອ້າງທະນົງໃຈ ແລະ ຕື້ນຕັນໃຈ ເມື່ອໄດ້ຂັບຮ້ອງບັນດາບົດເພງກ່ຽວກັບບ້ານເກີດເມືອງນອນຂອງຕົນ. ນີ້ແມ່ນວິທີຮັກສາຈຸດຄວາມງາມທາງດ້ານວັດທະນະທຳຂອງຊາດໄວ້ ເຊິ່ງບັນດາສະມາຊິກໃນສະມາຄົມ ໄທ - ຫວຽດນາມ ຢູ່ແຂວງນະຄອນ ພະນົມ ປະຕິບັດ ໃນໂອກາດມີເຫດການ ຫຼື ວັນບຸນສຳຄັນຂອງ ຫວຽດນາມ ເປັນຕົ້ນແມ່ນ ວັນຊາດທີ 2 ກັນຍາ, ການສະເຫຼີມສະຫຼອງວັນຄ້າຍວັນເກີດຂອງ ປະທານໂຮ່ຈີມິນ ວັນທີ 19 ພຶດສະພາ… ທ່ານ ເວືອງວັນຈິ໊ງ, ທີ່ປຶກສາຂອງສະມາຄົມ ໃຫ້ຮູ້ວ່າ:
“ໃນວັນບຸນໃຫຍ່ຫຼືສຳຄັນ, ເອື້ອຍນ້ອງແມ່ຍິງກໍພາກັນນຸ່ງຊຸດເສື້ອຍາວ ແລ້ວໄປແຫ່ຂະບວນ, ສະແດງສິລະປະ, ຟ້ອນ, ຮ້ອງລຳທຳເພງບັນດາບົດເພງກ່ຽວກັບ ຫວຽດນາມ. ໃນບັນດາໂອກາດຄືແນວນີ້, ພໍ່ແມ່ພີ່ນ້ອງໃນທຸກເພດທຸກໄວຈະມີໂອກາດໄດ້ໂອ້ລົມສົນທະນານຳກັນ, ຄົນລຸ້ນກ່ອນສຶກສາໃຫ້ຄົນລຸ້ນໜຸ່ມມີິຈິດສຳນຶກອວ່າຍໜ້າເມືອຫາບ້ານເກີດເມືອງນອນ ຫຼື ໃນໂອກາດບຸນປີໃໝ່ປະຈຳຊາດ ຫວຽດນາມ, ພໍ່ແມ່ພີ່ນ້ອງຊາວ ຫວຽດນາມ ຢູ່ທີ່ນີ້ ຍັງຮັກສາຮີດຄອງປະເພນີຂອງຊາດ ຫວຽດນາມ ໄວ້ໄດ້ ເປັນຕົ້ນແມ່ນການຫໍ່ເຂົ້າຕົ້ມ, ກະກຽມພາໝາກໄມ້ 5 ຊະນິດ. ທາງສະມາຄົມ ກໍໄປອວຍພອນປີໃໝ່ ແລະ ຈັດພິທີອວຍພອນໃຫ້ແກ່ຜູ້ອາຍຸສູງ.”
ໜຶ່ງໃນບັນດາປັດໄຈ ເພື່ອຮັກສາສີສັນວັດທະນະທຳ ຫວຽດນາມ ນັ້ນແມ່ນການສອນພາສາແມ່ - ນີ້ແມ່ນວຽກງານ ທີ່ທາງສະມາຄົມ ໄທ - ຫວຽດນາມ ແຂວງ ນະຄອນ ພະນົມ ມີຄວາມເອົາໃຈໃສ່ເປັນພິເສດ. ດ້ວຍຄວາມປາດຖະໜາວ່າ ຄົນລຸ້ນຫຼັງຈະຮູ້ພາສາ ຫວຽດ, ສະນັ້ນ, ທາງສະມາຄົມ ໄດ້ມານະພະຍາຍາມຈັດຕັ້ງຫ້ອງສອນພາສາ ຫວຽດ ໃຫ້ແກ່ເດັກອາຍຸແຕ່ 10 – 15 ປີ ແລະ ປຸກລະດົມໃຫ້ພໍ່ແມ່ພາລູກໄປຮຽນພາສາ ຫວຽດ ອາທິດລະສອງຕອນ ໂດຍອ້າຍຄູ, ເອື້ອຍຄູຄົນ ໄທ ເຊື້ອຊາດ ຫວຽດນາມ ສອນ. ທ່ານ ເຈິ່ນວັນເຊົ໊າ, ປະທານສະມາຄົມ ໄທ - ຫວຽດນາມ ແຂວງ ນະຄອນ ພະນົມ ໃຫ້ຮູ້ວ່າ:
 ທ່ານ ເຈິ່ນວັນເຊົ໊າ ມອບຂອງຂວັນໃຫ້ແກ່ຜູ້ເຂົ້າຮ່ວມການຮຽນພາສາ ຫວຽດ |
“ມີຫຼານນ້ອຍຫຼາຍຄົນມັກຮຽນ ເພາະວ່າໄດ້ພົບປະກັບໝູ່ຫຼາຍຄົນ ແລະ ຮູ້ພາສາ ຫວຽດ ຕື່ມອີກ. ການຮຽນທັງໝົດແມ່ນບໍ່ເສຍຄ່າ, ເມື່ອມາຮຽນ, ພວກຫຼານຈະໄດ້ຮັບປຶ້ມ ແລະ ບິກ. ນອກຈາກນັ້ນ, ພວກຂ້າພະເຈົ້າກໍຍັງກະກຽມຂອງຂວັນ, ເຂົ້າໜົມ ເພື່ອສົ່ງເສີມພວກຫຼານ ຮຽນພາສາ ຫວຽດ ອີກດ້ວຍ”.
ສະມາຄົມ ໄທ - ຫວຽດນາມ ແຂວງ ນະຄອນ ພະນົມ ໄດ້ຮັບການສ້າງຕັ້ງຂຶ້ນໃນວັນທີ 27 ມິຖຸນາ 2008. ໃນເບື້ອງຕົ້ນ, ສະມາຄົມມີສະມາຊິກ 10 ຄົນ ໂດຍເປັນຊາວ ຫວຽດນາມ ອາໄສ ຢູ່ ໄທ ແຕ່ຊຸມປີ 1945, 1946. ພາຍຫຼັງເຄື່ອນໄຫວມາ 11 ປີ, ມາຮອດປັດຈຸບັນ, ຈຳນວນສະມາຊິກໃນສະມາຄົມ ໄດ້ເພີ່ມຂຶ້ນເປັນ 1.643 ຄົນ . ສະມາຊິກມີອາຍຸສູງສຸດແມ່ນ 102 ປີ ແລະ ໜຸ່ມທີ່ສຸດແມ່ນ 18 ປີ. ແຕ່ລະເດືອນ, ສະມາຄົມຈະຈັດການພົບປະເທື່ອໜຶ່ງ ເພື່ອໃຫ້ບັນດາສະມາຊິກມີໂອກາດໄດ້ໂອ້ລົມກັນດ້ວຍພາສາ ຫວຽດ. ສະມາຊິກລຸ້ນຕ່າງໆ ລ້ວນແຕ່ບອກສອນກັນໃຫ້ປະຕິບັດຕາມຂໍ້ກຳນົດກົດໝາຍຂອງປະເທດປະຈຳຖິ່ນ, ອຸ້ມຊູຊ່ວຍເຫຼືອເຊິ່ງກັນແລະກັນ. ຄົນລຸ້ນລູກລຸ້ນຫຼານຂອງຊາວ ຫວຽດນາມ ອາໄສ ຢູ່ ນະຄນະຄອນ ພະນົມ ກໍ່ລ້ວນແຕ່ເປັນຄົນຮູ້ຜູ້ດີ, ດຸໝັ່ນຂະຫຍັນພຽນ ແລະ ສາມາດເສັງເຂົ້າມະຫາວິທະຍາໄລໃຫຍ່ແຫ່ງຕ່າງໆຂອງ ໄທ. ມີຫຼາຍຄົນກາຍເປັນທ່ານໝໍ, ທະນາຍຄວາມ, ນັກວິສະວະກອນທີ່ເກັ່ງ ແລະ ເຮັດວຽກຢູ່ໂຮງໝໍ ແລະ ບໍລິສັດໃຫຍ່ແຫ່ງຕ່າງໆ. ບໍ່ພຽງແຕ່ແມ່ນບ່ອນອີງທາງດ້ານຈິດໃຈ, ແມ່ນສາຍໃຍຜູກພັນປະຊາຄົມຊາວ ຫວຽດນາມ ອາໄສ ຢູ່ ໄທ ເທົ່ານັ້ນ, ສະມາຄົມ ໄທ - ຫວຽດນາມ ຢູ່ນະຄອນ ພະນົມ ຍັງຈັດຕັ້ງການເຄື່ອນໄຫວທີ່ມີຄວາມໝາຍຫຼາຍຢ່າງ ເພື່ອອວ່າຍໜ້າເມືອຫາບ້ານເກີດເມືອງນອນ ເປັນຕົ້ນແມ່ນ ໃນໄລຍະເກີດໄພນ້ຳຖ້ວມເມື່ອເດືອນຕຸລາ ປີ 2020 ຜ່ານມາ, ສະມາຄົມ ໄທ - ຫວຽດນາມ ຢູ່ແຂວງ ນະຄອນ ພະນົມ ຍັງລະດົມເງິນໄດ້ກວ່າ 1 ລ້ານ ບາດ (ສະກູນເງິນໄທ) ເພື່ອຊ່ວຍເຫຼືອພໍ່ແມ່ພີ່ນ້ອງຢູ່ບັນດາແຂວງພາກກາງ ຫວຽດນາມ. ເພື່ອແນໃສ່ຮ່ວມແຮງຮວ່ມໃຈກັບພໍ່ແມ່ປະຊາຊົນຢູ່ພາຍໃນປະເທດໃນການຮັບມືກັບໂລກລະບາດໂຄວິດ - 19, ສະມາຄົມ ໄທ - ຫວຽດນາມ ແຂວງ ນະຄອນ ພະນົມ ກໍໄດ້ຂົນຂວາຍພໍ່ແມ່ປະຊາຊົນພາຍໃນແຂວງໃຫ້ການຊ່ວຍເຫຼືອ ດ້ວຍຈຳນວນເງິນ 200.000 ບາດ. ພິເສດ, ສະມາຄົມ ໄທ - ຫວຽດນາມ ຢູ່ແຂວງ ນະຄອນ ພະນົມ ຍັງຊ່ວຍເຫຼືອກຳມະກອນ ຫວຽດນາມ ເກືອບ 100 ຄົນ ທີ່ຖືກຕິດຄ້າງຢູ່ ໄທ ຍ້ອນໂລກລະບາດໂຄວິດ - 19 ອີກດ້ວຍ. ທ່ານ ເຈິ່ນວັນເຊົ໊າ, ປະທານສະມາຄົມ ໄທ - ຫວຽດນາມ ຢູ່ແຂວງ ນະຄອນ ພະນົມ ໃຫ້ຮູ້ວ່າ:
“ນອກຈາກການໂຄສະນາໃຫ້ພໍ່ແມ່ພີ່ນ້ອງປະຕິບັດບັນດາມາດຕະການປ້ອງກັນ, ສະກັດກັ້ນໂລກລະບາດໂຄວິດ - 19 ຕາມການແນະນຳຂອງອຳນາດການປົກຄອງ ໄທ ແລ້ວ, ທາງສະມາຄົມ ກໍ່ສ້າງເງື່ອນໄຂ, ຊ່ວຍເຫຼືອເຂົາເຈົ້າເຮັດລະບຽບການຢູ່ພະແນກຄຸ້ມຄອງຄົນເຂົ້າ - ອອກເມືອງ, ຂົນຂວາຍພໍ່ແມ່ພີ່ນ້ອງ, ອຳນາດການປົກຄອງສ້າງເງື່ອນໄຂ ແລະ ຮັບປະກັນການກິນການຢູ່ໃຫ້ແກ່ເຂົາເຈົ້າ ອີກດ້ວຍ.”
 ສະມາຄົມ ໄທ - ຫວຽດນາມ ຢູ່ ແຂວງ ນະຄອນ ພະນົມ ມອບນ້ຳຢາຂ້າເຊື້ອ 4000 ລິດ ຮັບໃຊ້ແກ່ການສີດຢາຂ້າເຊື້ອ ຕ້ານໂລກລະບາດໂຄວິດ - 19 ຂອງແຂວງ |
ເພື່ອປະກອບສ່ວນເຂົ້າໃນການປ້ອງກັນ, ສະກັດກັ້ນໂລກລະບາດໂຄວິດ - 19 ຂອງແຂວງ ນະຄອນ ພະນົມ, ສະມາຄົມ ໄທ - ຫວຽດນາມ ຢູ່ ແຂວງ ນະຄອນ ພະນົມ ໄດ້ມອບນ້ຳຢາຂ້າເຊື້ອ 4000 ລິດ, ມີມູນຄ່າ 150.000 ບາດ ເພື່ອຮັບໃຊ້ແກ່ການສີດຢາຂ້າເຊື້ອ ຕ້ານໂລກລະບາດໂຄວິດ - 19 ຂອງແຂວງ, ໜູນຊ່ວຍໃນການຕິດແຜ່ນກັ້ງບັງ, ເຄື່ອງວັດແທກອຸນຫະພຸມຮ່າງກາຍ ຢູ່ພະແນກ ຄຸ້ມຄອງຄົນເຂົ້າ - ອອກເມືອງຂອງແຂວງ. ຕີລາຄາກ່ຽວກັບບັນດາການປະກອບສ່ວນຂອງສະມາຄົມຄົນ ໄທ ເຊື້ອຊາດ ຫວຽດນາມ, ທ່ານ ນິວັດ ເຈຍວິຣິຍະບຸນຊາ ເຈົ້າຄອງ ນະຄອນ ພະນົມ ໃຫ້ຮູ້ວ່າ:
“ຂ້າພະເຈົ້າຂໍສະແດງຄວາມຂອບອົກຂອບໃຈຕໍ່ປະຊາຄົມຄົນ ໄທ ເຊື້ອຊາດ ຫວຽດນາມ ທີ່ໄດ້ຮ່ວມແຮງຮ່ວມໃຈພ້ອມກັບປະຊາຊົນທ້ອງຖິ່ນ ປະກອບສ່ວນເຂົ້າໃນການພັດທະນາຂອງແຂວງ ນະຄອນ ພະນົມ. ອຳນາດການປົກຄອງແຂວງ ນະຄອນ ພະນົມ ຍາມໃດກໍຮ່ວມເດີນທາງພ້ອມກັບ ປະຊາຄົມຄົນ ໄທ ເຊື້ອຊາດ ຫວຽດນາມ”.
ບັນດາການເຄື່ອນໄຫວຂອງ ສະມາຄົມ ໄທ - ຫວຽດນາມ ຢູ່ແຂວງ ນະຄອນ ພະນົມ ໄດ້ປະກອບສ່ວນບໍ່ໜ້ອຍເຂົ້າໃນການຊຸກຍູ້ການພົວພັນມິດຕະພາບລະຫວ່າງປະຊາຊົນສອງປະເທດ ຫວຽດນາມ - ໄທ, ແມ່ນບ່ອນອີງທາງດ້ານຈິດໃຈໃຫ້ແກ່ປະຊາຄົມຄົນ ໄທ ເຊື້ອຊາດ ຫວຽດນາມ ມີຄວາມອຸ່ນອ່ຽນໃຈດຳລົງຊີວິດ ແລະ ເຊື່ອມຕົວເຂົ້າກັບປະເທດປະຈຳຖິ່ນ./.