(vovworld)- ວັນທີ 31/12/2015 ຈະເປັນຂີດໝາຍປະຫວັດສາດແຫ່ງການສ້າງຕັ້ງປະຊາຄົມ ອາຊຽນ ໂດຍອີງໃສ່ 3 ເສົາຄ້ຳ ຕົ້ນຕໍ ນັ້ນແມ່ນ ການເມືອງ ຄວາມໝັ້ນຄົງ, ເສດຖະກິດ, ວັດທະນະທຳ ສັງຄົມ. ໃນນັ້ນ ປະຊາຄົມການເມືອງ ຄວາມໝັ້ນຄົງ (APSC) ສວມບົດບາດສຳຄັນໃນສະພາບຄວາມໝັ້ນຄົງການເມືອງຢູ່ພາກພື້ນມີການຜັນແປຫລາຍຢ່າງ. ວັນທີ 28/7/1995 ຊື່ງແມ່ນຈຸດເວລາທີ່ຫວຽດນາມ ເຂົ້າເປັນສະມາຊິກອາຊຽນ ອາດຖືວ່າ ນີ້ແມ່ນບາດລ້ຽວໃນວິວັດການເປີດປະຕູແຫ່ງການເຊື່ອມໂຍງເຂົ້າກັບພາກພື້ນ ແລະ ສາກົນຂອງປະເທດຊາດ. ພາຍຫລັງ 20 ປີເຂົ້າເປັນສະມາຊິກອາຊຽນ, ຍາມໃດຫວຽດນາມ ກໍເປັນສະມາຊິກທີ່ຕັ້ງຫນ້າ ຍົກອອກບັນດາຂໍ້ລິເລີ່ມມີລັກສະນະສ້າງສັນກໍຄືຄວາມມານະພະຍາຍາມແກ້ໄຂບັນດາສິ່ງທ້າທາຍໃນການສ້າງຕັ້ງປະຊາຄົມການເມືອງ ຄວາມໝັ້ນຄົງ.
ຄະນະຜູ້ແທນຫວຽດນາມເຂົ້າຮ່ວມບັນດາກອງປະຊຸມຂອງອາຊຽນ
ພາບປະກອບ:thanhtra.com.vn
|
ປີ 1998, ພາຍຫລັງ 3 ປີທີ່ຫວຽດນາມ ເຂົ້າເປັນສະມາຊິກ ອາຊຽນ, ຫວຽດນາມ ໄດ້ຮັບຫນ້າທີ່ທຳອິດຂອງປະເທດສະມາຊິກ ດ້ວຍການຈັດຕັ້ງກອງປະຊຸມສຸດຍອດອາຊຽນ ຄັ້ງທີ 6, ເປັນເຈົ້າພາບສ້າງ ແລະ ຮັບຮອງເອົາໂຄງການດຳເນີນງານຮ່າໂນ້ຍ ຜັນຂະຫຍາຍວິໄສທັດ ອາຊຽນ ປີ 2020 ກໍຄືວາງອອກບັນດາມາດຕະການຮັບມືກັບບັນດາບັນຫາເກີດຂຶ້ນພາຍຫລັງວິກິດການການເງິນພາກພື້ນ. 3 ປີຕໍ່ໄປ, ຫວຽດນາມ ສືບຕໍ່ ຮັບບົດບາດເປັນປະທານຄະນະກຳມະການປະຈຳ ອາຊຽນ 2000-2001 ຊຸດທີ 34, ເປັນເຈົ້າພາບຈັດບັນດາກອງປະຊຸມລັດຖະມົນຕີການຕ່າງປະເທດ ອາຊຽນ ແລະ ລະຫວ່າງ ອາຊຽນ ກັບບັນດາປະເທດຄູ່ເຈລະຈາຢູ່ ຮ່າໂນ້ຍ ເມື່ອເດືອນ 7/2001 ສຳເລັດຜົນ, ສະເຫນີ ແລະ ຮັບຮອງເອົາຖະແຫລງການຮ່າໂນ້ຍ ກ່ຽວກັບການຮັດແຄບຊ່ອງຫວ່າງການພັດທະນາ.
ຫນຶ່ງໃນບັນດາໝາກຜົນພົ້ນເດັ່ນ ນັ້ນແມ່ນ ຫວຽດນາມ ໄດ້ປະຕິບັດບົດບາດເປັນປະທານ ອາຊຽນ ໃນປີ 2010 ຊື່ງແມ່ນປີບານພັບທີ່ສຳຄັນສຳລັບອາຊຽນໃນແຜນການ 5 ປີ ແຫ່ງການປະຕິບັດວິວັດການສ້າງປະຊາຄົມອາຊຽນ ໃນປີ 2015 ນຳກົດບັດ ອາຊຽນ ເຂົ້າສູ່ຊີວິດ ດ້ວຍການຈັດຕັ້ງກົງຈັກ ແລະ ຮູບການເຄື່ອນໄຫວໃຫມ່. ເມື່ອຕີລາຄາກ່ຽວກັບບັນດາໝາກຜົນບັນລຸໄດ້ໃນ 20 ປີທີ່ຫວຽດນາມ ເຂົ້າເປັນສະມາຊິກ ອາຊຽນ ໃນຂົງເຂດການເມືອງການປ້ອງກັນຄວາມສະຫງົບ, ທ່ານ ເລກົງຟຸ້ງ, ອະດີດລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ໃຫ້ຮູ້ວ່າ:
“ນັບແຕ່ເມື່ອເຂົ້າເປັນສະມາຊິກ ອາຊຽນ, ພວກເຮົາໄດ້ມີການປະກອບສ່ວນສຳຄັນຫລາຍຢ່າງກ່ຽວກັບຄວາມໝັ້ນຄົງດ້ານການເມືອງໃນພາກພື້ນ. ພວກເຮົາລົບລ້າງການສູ້ຢັນກັນລະຫວ່າງສອງເຂດຂອງອາຊຽນ, ພ້ອມທັງຊຸກຍູ້ບັນດາການເຄື່ອນໄຫວຄື: ປະມວນຂໍ້ກຳນົດການປະພຶດກ່ຽວກັບທະເລຕາເວັນອອກ (COC), ຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC). ປີ 2010, ໃນຖານະເປັນປະທານຜັດປ່ຽນຂອງ ອາຊຽນ, ຫວຽດນາມໄດ້ຈັດຕັ້ງກອງປະຊຸມລັດຖະມົນຕີການຕ່າງປະເທດ ອາຊຽນ ແລະ ບັນດາກອງປະຊຸມກ່ຽວຂ້ອງ ສຳເລັດຜົນ. ພິເສດ, ຫວຽດນາມ ເປັນເຈົ້າການ ນຳຂໍ້ລິເລິ່ມໃນການສ້າງຕັ້ງບັນດາກົນໄກໃຫມ່ຄື: ກອງປະຊຸມລັດຖະມົນຕີວ່າການກະຊວງປ້ອງກັນປະເທດ ອາຊຽນ +8 (ADMM +), ກອງປະຊຸມບັນດາຫົວຫນ້າອົງການປ້ອງກັນຄວາມສະຫງົບ ອາຊຽນ (MACOSA), ກອງປະຊຸມສຸດຍອດ ອາຊີຕາເວັນອອກ (EAS) ໄດ້ຮັບການເປີດກວ້າງ ໂດຍມີການເຂົ້າຮ່ວມຂອງລັດເຊຍ ແລະ ອາເມລິກາ. ແລະ ບັນດາປະເທດ ໃນອາຊຽນ ກໍຄືຄູ່ເຈລະຈາໄດ້ຕີລາຄາສູງຄວາມມານະພະຍາຍາມຂອງຫວຽດນາມ ກ່ຽວກັບບັນຫານີ້.”
ຜ່ານການຮ່ວມມືຫລາຍຝ່າຍໃນຂອບເຂດ APSC ໂດຍອີງໃສ່ຫລັກການ “ເຄົາລົບເອກະລາດ, ອະທິປະໄຕ, ຄວາມສະເຫມີພາບ, ຜືນແຜ່ນດິນອັນຄົບຖ້ວນ ແລະ ສີສັນຊາດຂອງທຸກປະເທດສະມາຊິກ ອາຊຽນ ເພື່ອສ້າງພື້ນຖານຄວາມໝັ້ນຄົງຮອບດ້ານຢູ່ພາກພື້ນ, ຮັບມືກັບສິ່ງທ້າທາຍຈາກອາດຊະຍາກຳປະເພດໃຫມ່ຄື: ອາດຊະຍາກຳຂ້າມຊາດ, ການກໍ່ການຮ້າຍ, ໄພທຳມະຊາດ ແລະ ຄວາມປອດໄພໃນການເດີນທະເລ, ຫວຽດນາມ ໄດ້ກາຍເປັນຄູ່ຮ່ວມມືທີ່ໄວ້ເນື້ອເຊື່ອໃຈສຳລັບບັນດາປະເທດສະມາຊິກ ອາຊຽນ. ທ່ານ H.M. Mayerfas, ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ໃຫ້ຮູ້ວ່າ:
“ບໍ່ແມ່ນປະເທດໃດ ພວກຂ້າພະເຈົ້າກໍລົງນາມໃນສັນຍາຄູ່ຮ່ວມມືຍຸດທະສາດ ເພາະວ່າແຕ່ລະການພົວພັນສອງຝ່າຍຕ້ອງບັນລຸລະດັບໃດຫນຶ່ງແນ່ນອນກ່ອນທີ່ບັນລຸໄດ້ສິ່ງດັ່ງກ່າວ. ປະຈຸບັນ ອິນໂດເນເຊຍ ມີການພົວພັນຄູ່ຮ່ວມມືຍຸດທະສາດກັບ 14 ປະເທດໃນໂລກ, ໃນນັ້ນ ຢູ່ພາກພື້ນອາຊີຕາເວັນອອກສ່ຽງໃຕ້ ມີພຽງແຕ່ຫວຽດນາມ ແມ່ນຄູ່ຮ່ວມມືຍຸດທະສາດຂອງອິນໂດເນເຊຍ. ຂ້າພະເຈົ້າຄິດວ່າ ນັ້ນແມ່ນໝາກຜົນເປັນຫນ້າຮັບຮູ້. ການປຶກສາຫາລືທັງໝົດນັ້ນແມ່ນມຸ່ງໄປເຖິງການລົງນາມໃນບັນດາສັນຍາສອງຝ່າຍກັບຫວຽດນາມ ລ້ວນແຕ່ດຳເນີນໄປຢ່າງວ່ອງໄວ ແລະ ບັນລຸໝາກຜົນ.”
ໃນວິວັດການສ້າງຕັ້ງ APSC, ຫວຽດນາມ ແມ່ນຫນຶ່ງໃນບັນດາປະເທດສະມາຊິກຕ້ອງຮັບມືກັບສິ່ງທ້າທາຍຫລາຍຢ່າງ, ພິເສດ ໃນສະພາບການເຄື່ອນໄຫວຖົມດິນກໍ່ສ້າງເກາະຂະຫນາດໃຫຍ່ຢູ່ທະເລຕາເວັນອອກ ໄດ້ສົ່ງຜົນສະທ້ອນເຖິງຄວາມໄວ້ເນື້ອເຊື່ອໃຈ, ສັນຕິພາບ ແລະ ຄວາມໝັ້ນຄົງຂອງພາກພື້ນ. ໂດຍແມ່ນສະມາຊິກມີສ່ວນກ່ຽວຂ້ອງໂດຍກົງເຖິງບັນຫານີ້, ທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ຟ້າມບີງມີງ ຊີ້ແຈ້ງວ່າ:
“ຫວຽດນາມ ພ້ອມກັບບັນດາປະເທດ ອາຊຽນ ສູ້ຊົນປະຕິບັດບັນດາຄຳຖະແຫລງການປະພຶດຂອງບັນດາຝ່າຍຢູ່ທະເລຕາເວັນອອກ (DOC), ໃນນັ້ນ ສືບຕໍ່ສົມທົບກັບຈີນ ເພ່ືອສ້າງປະມວນຂໍ້ກຳນົດການປະພຶດຂອງບັນດາຝ່າຍຢູ່ທະເລຕາເວັນອອກ (COC). ຄວາມຈິງ, ເມື່ອຫວຽດນາມ ຮັບພາລະບົດບາດເປັນປະເທດປະສານງານຂອງ ອາຊຽນ - ຈີນ ແຕ່ປີ 2009-2012, ຫວຽດນາມ ໄດ້ຕັ້ງຫນ້າພ້ອມກັບບັນດາປະເທດ ອາຊຽນ ສ້າງຮ່າງປະມວນຂໍ້ກຳນົດດັ່ງກ່າວ ແລະ ໄດ້ຮັບຄວາມເປັນເອກະພາບຂອງບັນດາປະເທດໃນອາຊຽນ. ປະຈຸບັນ ອາຊຽນ ແລະ ຈີນ ພວມເລີ່ມຕົ້ນວິວັດການທາບທາມຄຳເຫັນກ່ຽວກັບ COC. ນີ້ແມ່ນບາດກ້າວສຳຄັນ. ເຖິງວ່າ ຈາກການທາບທາມຄຳເຫັນເຫັນຕະຫລອດຮອດການລົງນາມໃນສັນຍາ ແມ່ນວິວັດການຍາວນານ ແລະ ຫຍຸ້ງຍາກ ຮຽກຮ້ອງຕ້ອງມີຄວາມມານະພະຍາຍາມຈາກບັນດາຝ່າຍ.”
ປະຊາຄົມອາຊຽນ ເຂັ້ມແຂງ, ຮ່ວມສຳພັນນຳກັນຢ່າງແຫນ້ນແຟ້ນ ນັ້ນແມ່ນການບຸລິມະສິດ ແລະ ຜົນປະໂຫຍດ ຊື່ງຫວຽດນາມພວມມຸ່ງໄປເຖິງ. ບົນເສັ້ນທາງກ້າວໄປເຖິງຂອງ ອາຊຽນ, ຫວຽດນາມຈະເປັນເຈົ້າການ, ຕັ້ງຫນ້າພ້ອມກັບບັນດາປະເທດ ອາຊຽນ, ຍູ້ແຮງຄວາມສາມັກຄີ, ເພີ່ມທະວີການຮ່ວມມືຫັນວິໄສທັດກ່ຽວກັບປະຊາຄົມ ອາຊຽນ “ສະຫນິດຕິດພັນກ່ຽວກັບດ້ານການເມືອງ, ຮ່ວມສຳພັນກ່ຽວກັບເສດຖະກິດ ແລະ ມີຄວາມຮັບຜິດຊອບຕໍ່ສັງຄົມ” ໃຫ້ປະກົດຜົນເປັນຈິງ, ຊື່ງແມ່ນອົງການທີ່ປະຊາຊົນ ບັນດາປະເທດສະມາຊິກ ໄດ້ດຳລົງຊີວິດໃນສັນຕິພາບ, ຄວາມໝັ້ນຄົງ ແລະ ສະຖຽນລະພາບແບບຍືນຍົງ, ການເຕີບໂຕເສດຖະກິດຍາວນານ, ວັດທະນາຖາວອນ ແລະ ຄວາມກ້າວຫນ້າຂອງສັງຄົມ.