(vovworld)- ໃນທ້າຍເດືອນ 10 ຜ່ານມາ, 15 ບໍລິສັດທ່ອງທ່ຽວຕ່າງປະເທດແຖວຫນ້າ ຢູ່ ອິນໂດເນເຊຍ ຄື: Res Tour, Korea Indonesia, Cipa Tour & Travel … ພ້ອມກັບສື່ມວນຊົນ ອິນໂດເນເຊຍ ໄດ້ໄປທັດສະນະສຶກສາ ໃນເວລາ 6 ວັນ 5 ຄືນ ຢູ່ 4 ແຂວງ, ນະຄອນ ທາງພາກເຫນືອຫວຽດນາມຄື: ຟູທໍ້, ຊາປາ, ຮ່າໂນ້ຍ ແລະ ນິງບີງ. ການຢ້ຽມຢາມແມ່ນນອນໃນລາຍການທ່ອງທ່ຽວເພື່ອຊອກຮູ້, ສຳຫລວດ, marketting ຫລື ເອີ້ນວ່າ Famtrip ທີ່ມີຫົວຂໍ້ວ່າ: “ມໍລະດົກພາກເຫນືອ ຫວຽດນາມ - ສະຖານທີ່ທ່ອງທ່ຽວໃຫມ່ 2016 -2017”. ນີ້ແມ່ນຫນຶ່ງໃນບັນດາການເຄື່ອນໄຫວເພື່ອຊຸກຍູ້ການຮ່ວມມືດ້ານການທ່ອງທ່ຽວລະຫວ່າງຫວຽດນາມ ແລະ ອິນໂດເນເຊຍ, ພິເສດ ແມ່ນເພີ່ມທະວີການແນະນຳບັນດາມໍລະດົກຢູ່ພາກເຫນືອຫວຽດນາມ.
ຄະນະFamtrip ອິນໂດເນເຊຍ ຢ້ຽມຢາມວິຫານຮຸ່ງ
ພາບ:Golden Tour
|
ເມື່ອໄປຢ້ຽມຢາມ ນະຄອນ ຫວຽດຈີ ແຂວງ ຟູທໍ້ ໃນຕອນເຊົ້າວັນທີ 21/10, ຄະນະ Famtrip ອິນໂດເນເຊຍ ໄດ້ໄປຖະຫວາຍທູບທຽນຢູ່ວິຫານຮຸ່ງ ຊື່ງແມ່ນແຫ່ງບູຊາ ຄຸນງາມຄວາມດີຂອງບັນດາເຈົ້າຊີວິດທຳອິດຂອງຊາດຫວຽດນາມ, ໄປຢ້ຽມຢາມວິຫານບູຮານ ຮຸ່ງໂລ ແລະ ຊົມສິລະປະ ຂັບຊວານ. ໃນການຕ້ອນຮັບຄະນະ Famtrip ອິນໂດເນເຊຍ ທ່ານນາງ ຫງວຽນຮວາເລ, ຜູ້ອຳນວຍການສູນຖະແຫລງຂ່າວ ແລະ ສົ່ງເສີມການທ່ອງທ່ຽວ ຟູທໍ້ ແບ່ງປັນວ່າ:
“ບັນດາລາຍການ Famtrip ໄດ້ສ້າງເງື່ອນໄຂໃຫ້ແກ່ບັນດາວິສາຫະກິດທ່ອງທ່ຽວໄດ້ມີໂອກາດສຳຜັດໂດຍກົງກັບຊັບພະຍາກອນ, ຜະລິດຕະພັນ ແລະ ບໍລິການທ່ອງທ່ຽວຂອງແຂວງ ຟູທໍ້. ຜ່ານນັ້ນ ເຫັນໄດ້ທ່າແຮງ, ສິ່ງທີ່ເປັນເອກະລັກສະເພາະຂອງສະຖານທີ່ທ່ອງທ່ຽວເພື່ອຄົ້ນຄ້ວາການຮ່ວມສຳພັນສ້າງລາຍການທ່ອງທ່ຽວ, ສາຍທ່ອງທ່ຽວຕິດພັນກັບ ແຂວງ ຟູທໍ້. ນີ້ແມ່ນກາລະໂອກາດທີ່ດີເພື່ອສ້າງການຮ່ວມມືດ້ານການທ່ອງທ່ຽວຢ່າງແຫນ້ນແຟ້ນ ແລະ ມີປະສິດທິຜົນກ່ວາອີກໃນໄລຍະຈະມາເຖິງລະຫວ່າງແຂວງ ຟູທໍ້ ກັບບັນດາທ້ອງຖິ່ນ, ຈາກນັ້ນ ຊຸກຍູ້ການທ່ອງທ່ຽວຂອງແຂວງ”.
ບັນດາສະມາຊິກໃນຄະນະFamtrip ອິນໂດເນເຊຍ ຂີ່ລົດ 3 ລໍ້ ຢ້ຽມຢາມ
ຮ່າໂນ້ຍ
ພາບ:Golden Tour
|
ເມື່ອເດີນທາງອອກຈາກ ແຂວງ ຟູທໍ້, ຄະນະ Famtrip ອິນໂດເນເຊຍ ສືບຕໍ່ ເດີນທາງໄປເຖິງແຂວງ ລາວກາຍ ເພື່ອຢ້ຽມຢາມບັນດາແຂວງພູດອຍທາງພາກເຫນືອ ຫວຽດນາມ ແລະ ເມືອງຊາປາ ຊື່ງແມ່ນສະຖານທີທ່ອງທ່ຽວທີ່ລືຊື່. ຮູບພາບພູຜາປ່າໄມ້ທີ່ໃຫຍ່ໂຕມະໂຫຖານ, ບັນດາເສັ້ນທາງລະອິດລະອ້ຽວ ແລະ ຄວາມງາມຂອງນາຂັ້ນໄດພວມສຸກເຫລືອງ, ການຄົ້ນຫາຊີວິດການເປັນຢູ່ຂອງປະຊາຄົມຊາວຊົນເຜົ່າສ່ວນຫນ້ອຍ ຢາວດໍ໋ ແລະ ຊົນເຜົ່າໄຢ ໄດ້ສ້າງຄວາມປະທັບໃຈຢ່າງແຮງໃຫ້ແກ່ນັກທ່ອງທ່ຽວອິນໂດເນເຊຍ. ທ່ານນາງ Herlinah Djono, ຜູ້ອຳນວຍການຄຸ້ມຄອງ ບໍລິສັດທ່ອງທ່ຽວ Pangsud ປະເທດ ອິນໂດເນເຊຍ ແບ່ງປັນວ່າ:
“ ການຢ້ຽມຢາມຫວຽດນາມຄັ້ງນີ້ຂອງພວກຂ້າພະເຈົ້າແມ່ນສ້າງຄວາມປະທັບໃຈທີ່ສຸດ. ພວກຂ້າພະເຈົ້າ ໄດ້ໄປຢ້ຽມຢາມບ້ານຊົນເຜົ່າຕ່າງໆ ຢູ່ ຊາປາ, ໄດ້ພົບປະກັບຊາວເຜົ່າສ່ວນຫນ້ອຍທີ່ພວມຂາຍຜະລິດຕະພັນແພພື້ນເມືອງ ແລະ ໄດ້ຂີ່ກະເຊົ້າລອຍຟ້າຂຶ້ນຈອມພູ Fanxipang. ການຢ້ຽມຢາມຫວຽດນາມ ຄັ້ງນີ້ ພວກຂ້າພະເຈົ້າ ຖອດຖອນໄດ້ບົດຮຽນຫລາຍຢ່າງ ບໍ່ພຽງແຕ່ຂາຍບໍລິການທ່ອງທ່ຽວ ເຖິງ ຮ່າໂນ້ຍ, ໄຊງ່ອນ, ດາຫນັງ ໃຫ້ນັກທ່ອງທ່ຽວ ອິນໂດເນເຊຍ ເທົ່ານັ້ນ ຫາກພວກຂ້າພະເຈົ້າຍັງມີສະຖານທີ່ທ່ອງທ່ຽວໃຫມ່ຫລາຍແຫ່ງຕື່ມອີກຄື ຊາປາ ເພື່ອແນະນຳໃຫ້ນັກທ່ອງທ່ຽວ.”
ເດີນທາງອອກຈາກເຂດພູດອຍ, ຄະນະ Famtrip ກັບຄືນຢ້ຽມຢາມນະຄອນຫລວງ ຮ່າໂນ້ຍ. ພາຍຫລັງຂີ່ລົດ 3 ລໍ້ ຢ້ຽມຢາມຖະຫນົນສາຍຕ່າງໆຢູ່ນະຄອນຫລວງ ຮ່າໂນ້ຍ ແລະ ບັນດາສະຖານທີ່ທ່ອງທ່ຽວທີ່ມີຊື່ສຽງຄື: ສຸສານປະທານໂຮ່ຈິມີນ, ຫນອງໂຮ່ເກືອມ, ຄຸ້ມຖະຫນົນເກົ່າ ຮ່າໂນ້ຍ ແລ້ວ, ຄະນະ Famtrip ສືບຕໍ່ໄປຢ້ຽມຢາມ ນິງບີງ. ຢູ່ທີ່ນີ້, ບັນດານັກທ່ອງທ່ຽວໄດ້ເຂົ້າຮ່ວມລາຍການທ່ອງທ່ຽວຊີວະພາບ, ທ່ອງທ່ຽວຈິດວີນຍານ ແລະ ປະຫວັດສາດ ດ້ວຍເຮືອ, ຊົມຄວາມງາມຂອງກຸ່ມທັດສະນີຍະພາບ ຈາງອານ ຊື່ງໄດ້ຮັບການຮັບຮອງຈາກ UNESCO ວ່າ ແມ່ນມໍລະດົກວັດທະນະທຳ ແລະ ທຳມະຊາດຂອງໂລກປີ 2014. ຄວາມງາມຂອງພູຜາປ່າໄມ້ທີ່ໃຫຍ່ໂຕມະໂຫຖານໄດ້ສ້າງຄວາມປະທັບໃຈຫລາຍຢ່າງໃຫ້ແກ່ແຂກທີ່ມາຈາກ ອິນໂດເນເຊຍ. Baban Ganda Purnama, ແມ່ນຫນຶ່ງໃນບັນດານັກຂ່າວ Detik.com ໄດ້ຖ່າຍເອົາບັນດາຮູບພາບທີ່ສວຍງາມຂອງເຂດທັດສະນີຍະພາບນີ້.
“ສະຖານທີ່ທ່ອງທ່ຽວແຕ່ລະແຫ່ງ ລ້ວນແຕ່ມີຈຸດທີ່ເປັນເອກະລັກສະເພາະພິເສດ. ໃນໄລຍະຢູ່ຢ້ຽມຢາມ ຫວຽດນາມ ແລະ ຕິດຕາມຄະນະ Famtrip ອິນໂດເນເຊຍ, ຂ້າພະເຈົ້າໄດ້ພະຍາຍາມສ່ອງແສງບັນຍາກາດຢູ່ບັນດາສະຖານທີ່ທ່ອງທ່ຽວ ແລະ ຂຽນບົດສາລະຄະດີ. ໃນເວລາ 3 ມື້, ຂ້າພະເຈົ້າຂຽນໄດ້ 3 ບົດກ່ຽວກັບບັນດານາງສາວ ຂັບຊວານ ຢູ່ ວິຫານຮຸ່ງ, ນ້ອງນ້ອຍຊາວຊົນເຜົ່າ, ລາຍການທ່ອງທ່ຽວ Fanxipang..ແລະ ຍັງມີຫລາຍສິ່ງທີ່ປະທັບໃຈຂ້າພະເຈົ້າຢາກຂຽນເປັນບົດ.”
ຕາມຕົວເລກສະຖິຕິຈາກກົມທ່ອງທ່ຽວຫວຽດນາມແລ້ວ, ຄາດວ່າ ແຕ່ລະປີ ມີນັກທ່ອງທ່ຽວ ອິນໂດເນເຊຍ 80.000 ຄົນມາຢ້ຽມຢາມຫວຽດນາມ ແລະ ນັກທ່ອງທ່ຽວ ຫວຽດນາມ 50.000 ຄົນໄປຢ້ຽມຢາມອິນໂດເນເຊຍ, ເປີດຂົງເຂດການຮ່ວມມືຢ່າງມີປະສິດທິຜົນລະຫວ່າງສອງປະເທດ, ພ້ອມທັງເພີ່ມທະວີກາລະໂອກາດພົວພັນແລກປ່ຽນປະຊາຊົນ ແລະ ປະກອບສ່ວນເຂົ້າຮ່ວມປະຊາຄົມ ອາຊຽນ ຢ່າງຕັ້ງຫນ້າກວ່າ. ເຖິງຢ່າງໃດກໍຕາມ, ຈຳນວນແຂກທ່ອງທ່ຽວໃນຊຸມປີຜ່ານມາ ຍັງບໍ່ທັນສົມກັບຄວາມສາມາດບົ່ມຊ້ອນດ້ານການທ່ອງທ່ຽວຂອງສອງປະເທດ. ທ່ານ ຮ່າວັນຊຽວ, ຮອງຫົວຫນ້າກົມໃຫຍ່ທ່ອງທ່ຽວຫວຽດນາມ ໃຫ້ຮູ້ວ່າ:
“ອິນໂດເນເຊຍ ແມ່ນປະເທດ ມີພົນລະເມືອງຫລາຍກວ່າໝູ່ເມື່ອທຽບໃສ່ບັນດາປະເທດໃນພາກພື້ນ ອາຊຽນ, ໃນຊຸມປີຜ່ານມຮາ, ການຮ່ວມມືດ້ານການທ່ອງທ່ຽວລະຫວ່າງສອງປະເທດມີການຫັນປ່ຽນ, ເຖິງວ່າ ຈຳນວນແຂກທ່ອງທ່ຽວ ອິນໂດເນເຊຍ ມາຢ້ຽມຢາມ ຫວຽດນາມ ແລະ ກົງກັນຂ້າມຈຳນວນແຂກທ່ອງທ່ຽວ ຫວຽດນາມ ໄປຢ້ຽມຢາມ ອິນໂດເນເຊຍ ຍັງຈຳກັດຢູ່. ລັດຖະບານສອງປະເທດ ກໍຄືກົມທ່ອງທ່ຽວ ຄວນຍູ້ແຮງບັນດາການເຄື່ອນໄຫວຊຸກຍູ້ການຮ່ວມມືດ້ານການທ່ອງທ່ຽວລະຫວ່າງສອງຝ່າຍ. ຕົວຢ່າງຄື ຄະນະ Famtripໃນຄັ້ງນີ້”
ໃນຂອບເຂດລາຍການຢ້ຽມຢາມ ຫວຽດນາມ ຍັງດຳເນີນການພົບປະສົນທະນາການທ່ອງທ່ຽວ ລະຫວ່າງ ບໍລິສັດທ່ອງທ່ຽວຫວຽດນາມ ແລະ ອິນໂດເນເຊຍ ໂດຍມີການເຂົ້າຮ່ວມຂອງກົມໃຫຍ່ທ່ອງທ່ຽວຫວຽດນາມ ແລະ ສະຖານທູດ ອິນໂດເນເຊຍ ປະຈຳຫວຽດນາມ ເພື່ອແບ່ງປັນໝາກຜົນກ່ຽວກັບການໄປສຳຫລວດ ແລະ ຊອກຮູ້ບັນດາມາດຕະການເພື່ອຊຸກຍູ້ການຮ່ວມມືດ້ານການທ່ອງທ່ຽວລະຫວ່າງຫວຽດນາມ ແລະ ອິນໂດເນເຊຍ ກວ່າອີກ.
ຄາດວ່າ ໃນໄລຍະຈະມາເຖິງ, ກົມໃຫຍ່ ທ່ອງທ່ຽວ ຫວຽດນາມ ຈະສົມທົບກັບບໍລິສັດການບິນ ແລະ ບັນດາບໍລິສັດທ່ອງທ່ຽວ ອິນໂດເນເຊຍ ເພື່ອສ້າງສາຍທ່ອງທ່ຽວໃຫມ່ທາງພາກເຫນືອຫວຽດນາມ ແລະ ຈັດຕັ້ງ Roadshow ໃຫ້ແກ່ບັນດາບໍລິສັດທ່ອງທ່ຽວ ຫວຽດນາມ ໄປຢ້ຽມຢາມ ອິນໂດເນເຊຍ ໃນເດືອນ 12/2016.