(vovworld)- ໂດຍປະຕິບັດມະຕິເລກທີ 19 ຂອງລັດຖະບານ, ບັນດາກະຊວງ, ຂະແຫນງການ, ທ້ອງຖິ່ນຕ່າງໆຢູ່ຫວຽດນາມ ພວມສຸມໃສ່ເຂົ້າໃນການປັບປຸງສະພາບແວດລ້ອມແຫ່ງການດຳເນີນທຸລະກິດ, ຍູ້ແຮງການປະຕິຮູບລະບຽບການບໍລິຫານ, ຊ່ວຍວິສາຫະກິດເຊື່ອມໂຍງ ແລະ ພັດທະນາໃຫ້ດີກວ່າ. ຈຸດໝາຍຂອງຫວຽດນາມ ແມ່ນບັນລຸອັນດັບ ທີ 4 ໃນບັນດາປະເທດອາຊຽນ ກ່ຽວກັບສະພາບແວດລ້ອມແຫ່ງການດຳເນີນທຸລະກິດ ແລະ ກຳລັງຄວາມສາມາດແກ້ງແຍ້ງຂອງປະເທດຊາດໃນໄລຍະຈະມາເຖິງ.
ພາບປະກອບ:internet
|
ນັບແຕ່ເດືອນ 3/2014, ລັດຖະບານຫວຽດນາມ ປະກາດໃຊ້ມະຕິກ່ຽວກັບການປະຕິຮູບສະພາບແວດລ້ອມແຫ່ງການດຳເນີນທຸລະກິດ, ຍູ້ແຮງການປະຕິຮູບລະບຽບການບໍລິຫານ ຮັບປະກັນຄວາມເປີດເຜີຍ, ໂປ່ງໃສ ແລະ ຍົກສູງຄວາມຮັບຜິດຊອບຂອງບັນດາອົງການບໍລິຫານແຫ່ງລັດໃນໄລຍະ 2014-2015, ສູ້ຊົນບັນລຸລະດັບສະເລ່ຍຂອງກຸ່ມບັນດາປະເທດ ອາຊຽນ. ພາຍຫລັງ 1 ປີແຫ່ງການປະຕິບັດມະຕິຂອງລັດຖະບານ, ສະພາບແວດລ້ອມແຫ່ງການດຳເນີນທຸລະກິດຂອງຫວຽດນາມ ໄດ້ຮັບການປັບປຸງພໍສົມຄວນ. ພິເສດ ເລື່ອງສ້າງເງື່ອນໄຂສະດວກໃຫ້ແກ່ວິສາຫະກິດເລີ່ມເຄື່ອນໄຫວດຳເນີນທຸລະກິດມີຄວາມສະດວກກວ່າ. ຈາກ 10 ລະບຽບການປະຕິບັດໃນໄລຍະ 31 ວັນ, ມາຮອດປະຈຸບັນ ໄດ້ຫລຸດລົງຍັງເຫລືອພຽງ 5 ລະບຽບການ ແລະ ພຽງດຳເນີນໃນ 6 ວັນ. ໃນຊຸມປີກ່ອນນີ້, ແຕ່ລະປີ ວິສາຫະກິດ ຕ້ອງເສຍເວລາ 872 ຊ່ຊົ່ວໂມງ ເພື່ອເສຍອາກອນ ແລະ ປະກັນສັງຄົມ, ມາຮອດປະຈຸບັນ ຫລຸດຜ່ອນເວລາໄດ້ປະມານ 400 ຊົ່ວໂມງ. ດັດຊະນີການປົກປ້ອງນັກລົງທຶນເພີ່ມຂຶ້ນ 65 ຊັ້ນໃນຕາຕະລາງຈັດອັນດັບຂອງໂລກ. ບັນດາກະຊວງ, ຂະແຫນງການກ່ຽວຂ້ອງ ພວມປະຕິບັດການຫັນ ດັດຊະນີເຮັດລະບຽບການພາສີຜ່ານຊາຍແດນ ເປັນງ່າຍດ່າຍ. ດຣ ຫງວຽນດີງກູງ, ຫົວຫນ້າສະຖາບັນຄົ້ນຄ້ວາການຄຸ້ມຄອງເສດຖະກິດສູນກາງ ໃຫ້ຮູ້ວ່າ:
“ມີການຫັນປ່ຽນແຕກຕ່າງກັນເມື່ອທຽບໃສ່ກ່ອນນີ້, ຈາກລັດຖະບານ,ບັນດາກະຊວງຕະຫລອດຮອດອຳນາດການປົກຄອງທ້ອງຖິ່ນທຸກຂັ້ນ ກ່ຽວກັບສະຕິ ແລະ ຄວາມຕັດສິນໃຈປັບປຸງສະພາບແວດລ້ອມຢູ່ຫວຽດນາມ. ທີສອງ, ລັດຖະບານ ພິເສດແມ່ນນາຍົກລັດຖະມົນຕີ ເອົາໃຈໃສ່ຢ່າງໃກ້ຊິດຕິດແທດ ແລະຊີ້ນຳຢ່າງລະອຽດໃນການຜັນຂະຫຍາຍບັນດມາດຕະການປັບປຸງສະພາບແວດລ້ອມແຫ່ງການດຳເນີນທຸລະກິດ. ທີສາມ ພວກເຮົາໄດ້ຜັນຂະຫຍາຍບັນດາມາດຕະການດັ່ງກ່າວຢ່າງມີປະສິດທິຜົນ ສະນັ້ນ ບັນລຸໄດ້ບັນດາໝາກຜົນເປັນຫນ້າຊື່ນຊົມ.”
ເມື່ອຕີລາຄາບັນດາໝາກຜົນພາຍຫລັງ 1 ປີແຫ່ງການປະຕິບັດການປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ຍົກສູງກຳລັງຄວາມສາມາດແກ້ງແຍ້ງຂອງຫວຽດນາມ, ທ່ານນາງ Wendy Werner, ຜູ້ອຳນວຍການ ດ້ານການຄ້າ ແລະ ແກ້ງແຍ້ງ, ເຂດອາຊີ ປາຊີຟີກ ຖືວ່າ: ຫວຽດນາມ ພວມໄປຖືກທິດ ເມື່ອບັນດາການປະຕິຮູບ, ພິເສດ ໃນຂົງເຂດອາກອນ ພວມຊ່ວຍໃຫ້ຜູ້ເສຍອາກອນປະຕິບັດພັນທະຢ່າງສະດວກກວ່າເມື່ອທຽບໃສ່ກ່ອນນີ້ ແລະ ໝາກຜົນຂອງບັນດາການປ່ຽນແປງນັ້ນ ຈະສະແດງອອກຢ່າງຊັດເຈນກວ່າໃນບົດລາຍງານສະພາບແວດລ້ອມແຫ່ງການດຳເນີນທຸລະກິດຂອງທະນາຄານໂລກປີ 2016.
ເພື່ອຍົກສູງກຳລັງຄວາມສາມາດແກ້ງແຍ້ງຂອງຊາດ, ບັນດາກະຊວງ, ຂະແຫນງການກ່ຽວຂ້ອງຢູ່ ຫວຽດນາມ ຕ້ອງມານະພະຍາຍາມຫລາຍກວ່າອີກ. ບົດລາຍງານສະພາບແວດລ້ອມແຫ່ງການດຳເນີນທຸລະກິດຂອງທະນາຄານໂລກ ເອົາໃຈໃສ່ແກ້ໄຂສະພາບລົ້ມລະລາຍ, ປົກປ້ອງນັກລົງທຶນ ແລະ ສຳພັດກັບສິນເຊື່ອ. ສິ່ງດັ່ງກ່າວໄດ້ວາງອອກຄຳຮຽກຮ້ອງຫວຽດນາມ ຕ້ອງປະຕິຮູບສະພາບແວດລ້ອມແຫ່ງການດຳເນີນທຸລະກິດຢ່າງຕໍ່ເນື່ອງ ຕາມທຳນຽມສາກົນ. ທ່ານ ຫວູຕຽນລົກ, ປະທານຫ້ອງການການຄ້າ ແລະ ອຸດສາຫະກຳ ຫວຽດນາມ ໃຫ້ຮູ້ວ່າ:
“ປະຊາຄົມວິສາຫະກິດ ພວມມີຄວາມຮັບຮູ້ກ່ຽວກັບໄລຍະບຸກທະລຸໃນການປະຕິຮູບລະບອບນະໂຍບາຍຢູ່ຫວຽດນາມ, ພິເສດ ດ້ວຍບັນດາຂໍ້ຕົກລົງສຳຄັນຂອງລັດຖະບານ ນັບແຕ່ຕົ້ນປີ ມາຮອດປະຈຸບັນ ກໍຄືບັນດາຄວາມມານະພະຍາຍາມຂອງພວກເຮົາຕໍ່ບັນດາສັນຍາການຄ້າເສລີໃຫຍ່ໃນໂລກ ກໍຄື ຄວາມຕັດສິນໃຈຂອງພວກເຮົາໃນການຍູ້ແຮງ, ຍົກສູງກຳລັງຄວາມສາມາດພາຍໃນ ແລະ ຫັນການຄ້າຕະຫລາດເປັນເສລີ, ຫລຸດຜ່ອນຄວາມອີງໃສ່. ລັດຖະບານ ໄດ້ວາງອອກໂຄງການຫນຶ່ງຢ່າງຄົບຊຸດ ເພື່ອປະຕິຮູບລະບອບນະໂຍບາຍ ແລະ ວາງອອກກົນໄກເພື່ອກວດກາ, ຕິດຕາມກວດກາ, ຊຸກຍູ້ວິວັດການນີ້.”
ຄາດໝາຍໃຫມ່ໃຫ້ແກ່ສະພາບແວດລ້ອມແຫ່ງການດຳເນີນທຸລະກິດຫວຽດນາມ ໃນໄລຍະຈະມາເຖິງ ແມ່ນຍົກອັນດັບຂອງຫວຽດນາມ ຈາກອັນດັບທີ 6 ໃນ 10 ປະເທດ ອາຊຽນ ຂຶ້ນອັນດັບ 4 ຖັດຈາກ ສິງກະໂປ, ມາເລເຊຍ ແລະ ໄທ ໃນຮອບເວລາ 2 ປີ. ວາງອອກຄາດໝາຍນີ້ແມ່ນຄວາມຈຳເປັນ ໃນສະພາບການພື້ນຖານເສດຖະກິດຫວຽດນາມ ພວມໃນວິວັດການສ້າງໂຄງປະກອບຄືນໃຫມ່ ແລະ ເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ກວ້າງຂວາງ.