ຂະໜາດທົ່ງນາຂະໜາດໃຫຍ່ໄດ້ນຳມາເຊິ່ງປະສິດທິຜົນຫຼາຍຢ່າງ
(ພາບຈາກອີນເຕີເນັດ) |
ແຜນຮ່າງສ້າງໂຄງປະກອບຂະແໜງກະສິກຳຄືນໃໝ່ໂດຍກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຫັນເປັນລະອຽດດ້ວຍ 6 ແຜນຮ່າງນ້ອຍໃນຂົງເຂດ: ປູກຝັງ, ລ້ຽງສັດ, ປ່າໄມ້, ສິນໃນນ້ຳ, ຊົນລະປະທານ ແລະ ປູງແຕ່ງຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳ ແລະ ເກືອ. ມາຮອດປະຈຸບັນ, ມີ 47 ໃນຈຳນວນ 63 ແຂວງ, ນະຄອນປະກາດໃຊ້ແຜນແຜນດຳເນີນງານຂອງທ້ອງຖິ່ນ. ປີ 2015: ມູນຄ່າການຜະລິດຂອງຂະແໜງກະສິກຳບັນລຸເກືອບ 20.000 ຕື້ດົ່ງ, ເພີ່ມຂຶ້ນ 2% ເມື່ອທຽບໃສ່ປີ 2014. ສະເລ່ຍມູນຄ່າຜະລິດຕະພັນການປູກຝັງ, ລ້ຽງປູກສິນໃນນ້ຳໃນປີ 2015 ບັນລຸປະມານ 160 ລ້ານດົ່ງ/1ha. ເມື່ອຕີລາຄາກ່ຽວກັບຜົນສຳເລັດນີ້, ນັກຊ່ຽວຊານເສດຖະກິດ ເລດັງແຢງ, ຖືວ່າ:
“ຂະແໜງກະສິກຳ ຫວຽດນາມ ໄດ້ສ້າງໂຄງປະກອບຄືນໃໝ່ ແລະ ບັນລຸໄດ້ບັນດາສັນຍາເປັນໜ້າຊື່ນຊົມ, ໃນນັ້ນພົ້ນເດັ່ນທີ່ສຸດແມ່ນຮູບແບບທົ່ງນາຂະໜາດໃຫຍ່. ວິສາຫະກິດໃຫຍ່ຫຼາຍແຫ່ງໄດ້ລົງທຶນເຂົ້າຂະແໜງກະສິກຳຄື: ກຸ່ມບໍລິສັດ Vincom ລົງທຶນເຂົ້າການຜະລິດຜັກ, ໝາກໄມ້ປອດສານພິດ. ຂະແໜງກະສິກຳ ຫວຽດນາມ ຕ້ອງຍູ້ແຮງການສ້າງໂຄງປະກອບຄືນໃໝ່ກ່ວາອີກເພື່ອນຳບັນດາຊາວກະສິກອນ ກາຍເປັນກຳມະກອນກະສິກຳ ແລະ ຮັບປະກັນບັນດາຄວາມຮຽກຮ້ອງຕ້ອງການກ່ຽວກັບຄວາມປອດໄພ ແລະ ສຸຂະອະນາໄມຂອງອາຫານເພື່ອສົ່ງອອກ.”
ໃນຂົງເຂດລ້ຽງສັດ, ຂະແໜງກະສິກຳປະຕິບັດການສ້າງໂຄງປະກອບຄືນໃໝ່ຕາມເຂດ, ສັດລ້ຽງ, ວິທີການລ້ຽງສັດ, ປ່ຽນໃໝ່ລະບົບປູງແຕ່ງ ແລະ ຈັດຕັ້ງການຜະລິດຕາມລະບົບມູນຄ່າຂອງຂະແໜງສິນຄ້າ. ປີ 2015, ການຜະລິດລ້ຽງສັດສືບຕໍ່ເຕີບໂຕ ແລະ ມີການຫັນປ່ຽນຕາມທິດຕັ້ງໜ້າ, ມູນຄ່າເສດຖະກິດເພີ່ມຂຶ້ນປະມານ 5% ເມື່ອທຽບໃສ່ປີ 2014, ຕອບສະໜອງໄດ້ຄວາມຕ້ອງການດ້ານອາຫານໃຫ້ແກ່ການອຸປະໂພກ, ບໍລິໂພກພາຍໃນປະເທດ ແລະ ຮັບໃຊ້ໃຫ້ແກ່ການສົ່ງອອກໂດຍພື້ນຖານ.
ພາບປະກອບຈາກອີນເຕີເນັດ
|
ການສ້າງໂຄງປະກອບກະສິກຳຄືນໃໝ່ແມ່ນໜຶ່ງໃນບັນດາປັດໄຈເພື່ອສ້າງໂຄງປະກອບພື້ນຖານເສດຖະກິດຄືນໃໝ່, ປ່ຽນໃໝ່ຮູບແບບການເຕີບໂຕ, ໃຫ້ເໝາະສົມກັບຍຸດທະສາດ ແລະ ແຜນການພັດທະນາເສດຖະກິດ - ສັງຄົມຢູ່ແຕ່ລະທ້ອງຖິ່ນ. ທ່ານລັດຖະມົນຕີວ່າການກະຊວງກະສິກຳ ແລະ ພັດທະນາຊົນນະບົດ ກາວດຶກຟາດ, ຖືວ່າ:
“ຕ້ອງຜັນຂະຫຍາຍບັນດາໝວດມາດຕະການຢ່າງຄົບຊຸດ, ໃນນັ້ນໝວດມາດຕະການສຳຄັນຕົ້ນຕໍ່ນັ້ນແມ່ນຈັດຕັ້ງການຜະລິດຄືນໃໝ່ດ້ວຍການເຂົ້າຮ່ວມຂອງວິສາຫະກິດຫຼາຍກ່ວາອີກ, ຈັດຕັ້ງບັນດາສະຫະກອນຄືນໃໝ່, ບັນດາຮູບແບບຮ່ວມສຳພັນຕາມລະບົບມູນຄ່າ. ສືບຕໍ່ຍູ້ແຮງການນຳໃຊ້ເຕັກໂນໂລຢີຜ່ານບັນດາວິສາຫະກິດກໍ່ສ້າງບັນດາຮູບແບບນຳໃຊ້ວິທະຍາສາດເຕັກໂນໂລຢີຕິດພັນກັບການຝຶກອົບຮົມດ້ານເຕັກນິກໃຫ້ແກ່ຊາວກະສິກອນເພື່ອປະກອບສ່ວນປ່ຽນແປງການຜະລິດກະສິກຳ, ຍົກສູງລາຍຮັບໃຫ້ແກ່ຊາວກະສິກອນ.”
ປີ 2016, ຫວຽດນາມ ເຊື່ອມໂຍງເຂົ້າກັບພື້ນຖານເສດຖະກິດໂລກຢ່າງເລິກເຊິ່ງກ່ວາຜ່ານບັນດາສັນຍາການຄ້າເສລີ, ສັນຍາຄູ່ຮ່ວມມືຂ້າມປາຊີຟິກ (TPP) ແລະ ແມ່ນສະມາຊິກຂອງປະຊາຄົມເສດຖະກິດ ອາຊຽນ, ຂະແໜງກະສິກຳ ຫວຽດນາມ ນັບມື້ນັບຢືນຕໍ່ໜ້າທັງກາລະໂອກາດ ແລະ ການທ້າທາຍຫຼາຍຢ່າງ. ດັ່ງນັ້ນ, ກະສິກຳ ຫວຽດນາມ ໄດ້ ແລະ ພວມຍູ້ແຮງການພັດທະນາວິທະຍາສາດ ແລະ ເຕັກໂນໂລຢີໃນການຜະລິດ, ປູງແຕ່ງ, ມຸ່ງໄປເຖິງການພັດທະນາການຜະລິດສິນຄ້າດ້ວຍຂະໜາດໃຫຍ່ ແລະ ຜະລິດຕະພັນຕົ້ນຕໍ່. ຮອງສາດສະດາຈານ, ດຣ ຫງວຽນມິງດຶກ, ຖືວ່າ:
“ເມື່ອເຂົ້າຮ່ວມຕະຫຼາດຢ່າງເລິກເຊິ່ງຕ້ອງຍົກສູງກຳລັງແກ່ງແຍ້ງ, ຊາວກະສິກອນບໍ່ສາມາດຍົກສູງກຳລັງແກ່ງແຍ້ງນັ້ນໄດ້ ຖ້າຫາກບໍ່ມີການໜູນຊ່ວຍຂອງບັນດາອົງການກ່ຽວຂ້ອງ, ອຳນາດການປົກຄອງ, ສ້າງຄວາມສະດວກກ່ວາໃຫ້ແກ່ຜູ້ລ້ຽງສັດ, ຜູ້ຜະລິດ, ວິສາຫະກິດກໍ່ສ້າງເງື່ອນໄຂເພື່ອໃຫ້ຊາວກະສິກອນ ສຳພັດກັບແຫຼ່ງຂໍ້ມູນຂ່າວສານ, ຕະຫຼາດ, ອຸປະກອນ, ເຄື່ອງຈັກເຕັກໂນໂລຢີໃໝ່. ພວກເຮົາຕ້ອງເຮັດແນວໃດເພື່ອຫັນຊາວກະສິກອນເປັນນັກທຸລະກິດ.”
ດ້ວຍຈຳນວນຄອບຄົວຜະລິດກະສິກຳປະມານ 10 ລ້ານຄອບຄົວ, ໃນວິວັດການເຊື່ອມໂຍງເຂົ້າກັບສາກົນ, ຂະແໜງກະສິກຳ ຫວຽດນາມ ກຳນົດຈຸດໝາຍເພີ່ມທະວີການພົວພັນລະຫວ່າງວິທະຍາສາດ - ວິສາຫະກິດ - ຊາວກະສິກອນ, ເພື່ອເພີ່ມທະວີກຳລັງແກ່ງແຍ້ງກັບສິນຄ້າຕ່າງປະເທດ. ທ່ານລັດຖະມົນຕີຊ່ວຍວ່າການກະຊວງກະສິກຳ ແລະ ພັດທະນາຊົນນະບົດ ເຈີ່ນແທງນາມ, ຖືວ່າ:
“ຍ້ອນຕະຫຼາດທັງພາຍໃນ ແລະ ຕ່າງປະເທດມີຄວາມຕ້ອງການບັນດາຜະລິດຕະພັນກະເສດ, ເຄື່ອງປ່າຂອງດົງທີ່ມີຄຸນນະພາບສູງ, ດັ່ງນັ້ນຮຽກຮ້ອງໃຫ້ພວກເຮົາຕ້ອງປະຕິບັດການສ້າງໂຄງປະກອບຄືນໃໝ່ ເຮັດແນວໃດເພື່ອຍົກສູງມູນຄ່າເພີ່ມຂອງຜະລິດຕະພັນ. ກ່ອນອື່ນໝົດ, ທ້ອງຖິ່ນຕ້ອງກຳນົດວ່າຄວນປູກຫຍັງ, ລ້ຽງໂຕຫຍັງເປັນຕົ້ນ ແລະ ເຮັດແນວໃດເພື່ອໃຫ້ຍົກສູງມູນຄ່າຂອງມັນຂຶ້ນຕື່ມ. ພວກເຮົາຊີ້ນຳຄືແນວໃດເພື່ອມູນຄ່າຂອງຜະລິດຕະພັນກະເສດໄດ້ຮັບການຍົກສູງຂຶ້ນ.”
ການສ້າງໂຄງປະກອບຂະແໜງກະສິກຳຄືນໃໝ່ມີຄວາມໝາຍສຳຄັນໃນການຜັນຂະຫຍາຍການສ້າງໂຄງປະກອບທັງພື້ນຖານເສດຖະກິດຂອງປະເທດຊາດຄືນໃໝ່. ດັ່ງນັ້ນ, ບັນດາກະຊວງ, ຂະແໜງການໄດ້ ແລະ ພວມສົມທົບກັນກັບບັນດາທ້ອງຖິ່ນປະຕິບັດການສ້າງໂຄງປະກອບກະສິກຳຄືນໃໝ່ຢ່າງຄົບຊຸດ, ຂ້ຽວຂາດ, ກຳແໜ້ນບັນດາກາລະໂອກາດ, ແກ້ໄຂບັນດາສິ່ງທ້າທາຍເພື່ອເຊື່ອມໂຍງເຂົ້າກັບພາກພື້ນ ແລະ ໂລກ.