(vovworld)-ປີ 2014, ການລົງທຶນໂດຍກົງຂອງຕ່າງປະເທດ (FDI) ເຂົ້າອະສັງຫາລິມະຊັບກວມ 40% ການລົງທຶນຂອງທັງປະເທດ. ອະສັງຫາລິມະຊັບ ແມ່ນຂົງເຂດຢືນອັນດັບທີ 2 ໃນການດຶງດູດການລົງທຶນຂອງຕ່າງປະເທດ, ພຽງຖັດຈາກຂົງເຂດອຸດສາຫະກຳປຸງແຕ່ງ, ປະດິດສ້າງ. ດ້ວຍປັດໄຈສະດວກຄືປະຈຸບັນ, ຂົງເຂດອະສັງຫາລິມະຊັບຢູ່ ຫວຽດນາມ ພວມແມ່ນຂົງເຂດລົງທຶນດູດດື່ມໃນສາຍຕາບັນດານັກລົງທຶນຕ່າງປະເທດ. ບົດຂຽນຂອງນັກຂ່າວ ລືວຮ່ວຽນ ດ້ວຍຫົວຂໍ້ວ່າ: ອະສັງຫາລິມະຊັບ ປີ 2015 ສືບຕໍ່ດຶງດູດນັກລົງທຶນຕ່າງປະເທດ
ພາບປະກອບ:internet
|
ຕາມບົດລາຍງານຂອງກົມລົງທຶນຕ່າງປະເທດ, ສັງກັດກະຊວງແຜນການ ແລະ ການລົງທຶນຫວຽດນາມແລ້ວ, 11 ເດືອນຂອງປີ 2014, ບັນດານັກລົງທຶນຕ່າງປະເທດໄດ້ຈົດທະບຽນລົງທຶນຢູ່ຫວຽດນາມ 32 ໂຄງການ ອະສັງຫາລິມະຊັບໃຫມ່ ດ້ວຍຍອດຈຳນວນເງິນລົງທຶນແມ່ນ 17,33 ຕື້ USD. ການລົງທຶນ FDI ໃນຂົງເຂດ ອະສັງຫາລິມະຊັບໄດ້ເພີ່ມຂຶ້ນກວ່າ 40% ການລົງທຶນຂອງທັງປະເທດ, ຢືນອັນດັບ 2 ຖັດຈາກອຸດສາຫະກຳປຸງແຕ່ງ, ປະດິດສ້າງ. ເມື່ອເວົ້າເຖິງໝາກຜົນນີ້, ທ່ານ ສືງອກເຄືອງ, ຜູ້ຊ່ຽວຊານລົງທຶນ ອະສັງຫາລິມະຊັບ ຖືວ່າ:
“ຕະຫລາດ ອະສັງຫາລິມະຊັບໃນປະຈຸບັນ ໄດ້ຮັບຖືວ່າມີລາຄາຕ່ຳສຸດໃນຫລາຍປີມານີ້, ນີ້ແມ່ນກາລະໂອກາດເພື່ອໃຫ້ບັນດານັກລົງທຶນຕ່າງປະເທດເຂົ້າຮ່ວມຕະຫລາດ ອະສັງຫາລິມະຊັບຢູ່ຫວຽດນາມ. ສະນັ້ນ ແຫລ່ງທຶນ FDI ເພີ່ມຂຶ້ນແມ່ນເລື່ອງທຳມະດາ. ໃນຂົງເຂດອະສັງຫາລິມະຊັບ, ບັນດາປະເທດພາຍໃນພາກພື້ນ ອາຊີ ລົງທຶນເຂົ້າຕະຫລາດ ຫວຽດນາມ ລວມມີ: ຍີ່ປຸ່ນ, ສເກົາຫລີ, ສິງກະໂປ.”
ຕາມຜູ້ຊ່ຽວຊານຫລາຍທ່ານແລ້ວ, ປີ 2015, ຂົງເຂດ ອະສັງຫາລິມະຊັບ ສືບຕໍ່ແມ່ນຂົງເຂດລົງທຶນທີ່ດູດດື່ມສຳລັບບັນດານັກລົງທຶນຕ່າງປະເທດ, ເພາວ່າ ຕະຫລາດນີ້ ມີການເຕີບໂຕດີພໍສົມຄວນ ແລະ ພວມໃນທ່າຟື້ນຕົວ. ໄລຍະຈະມາເຖິງຈະມີກາລະໂອກາດຫລາຍກວ່າເມື່ອ ຫວຽດນາມ ເຂົ້າຮ່ວມສັນຍາການຄ້າຂ້າມ ປາຊີຟີກ (TPP) ກໍຄືບັນດາກຸ່ມການຄ້າເສລີ. ນອກນັ້ນ ກົດໝາຍວ່າດ້ວຍເຮືອນຢູ່ (ສະບັບປັບປຸງ) ແລະ ກົດໝາຍວ່າດ້ວຍການດຳເນີນທຸກິດ ອະສັງຫາລິມະຊັບ (ສະບັບປັບປຸງ) ໄດ້ຫລຸດຜ່ອນຂໍ້ກຳນົດ, ສ້າງເງື່ອນໄຂໃຫ້ບັນດານັກລົງທຶນຕ່າງປະເທດເຂົ້າຮ່ວມຕະຫລາດ ອະສັງຫາລິມະຊັບ ຫວຽດນາມ. ທ່ານ ຫງວຽນຫືວເກືອງ, ປະທານສະໂມສອນ ອະສັງຫາລິມະຊັບ ຮ່າໂນ້ຍ ສັງເກດວ່າ:
“ກົດໝາຍໄດ້ອະນຸຍາດໃຫ້ບັນດານັກລົງທຶນ, ນັກທຸລະກິດ, ອົງການຕ່າງປະເທດ ມີສິດຊື້ເຮືອນຢູ່ ແລະ ກຳມະສິດເຮືອນຢູ່ ຢູ່ຫວຽດນາມ. ນີ້ແມ່ນກາລະໂອກາດເພື່ອໃຫ້ຕະຫລາດອະສັງຫາລິມະຊັບພັດທະນາ ແລະ ປີ 2015 ຈະແມ່ນປີທີ່ ບັນດາອົງການຕ່າງປະເທດເຂົ້າຮ່ວມຕະຫລາດ ອະສັງຫາລິມະຊັບຢ່າງຟົດຟື້ນ.”
ບໍ່ພຽງແຕ່ດຶງດູດຈຳນວນທຶນໃຫຍ່ຫລວງຈາກບັນດານັກລົງທຶນຕ່າງປະເທດເທົ່ານັ້ນ, ອະສັງຫາລິມະຊັບ ຍັງແມ່ນຂົງເຂດດຶງດູດທຶນຈາກຊາວຫວຽດນາມອາໄສຢູ່ຕ່າງປະເທດຝາກມາຫລາຍທີ່ສຸດ. ໃນຈຳນວນ10-13 ຕື້ USD ຊື່ງຊາວຫວຽດນາມ ອາໄສຢູ່ຕ່າງປະເທດ ຝາກມາໃນແຕ່ລະປີນັ້ນ, ຈຳນວນເງິນເກືອບ 20% ແມ່ນສະຫງວນໃຫ້ແກ່ຂົງເຂດ ອະສັງຫາລິມະຊັບ. ຍິ່ງກວ່ານັ້ນ, ຕະຫລາດ ອະສັງຫາລິມະຊັບ ໄດ້ ແລະ ພວມໄດ້ຮັບການຫນູນຊ່ວຍອັນໃຫຍ່ຫລວງຈາກລັດ, ສະນັ້ນ ຄາດຄະເນວ່າ ຈຳນວນເງິນທີ່ຊາວຫວຽດນາມອາໄສຢູ່ຕ່າງປະເທດຝາກມາເພື່ອລົງທຶນໃນຂົງເຂດນີ້ສືບຕໍ່ເພີ່ມຂຶ້ນຫລາຍສົມຄວນໃນໄລຍະຈະມາເຖິງ. ທ່ານ ຫງວຽນຮົ່ງເຊີນ, ຫົວຫນ້າພາກສ່ວນກຳນົດລາຄາ ແລະ ໃຫ້ຄຳປຶກສາການເງິນ, ສັງກັດ ບໍລິສັດ Savills ຮ່າໂນ້ຍ, ໄຈ້ແຍກວ່າ:
“ພວກເຮົາພວມເຊື່ອມໂຍງເຂົ້າກັບເສດຖະກິດສາກົນຢ່າງແຮງ, ພ້ອມກັນນັ້ນ ແມ່ນບັນດາຄຳໝັ້ນສັນຍາຂອງລັດຖະບານກ່ຽວກັບການຫລຸດຜ່ອນບັນດາລະບຽບການບໍລິຫານ ແລະ ໝັ້ນໝາຍເຊື່ອມໂຍງຢ່າງເລິກເຊິ່ງ ແລະ ແຂງແຮງກວ່າ. ຕາມການສັງເກດຂອງພວກຂ້າພະເຈົ້າແລ້ວ, ບໍ່ພຽງແຕ່ແຫລ່ງເງິນລົງທຶນຈາກຕ່າງປະເທດເທົ່ານັ້ນ ຫາກແຫລ່ງເງິນລົງທຶນພາຍໃນປະເທດຈະເພີ່ມຂຶ້ນໃນໄລຍະຈະມາເຖິງ. ບັນດານັກລົງທຶນ ແລະ ບັນດາທະນາຄານພວມມີຈຳນວນເງິນຫລາຍສົມຄວນເພື່ອກຽມພ້ອມລົງທຶນເຂົ້າຂົງເຂດອະສັງຫາລິມະຊັບ.”
ເປັນທີ່ຈະແຈ້ງແລ້ວວ່າ, ບໍ່ທັນຢືນຢັນໄດ້ວ່າ ຕະຫລາດອະສັງຫາລິມະຊັບ ຈະສ້າງບາດກ້າວບຸກທະລຸໃນການດຶງດູດເງິນລົງທຶນຕ່າງປະເທດ, ແຕ່ດ້ວຍທ່າຟື້ນຕົວໃນປະຈຸບັນ ກໍຄືມີຫລາຍກົນໄກ, ນະໂຍບາຍໃຫມ່ໄດ້ຮັບການປະກາດໃຊ້, ຕະຫລາດອະສັງຫາລິມະຊັບໝັ້ນໝາຍຈະຫລຸດ່ຜອນສິນຄ້າຄ້າງສາງ ແລະພັດທະນາດີຂຶ້ນໃນປີ 2015 ແລະ ຊຸມປີຕໍ່ໄປ.