(vovworld) - ປີ 2015 ຜ່ານມາ, ເຖິງວ່າສະພາບເສດຖະກິດຍັງປະສົບກັບຄວາມຫຍຸ້ງຍາກກໍ່ຕາມ, ແຕ່ແຂວງດົ່ງນາຍ ສືບຕໍ່ແມ່ນໜຶ່ງໃນບັນດາທ້ອງຖິ່ນນຳໜ້າທົ່ວປະເທດກ່ຽວກັບການດຶງດູດເງິນລົງທຶນໂດຍກົງຈາກຕ່າງປະເທດ (FDI) ດ້ວຍຈຳນວນເງິນເກືອບ 2,4 ຕື້ USD, ເພີ່ມຂຶ້ນ 2,5 ເທົ່າເມື່ອທຽບໃສ່ແຜນການທີ່ໄດ້ວາງອອກ. ບັນດາຜົນງານບັນລຸໄດ້ພ້ອມກັບເລື່ອງສືບຕໍ່ປັບປຸງພື້ນຖານໂຄງລ່າງ, ເພີ່ມທະວີການປະຕິຮູບດ້ານບໍລິຫານໄດ້ ແລະ ພວມສ້າງປະຖົມປັດໄຈເພື່ອໃຫ້ແຂວງ ດົ່ງນາຍ ຍູ້ແຮງການດຶງດູດທຶນ FDI ໃນປີ 2016 ນີ້. ບົດຂຽນ “ແຂວງດົ່ງນາຍ, ຈຸດພົ້ນເດັ່ນໃນການດຶງດູດເງິນລົງທຶນຈາກຕ່າງປະເທດ” ຂອງເລ້ຮັ່ງ, ນັກຂ່າວ VOV.
ປະຈຸບັນ, ແຂວງດົ່ງນາຍ,ຈຸດພົ້ນເດັ່ນໃນການດຶງດູດເງິນລົງທຶນ
ຈາກຕ່າງປະເທດ |
ໄລ່ຮອດປະຈຸບັນ, ແຂວງ ດົ່ງນາຍ ມີໂຄງການລົງທຶນຈາກຕ່າງປະເທດ (FDI) ເກືອບ 1.600 ໂຄງການ, ດ້ວຍຍອດເງິນລົງທຶນເກືອບ 24 ຕື້ USD (ນັບແຕ່ເມື່ອແຂວງ ດົ່ງນາຍ ເລີ່ມດຶງດູດເງິນລົງທຶນຈາກຕ່າງປະເທດ). ສະເພາະໃນປີ 2015, ແຂວງ ດົ່ງນາຍມີໂຄງການ FDI ທີ່ຈົດທະບຽນໃໝ່ ແລະ ປັບປຸງເພີ່ມເງິນລົງທຶນແມ່ນ 186 ໂຄງການ, ໃນນັ້ນມີໂຄງການຈົດທະບຽນໃໝ່ 100 ໂຄງການດ້ວຍຍອດເງິນຈົດທະບຽນແມ່ນກ່ວາ 1 ຕື້ 750 ລ້ານ USD. ຈຸດພົ້ນເດັ່ນແມ່ນບັນດາໂຄງການນີ້ລ້ວນແຕ່ຂຶ້ນກັບກຸ່ມ, ຂະແໜງອາຊີບທີ່ໄດ້ຮັບບຸລິມະສິດດຶງດູດເງິນລົງທຶນຂອງແຂວງຄື: ເຕັກໂນໂລຢີສູງ, ອຸດສາຫະກຳສຳຮອງ, ຜະລິດວັດສະດຸໃໝ່… ບັນດານັກລົງທຶນເຂົ້າແຂວງ ດົ່ງນາຍ ທີ່ມາຈາກ 40 ປະເທດ ແລະ ເຂດແຄ້ວນ, ໃນນັ້ນນຳໜ້າແມ່ນ: ຍີ່ປຸ່ນ, ສ. ເກົາຫຼີ, ໄຕຫວັນ. ເພື່ອບັນລຸໄດ້ໝາກຜົນດັ່ງກ່າວໃນໄລຍະຜ່ານມາ, ການນຳແຂວງ ດົ່ງນາຍ ໄດ້ຈັດຕັ້ງຄະນະສົ່ງເສີມການຄ້າ ແລະ ການລົງທຶນຢູ່ຕ່າງປະເທດຫຼາຍຄະນະ. ພ້ອມກັນນັ້ນ, ຍູ້ແຮງການປັບປຸງພື້ນຖານໂຄງລ່າງຢູ່ບັນດາເຂດອຸດສາຫະກຳ ແລະ ເພີ່ມທະວີການປະຕິຮູບລະບຽບການບໍລິຫານ. ທ່ານ ມາຍວັນເຍີນ, ຮອງຫົວໜ້າຄະນະຄຸ້ມຄອງບັນດາເຂດອຸດສາຫະກຳແຂວງ ດົ່ງນາຍ, ຖືວ່າ:
“ການປະຕິຮູບລະບຽບການບໍລິຫານແມ່ນປັດໄຈສຳຄັນທີ່ສຸດເພືື່ອໃຫ້ວິສາຫະກິດຕັດສິນໃຈລົງທຶນ ແລະ ເປີດກ້ວາງການຜະລິດຫຼືບໍ່. ຍາມໃດພວກຂ້າພະເຈົ້າກໍ່ຍົກສູງຄຳຂວັນທີ່ວ່າປ່ຽນໃໝ່, ມີຫົວຄິດປະດິດສ້າງ, ຮັບໃຊ້ວິສາຫະກິດເປັນຢ່າງດີ. ສາມາດຫລຸດຜ່ອນໃຫ້ວິສາຫະກິດໄດ້ພວກຂ້າພະເຈົ້າຈະພິຈາລະນາ, ສະເໜີຕໍ່ສູນກາງ. ເວລາແກ້ໄຂລະບຽບການບໍລິຫານຂອງພວກຂ້າພະເຈົ້າຍາມໃດກໍ່ໄວກ່ວາສູນກາງແຕ່ 20 – 40%.”
ປະຈຸບັນ, ໄລຍະເວລາສະໜອງໃບອະນຸຍາດລົງທຶນຢູ່ຄະນະຄຸ້ມຄອງບັນດາເຂດອຸດສາຫະກຳຢູ່ແຂວງ ດົ່ງນາຍ ຍັງເຫຼືອພຽງແຕ່ 3 – 5 ວັນເທົ່ານັ້ນ, ໃນຂະນະທີ່ຕາມຂໍ້ກຳນົດກ່ອນນີ້ແມ່ນ 15 ວັນ. ຄຽງຄູ່ກັນນັ້ນ, ແຂວງ ດົ່ງນາຍ ກໍຍູ້ແຮງການປະຕິຮູບດ້ານການບໍລິຫານໃນຂົງເຂດພາສີ, ອາກອນ. ຜ່ານນັ້ໜໄດ້ຫລຸດຜ່ອນເວລາໃຫ້ບັນດາວິສາຫະກິດເຮັດລະບຽບການພາສີຢູ່ທ່າກຳ່ປັ່ນພໍສົມຄວນ. ກົມພາສີແຂວງ ດົ່ງນາຍ ກໍຫາກໍ່ນຳເຂົ້າເຄື່ອນໄຫວລາຍການພາສີ ແລະ ຂໍ້ມູນຂ່າວວິສາຫະກິດ. ລາຍການດັ່ງກ່າວໄດ້ອັບເດັດກ່ຽວກັບບັນດາຂໍ້ກຳນົດໃໝ່ໃນການສົ່ງອອກ, ນຳເຂົ້າ ແລະ ຕອບບັນດາຂໍ້ຂ້ອງໃຈຂອງວິສາຫະກິດຢ່າງທັນການ. ປະຈຸບັນ, ວິສາຫະກິດພຽງແຕ່ຕ້ອງສົ່ງຄຳຮຽກຮ້ອງດ້ວຍຊອບແວ, ເມື່ອຂະແໜງພາສີຮັບໄດ້ຈະຮູ້ຂໍ້ມູນຄວນແກ້ໄຂຢູ່ໃສ, ສິ່ງດັ່ງກ່າວໄດ້ຊ່ວຍໃຫ້ການແກ້ໄຂວຽກງານວ່ອງໄວກ່ວາ.
ໃນໄລຍະຈະມາເຖິງ, ເພື່ອສືບຕໍ່ດຶງດູດທຶນ FDI ເປັນຢ່າງດີ, ແຂວງ ດົ່ງນາຍ ພວມສຸມໃສ່ລົງທຶນກໍ່ສ້າງພື້ນຖານໂຄງລ່າງຄື: ກໍ່ສ້າງບັນດາເສັ້ນທາງທີ່ເຊື່ອມຕໍ່ເຂົ້າເຂດອຸດສາຫະກຳ, ເສັ້ນທາງຄວາມໄວສູງ ແລະ ທ່າກຳ່ປັ່ນ… ພ້ອມກັນນັ້ນ, ສືບຕໍ່ຈັດຕັ້ງຄະນະສົ່ງເສີມການຄ້າ ແລະ ລົງທຶນຢູ່ຕ່າງປະເທດຫຼາຍຄະນະເພື່ອແນໃສ່ຕ້ອນຮັບບັນດາແຫຼ່ງເງິນລົງທຶນຈາກບັນດາກາລະໂອກາດຂອງບັນດາສັນຍາການຄ້າເສລີ, ຍູ້ແຮງການປະຕິຮູບລະບຽບການບໍລິຫານຕາມທິດມີວິຊາຊີບ, ໂປ່ງໃສ. ໄປຄຽງຄູ່ກັນນັ້ນ, ການນຳແຂວງ ດົ່ງນາຍ ແລະ ບັນດາຂະແໜງການກ່ຽວຂ້ອງຕ້ອງມີການໂອ້ລົມສົນທະນາ ແລະ ຮ່ວມກັບບັນດາວິສາຫະກິດເປັນປະຈຳ, ເພື່ອແກ້ໄຂຄວາມຫຍຸ້ງຍາກ, ໜູນຊ່ວຍໃຫ້ບັນດາວິສາຫະກິດຢ່າງທັນການໃນວິວັດການຜະລິດ, ດຳເນີນທຸລະກິດ, ສ້າງເງື່ອນໄຂກ່ຽວກັບດ້ານໜ້າພຽງ, ບຳລຸງສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງ, ຈັດເຮືອນຢູ່ໃຫ້ແກ່ກຳມະກອນ… ທ່ານນາງ ຟານທິໝີ້ແທງ, ຮອງປະທານຄະນະກຳມະການປະຊາຊົນແຂວງດົ່ງນາຍ, ໃຫ້ຮູ້ວ່າ:
“ປະຈຸບັນ, ມີຫຼາຍໂຄງການເຮືອນຢູ່ສັງຄົມດ້ວຍຂອບຂະໜາດນ້ອຍ ມີແຜນນະໂຍບາຍແລ້ວ ແຕ່ບໍ່ທັນໄດ້ຮັບການຜັນຂະຫຍາຍ. ບັນດາວິສາຫະກິດອາດສາມາດສົມທົບກັບບັນດານັກລົງທຶນເພື່ອຫັນເປັນເຮືອນຢູ່ໃຫ້ກຳມະກອນ. ບັນດາສະຖານກົງສູນ, ສະມາຄົມຕ້ອງແລກປ່ຽນຂໍ້ມູນຂ່າວກັບພວກຂ້າພະເຈົ້າເປັນປະຈຳກ່ຽວກັບບັນດາຄວາມຫຍຸ້ງຍາກຂອງວິສາຫະກິດເພື່ອແກ້ໄຂຢ່າງທັນການ.”
ປີ 2016, ການນຳແຂວງ ແລະ ຄະນະຄຸ້ມຄອງບັນດາເຂດອຸດສາຫະກຳແຂວງ ດ່ົງນາຍ ໃຫ້ຮູ້ວ່າ: ສືບຕໍ່ຍົກສູງປັບປຸງພື້ນຖານໂຄງລ່າງຮາດແວ, ຊອບແວຢູ່ບັນດາເຂດອຸດສາຫະກຳໃຫ້ສົມບູນແບບ. ພ້ອມທັງເອົາໃຈໃສ່ເຖິງລັກສະນະວິຊາສະເພາະໃນບັນດາການເຄື່ອນໄຫວບໍລິຫານ, ຖືວິສາຫະກິດຄືດັ່ງສະມາຊິກໃນຄອບຄົວ, ສືບຕໍ່ສ້າງພື້ນຖານໂຄງລ່າງຢູ່ນອກເຂດອຸດສາຫະກຳ, ທາງຄົມມະນາຄົມ, ຮ່ວມສຳພັນລະຫວ່າງເຂດ ແລະ ກໍ່ສ້າງແຫຼ່ງຊັບພະຍາກອນມະນຸດຢ່າງຄົບຊຸດ. ປີ 2016, ແຂວງນີ້ ວາງຄາດໝາຍດຶງດູດທຶນ FDI ໃຫ້ໄດ້ 1 ຕື້ USD.