ພາບປະກອບ:internet
|
(vovworld)- 43 ລ້ານຄົນຢູ່ຫວຽດນາມຫລຸດພົ້ນອອກຈາກຄວາມອຶດຫິວທຸກຍາກ, ນັ້ນແມ່ນຕົວເລກທີ່ ລັດຖະບານຫວຽດນາມ ແລະ ສປຊ ໄດ້ຍົກອອກໃນພິທີປະກາດ “ໝາກຜົນ 15 ປີແຫ່ງການປະຕິບັດເປົ້າໝາຍສະຫັດສະວັດຢູ່ ຫວຽດນາມ” ໂດຍກະຊວງແຜນການ ແລະ ການລົງທຶນຫວຽດນາມ ຈັດຕັ້ງໃນຕອນເຊົ້າວັນທີ 21/9 ຢູ່ ຮ່າໂນ້ຍ. ຕາມບົດລາຍງານທີ່ພິທີ, ໄລຍະ 15 ປີ ແຕ່ປີ 2001-2015, ການຈະເລີນເຕີບໂຕເສດຖະກິດຂອງຫວຽດນາມ ບັນລຸໃນລະດັບສູງພໍສົມຄວນ, ສະເພາະ ໄລຍະ 2000-2008, ບັນລຸສະເລ່ຍກວ່າ 7%/ປີ. ຫວຽດນາມ ໄດ້ສຳເລັດເປົ້າໝາຍສະຫັດສະວັດຄື: ລົບລ້າງຄວາມອຶດຫິວທຸກຍາກ, ບັນລຸການສຶກສາຂັ້ນປະຖົມພາກບັງຄັບ, ຊຸກຍູ້ຄວາມສະເຫມີພາບລະຫວ່າງຍິງຊາຍ ແລະ ບັນລຸຄວາມຄືບຫນ້າໃນບັນດາຄາດໝາຍດ້ານສາທາລະນະສຸກ. ທ່ານ ຫງວຽນຈີຢູງ, ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ ຫວຽດນາມ ໃຫ້ຮູ້ວ່າ:
“ ຫລັງປີ 2015, ຫວຽດນາມ ສືບຕໍ່ສຸມໃສ່ມານະພະຍາຍາມຮັກສາ ແລະ ຍົກສູງບັນດາໝາກຜົນທີ່ບັນລຸໄດ້ ພ້ອມທັງກ້າວໄປເຖິງຮູບແບບການເຕີບໂຕຢ່າງໝັ້ນຄົງ. ຫວຽດນາມ ຄວນລະດົມແຫລ່ງກຳລັງ ເພື່ອນຳມາເຊິ່ງບັນດາຜົນງານໃຫຍ່ຫລວງກວ່າກ່ຽວກັບການເຕີບໂຕເສດຖະກິດ ແລະ ການລົບລ້າງຄວາມອຶດຫິວທຸກຍາກ.”
ທ່ານນາງ Pratibha Mehta, ຜູ້ປະສານງານ ສປຊ ປະຈຳ ຫວຽດນາມ ເນັ້ນຫນັກວ່າ: ສປຊ ຍາມໃດກໍພ້ອມແລ້ວຫນູນຊ່ວຍລັດຖະບານ, ບັນດາອົງການຈັດຕັ້ງພົນລະເຮືອນ ແລະ ພາກເອກະຊົນ, ຊ່ວຍຫວຽດນາມ ປະຕິບັດບັນດາເປົ້າໝາຍສະຫັດສະວັດແບບຍືນຍົງ ແລະ ສືບຕໍ່ບັນລຸບັນດາຜົນງານໃຫມ່.