(vovworld) - ໂດຍໄດ້ຮັບຄຳເຊີນຂອງສະພາແຫ່ງຊາດມົງໂກນ, ຄະນະສະມາຊິກສະພາແຫ່ງຊາດຫວຽດນາມ ໂດຍທ່ານຮອງປະທານສະພາແຫ່ງຊາດ ອວງຈຸລິວ ນຳໜ້າ, ເຂົ້າຮ່ວມກອງປະຊຸມຄູ່ຮ່ວມມືລັດຖະສະພາອາຊີ - ເອີລົບ ຄັ້ງທີ 9 (ASEP 9) ເຊິ່ງຖືກຈັດຂຶ້ນຢູ່ນະຄອນຫຼວງ Ulan Bator ປະເທດ ມົງໂກນ ໃນລະຫວ່າງວັນທີ 21 – 24/04. ດ້ວຍຫົວຂໍ້ວ່າ “ບົດບາດຂອງ ASEP ສຳລັບກອງປະຊຸມອາຊີ - ເອີລົບ (ASEM)”, ກອງປະຊຸມໄດ້ປຶກສາຫາລື 2 ເນື້ອໃນຄື “ເຊື່ອມຕໍ່ ແລະ ປະສິດທິຜົນຂອງບັນດາກົນໄກຫຼາຍຝ່າຍ” ແລະ “ຄູ່ຮ່ວມືມຸ່ງໄປເຖິງອະນາຄົດ”. ພິເສດ, ASEP 9 ຢືນຢັນຄຳໝັ້ນສັນຍາຮັກສາສັນຕິພາບ ແລະ ຄວາມປອດໄພ, ຄວາມເສລີໃນການເດີນທະເລ ແລະ ການບິນ. ພ້ອມກັນນັ້ນ, ສະກັດກັ້ນບັນດາການກະທຳພຽງລຳພັງຝ່າຍດຽວເຮັດໃຫ້ສະພາບການຢູ່ພາກພື້ນເຄັ່ງຕຶງຂຶ້ນຕື່ມ ແລະ ແກ້ໄຂບັນດາການຂັດແຍ້ງໂດຍສັນຕິວິທີ ບົນພື້ນຖານເຄົາລົບກົດບັດສະຫະປະຊາຊາດ ແລະ ບັນດາຫຼັກການຂອງກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 (UNCLOS).
ກ່າວຄຳເຫັນທີ່ກອງປະຊຸມ, ທ່ານຮອງປະທານສະພາແຫ່ງຊາດ ອວງຈູລິວ ເນັ້ນໜັກເຖິງການແກ້ໄຂບັນດາການຂັດແຍ້ງໂດຍສັນຕິວິທີ ບົນພື້ນຖານກົດບັດສະຫະປະຊາຊາດ ແລະ ບັນດາຫຼັກການພື້ນຖານຂອງກົດໝາຍສາກົນ; ເຄົາລົບສິດເສລີ, ຄວາມປອດໄພໃນການເດີນທະເລ, ການບິນ, ປະຕິບັດປະມວນຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC). ທ່ານຫົວໜ້າຄະນະຜູ້ແທນຫວຽດນາມ ກໍ່ສະເໜີບັນດາມາດຕະການເພື່ອແນໃສ່ເພີ່ມທະວີການຮ່ວມມືລະຫວ່າງ 2 ທະວີບອາຊີ - ເອີລົບ ຢ່າງມີປະສິດທິຜົນ, ເຊິ່ງຫຼາຍປະເທດຕີລາຄາສູງ ແລະ ລະບູໄວ້ໃນຖະແຫຼງການຮ່ວມຂອງກອງປະຊຸມ. ຄາດວ່າ, ASEP 10 ຈະຖືກຈັດຂຶ້ນຢູ່ເອີລົບ ໃນປີ 2018.
ໃນໄລຍະດຳເນີນກອງປະຊຸມ, ທ່ານປະທານສະພາແຫ່ງຊາດມົງໂກນ ໄດ້ໃຫ້ການຕ້ອນຮັບທ່ານຮອງປະທານສະພາແຫ່ງຊາດ ອວງຈູລິວ, ແລກປ່ຽນບັນດາມາດຕະການເພີ່ມທະວີການພົວພັນລະຫວ່າງ 2 ປະເທດ, 2 ສະພາແຫ່ງຊາດ. ທ່ານ ອວງຈູລິວ ກໍ່ມີ ການພົບປະ 2 ຝ່າຍຄັ້ງຕ່າງໆກັບບັນດາຄະນະຜູ້ແທນຄືຶ: ອີຕາລີ, ລັດເຊຍ, ອົດສະຕາລີ, ລາວ, ກຳປູເຈຍ…