(ພາບປະກອບ:baotintuc.vn)
(vovworld)- ໂດຍບໍ່ຫົວຊາຕໍ່ເລື່ອງພວມຖືກຄ້າງໄວ້ຢູ່ລັດເຊຍ ແລະ ບໍ່ທັນຊອກໄດ້ທາງອອກ ຂະນະທີ່ອຳນາດການປົກຄອງອາເມລິກາຕາມລ່າຢ່າງຂ້ຽວຂາດ ນັ້ນ, Edward Snowden-ອະດີດພາລະກອນອົງການສືບລາຊະການລັບສູນກາງອາເມລິກາ (CIA) ສືບຕໍ່ເປີດເຜີຍບັນດາຄວາມລັບທີ່ກ່ຽວກັບໂຄງການຕິດຕາມກວດກາ ທີ່ກໍ່ຄວາມໂຕ້ຖຽງກັນຂອງອາເມລິກາ. ໃນບົດສຳພາດລົງພິມໃນໜັງສືພິມລາຍສັບປະດາ Der Spiegel (ເຢຍລະມັນ) ສະບັບອອກວັນທີ 7/7, Edward Snowden ໃຫ້ຮູ້ວ່າ: ໂຄງການຕິດຕາມກວດກາອິນເຕີເນັດຂອງອົງການປ້ອງກັນຄວາມສະຫງົບແຫ່ງຊາດອາເມລິກາ (NSA) ໄດ້ດຳເນີນໃນຂອບເຂດທົ່ວໂລກໂດຍມີການຮ່ວມມືຂອງຫລາຍປະເທດມະຫາອຳນາດຝ່າຍຕາເວັນຕົກ. Edward Snowden ເປີດເຜີຍວ່າ: ກົມພົວພັນຕ່າງປະເທດ ສັງກັດ NSA ມີໜ້າທີ່ປະສານງານສຳລັບວຽກງານສອດແນມຂໍ້ມູນຂ່າວສານລະຫວ່າງ NSA ແລະ ບັນດາອົງການສືບລາຊະການລັບຕ່າງປະເທດ, ລະອຽດແມ່ນບັນດາປະເທດເອີລົບ ແລະ ວິວັດການຮ່ວມມືດັ່ງກ່າວໄດ້ຮັບການຈັດຕັ້ງຢ່າງລະມັດລະວັງທີ່ສຸດ. ການເປີດເຜີຍດັ່ງກ່າວໄດ້ຍົກອອກມາໃນສະພາບການທີ່ຫລາຍປະເທດສະມາຊິກອີຢູ ພວມອອກສຽງຕຳນິຕີຕຽນອາເມລິກາຢ່າງແຮງ ຕໍ່ຂໍ້ມູນຂ່າວທີ່ວ່າ NSA ໄດ້ຕິດຕັ້ງເຄື່ອງລັກຟັງສຽງຢູ່ບັນດາຫ້ອງການພົວພັນຕ່າງປະເທດຂອງອີຢູ ຢູ່ອາເມລິກາ ແລະ ບຣຸກແຊນ ປະເທດແບນຊິກ. ທ່ານປະທານລັດຖະສະພາເອີລົບຖືວ່າ: ເລື່ອງອາເມລິກາ ຕິດຕາມບັນດາປະເທດເພື່ອນມິດ ແລະ ພັນທະທິດແມ່ນວຽກງານເກີນຂອບເຂດໄດ້ຮັບການອະນຸດຍາດ.