(vovworld) – ວັນທີ 14/08, ກຸ່ມບັນດາລັດຖະມົນຕີວ່າການກະຊວງການເງິນ ສັງກັດພາກພື້ນນຳໃຊ້ສະກຸນເງິນລວມ ເອີລົບ (Eurozone) ໄດ້ເຫັນດີຮັບຮອງເອົາບ້ວງເງິນກູ້ຊ່ວຍດ້ານການເງິນທີ 3 ໃຫ້ເກຼັກ, ດ້ວຍຍອດມູນຄ່າອາດຈະຂຶ້ນເຖິງ 86 ຕື້ເອີໂຣ. ຂໍ້ຕົກລົງນີ້ຖືກຍົກອອກມາ ພາຍຫຼັງກອງປະຊຸມທີ່ແກ່ຍາວເປັນເວລາ 6 ຊົ່ວໂມງຂອງບັນດາລັດຖະມົນຕີວ່າການກະຊວງການເງິນ. ກ່າວຄຳເຫັນພາຍຫຼັງກອງປະຊຸມ, ທ່ານປະທານຄະນະກຳມະການເອີລົບ (EC) Jean Claude Juncker ໃຫ້ຮູ້ວ່າ, ບ້ວງເງິນກູ້ຊ່ວຍໃໝ່ມີມູນຄ່າ 86 ຕື້ເອີໂຣ ສະຫງວນໃຫ້ເກຼັກ ໃນຮອບເວລາ 3 ປີຈະມາເຖິງ. ເພື່ອແລກເອົາບ້ວງເງິນກູ້ຊ່ວຍດັ່ງກ່າວ, ເກຼັກ ຕ້ອງປະຕິບັດບັນດາມາດຕະການປະຕິຮູບດ້ານເສດຖະກິດຄືດັ່ງໃຫ້ຄຳໝັ້ນສັນຍາແລ້ວ, ເຖິງວ່າ ບັນດາຄຳໝັ້ນສັນຍາປະຕິຮູບນີ້ຕ້ອງໃຊ້ເວລາດົນນານຈຶ່ງບັນລຸໄດ້ຄືດັ່ງຄວາມຫວັງ. ການປ່ອຍເງິນຄັ້ງທຳອິດຈະດຳເນີນໄປໃນສັບປະດາໜ້າ, ອາດຈະຂຶ້ນເຖິງ 13 ຕື້ເອີໂຣ.
ບ້ວງເງິນກູ້ຊ່ວຍນີ້ໄດ້ຮັບການຮັບຮອງເອົາ ພາຍຫຼັງທີ່ສະພາແຫ່ງຊາດເກຼັກ ຮັບຮອງເອົາຮ່າງກົດໝາຍກ່ຽວກັບບ້ວງເງິນກູ້ຊ່ວຍ ໃນວັນດຽວກັນ. ຮ່າງກົດໝາຍດັ່ງກ່າວຈະຈັດວາງບັນດາມາດຕະການຮັດເຂັມຂັດທີ່ບໍ່ເຄີຍມີມາກ່ອນ ກ່ຽວກັບການຫຼຸດຜ່ອນລາຍຈາຍຂອງລັດ ແລະ ເພີ່ມພາສີອາກອນ ເຊິ່ງ Athens ຕ້ອງປະຕິບັດ.