(vovworld) - ທີ່ວາລະອັດກອງປະຊຸມສຸດຍອດສະພາຫະພາບເອີລົບ - ອາເມລິກາລາຕິນ ແລະ ເຂດກາຣີເບ (EU - CELAC) ວັນທີ 11/06 ຢູ່ບຣຸກແຊນ, ປະເທດແບນຊິກ, ຄະນະກຳມະການເອີລົບ ໄດ້ແຈ້ງໃຫ້ຊາບກ່ຽວກັບບ້ວງເງິນໜູນຊ່ວຍໃໝ່ທີ່ມີມູນຄ່າ 230 ລ້ານເອີໂລ ເພື່ອແນໃສ່ຊຸກຍູ້ການພັດທະນາແບບຍືນຍົງຢູ່ພາກພື້ນນີ້. ກ່າວຄຳເຫັນຕໍ່ວົງການນັກຂ່າວ, ທ່ານປະທານຄະນະກຳມະການເອີລົບ (EC) Jean Claude Juncker ເນັ້ນໜັກວ່າ, ຍາມໃດ EU ກໍ່ເອົາໃຈໃສ່ໜູນຊ່ວຍຊຸກຍູ້ວິວັດທະນາການພັດທະນາແບບຍືນຍົງຢູ່ພາກພື້ນ CELAC. ພ້ອມກັບບ້ວງເງິນໜູນຊ່ວຍໃຫ້ການລົງທຶນ ແລະ ວິສາຫະກິດເຊິ່ງໄດ້ປະກາດກ່ອນໜ້ານັ້ນແລ້ວ, ຍອດບ້ວງເງິນໜູນຊ່ວຍຂອງ EU ທີ່ສະຫງວນໃຫ້ພາກພື້ນ CELAC ຢູ່ກອງປະຊຸມຄັ້ງນີ້ໄດ້ເພີ່ມຂຶ້ນເຖິງ 700 ລ້ານເອີໂລ. Bolivia, Honduras ແລະ Colombia ແມ່ນບັນດາປະເທດໄດ້ຮັບການໜູນຊ່ວຍຫຼາຍກວ່າໝູ່. ນອກຈາກນັ້ນ, ໃນຖະແຫຼງການຮ່ວມສິ້ນສຸດກອງປະຊຸມ EU – CELAC ເປັນເວລາ 2 ວັນຢູ່ບຣຸກແຊນ, EU ແລະ ບັນດາປະເທດໃນພາກພື້ນອາເມລິກາລາຕິນ ແລະ ກາຣີເບ ໄດ້ຮຽກຮ້ອງໃຫ້ອາເມລິກາ ຍົກເລີກຄຳສັ່ງຂວ້ຳບາດທີ່ແກ່ຍາວຫຼາຍທົດສະວັດຜ່ານມາສຳລັບກຸຍບາ.