(vovworld) – ສະຫະສະມາຄົມປຸງແຕ່ງ ແລະ ສົ່ງອອກສິນໃນນ້ຳ ຫວຽດນາມ (ຫຼື VASEP) ຫາກໍ່ຮຽກຮ້ອງໃຫ້ກະຊວງການຄ້າ ອາເມລິກາ (DOC) ຈົ່ງພິຈາລະນາລະອຽດວິວັດການສືບສວນ ແລະ ຈັດວາງອັດຕາພາສີຕ້ານການຂາຍບຸບລາຄາໃນການພິຈາລະນາດ້ານບໍລິຫານບົນຈິດໃຈເຄົາລົບ, ປະຊາທິປະໄຕເພື່ອສິດຜົນປະໂຫຍດຂອງຜູ້ອຸປະໂພກບໍລິໂພກ ອາເມລິກາ. ກໍ່ຄືຊີວິດການເປັນຢູ່ຂອງປະຊາຊົນນັບລ້ານຄົນທີ່ຂຶ້ນກັບຂະແໜງຜະລິດ, ປຸງແຕ່ງປາຈາເຂດທົ່ງພຽງແມ່ນ້ຳຂອງ ແລະ ສາຍພົວພັນທາງດ້ານການຄ້າລະຫວ່າງ 2 ປະເທດ. ຕາມ VASEP ແລ້ວ, ສະພາບຕົວຈິງສະແດງໃຫ້ເຫັນວ່າ ເລື່ອງສົ່ງອອກປາຈາ ຫວຽດນາມ ເຂົ້າ ອາເມລິກາ ບໍ່ໄດ້ນາບຂູ່ເຖິງຂະແໜງອຸດສາຫະກຳປາໜັງ ອາເມລິກາ ຫາກກົງກັນຂ້າມໄດ້ສ້າງວຽກເຮັດງານທຳໃຫ້ຂະແໜງດຳເນີນທຸລະກິດບັນດາຜະລິດຕະພັນປາຈາ ຫວຽດນາມ, ພ້ອມທັງນຳມາເຊິ່ງຜະລິດຕະພັນທີ່ມີຄຸນນະພາບດີດ້ວຍລາຄາເໝາະສົມ ແລະ ຮັບປະກັນແຫຼ່ງສະໜອງເປັນປົກກະຕິໃຫ້ແກ່ຜູ້ບໍລິໂພກ ອຸປະໂພກ ອາເມລິກາ.
ກ່ອນໜ້ານັ້ນ, ວັນທີ 31/3/2014, DOC ໄດ້ປະກາດໝາກຜົນສຸດທ້າຍຂອງການພິຈາລະນາດ້ານບໍລິຫານພາສີຕ້ານການຂາຍບຸບລາຄາ (CBPG) ຄັ້ງທີ 9 ໄລຍະແຕ່ 1/8/2011 – 31/7/2012 (POR 9) ສຳລັບປາຈາແຊເຢັນທີ່ຖືກນຳເຂົ້າຈາກ ຫວຽດນາມ. DOC ຍັງຮັກສາທັດສະນະ ເລືອກເຟັ້ນ ອິນໂດເນເຊຍ ເປັນພື້ນຖານເພື່ອຄິດໄລ່ມຸນຄ່າ ເຖິງວ່າເສດຖະກິດຂອງປະເທດນີ້ບໍ່ຄືກັນກັບຢູ່ ຫວຽດນາມ ຍ້ອນລາຄາແນວພັນສັດລ້ຽງ, ຫົວອາຫານ... ລ້ວນແຕ່ສູງກ່ວາເມື່ອທຽບໃສ່ຫວຽດນາມ.