(vovworld) - ຕອນເຊົ້າວັນທີ 13/01, ຢູ່ສູນກະຈາຍສຽງແຫ່ງຊາດ 58 ກວານຊື໋, ຮ່າໂນ້ຍ, ໄດ້ດຳເນີນພິທີລົງນາມໃນຂໍ້ຕົກລົງຮ່ວມມືກ່ຽວກັບການແລກປ່ຽນຂໍ້ມູນ ແລະ ວັດທະນະທຳລະຫວ່າງວິທະຍຸກະຈາຍສຽງຫວຽດນາມ (VOV) ແລະ ວິທະຍຸກະຈາຍສຽງແຫ່ງຊາດອິນໂດເນເຊຍ (RRI). ຕາມຂໍ້ຕົກລົງທີ່ໄດ້ຮັບການລົງນາມລະຫວ່າງຜູ້ອຳນວຍການໃຫຍ່ VOV ຫງວຽນດັງຕ໋ຽນ ແລະ ປະທານ RRI ທ່ານນາງ Rosarita Niken Widiastut ແລ້ວ, VOV ແລະ RRI ຈະເພີ່ມທະວີການແລກປ່ຽນດ້ານຂໍ້ມູນຂ່າວສານ ແລະ ວັດທະນະທຳ, ເພື່ອແນໃສ່ຊຸກຍູ້ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ເພີ່ມທະວີການພົວພັນມິດຕະພາບລະຫວ່າງປະຊາຊົນ 2 ປະເທດຜ່ານການຮ່ວມມືໃນຂົງເຂດໂຄສະນາສື່ສານ. ກ່າວຄຳເຫັນທີ່ພິທີລົງນາມ. ຜູ້ອຳນວຍການໃຫຍ່ VOV ຫງວຽນດັງຕ໋ຽນ ເນັ້ນໜັກວ່າ:
“ດ້ວຍການລົງນາມໃນຂໍ້ຕົກລົງຮ່ວມມືດັ່ງກ່າວ, ພວກເຮົາສາມາດເຊື່ອໝັ້ນ ແລະ ຢັ້ງຢືນບາດກ້າວພັດທະນາໃໝ່ທີ່ມີຄວາມໝາຍ, ເພື່ອແນໃສ່ສ້າງກອບກົດໝາຍທີ່ໝັ້ໜຄົງເຂັ້ມແຂງໃຫ້ການພົວພັນຮ່ວມມືມິດຕະພາບລະຫວ່າງ 2 ອົງການສື່ສານຂອງ 2 ປະເທດຢ່າງແໜ້ນແຟ້ນ. ເລື່ອງລົງນາມໃນຂໍ້ຕົກລົງໄດ້ປະກອບສ່ວນຕັ້ງໜ້າເຂົ້າໃນການຊຸກຍູ້ການພົວພັນຕ່າງປະເທດລະຫວ່າງ 2 ປະເທດ, ພ້ອມທັງປະກອບສ່ວນເຂົ້າໃນການພັດທະນາຂອງສະຫະສະມາຄົມກະຈາຍສຽງອາຊີ - ປາຊີຝິກ ABU ຢ່າງຕັ້ງໜ້າ.”
ສ່ວນທ່ານນາງປະທານ RRI Rosarita Niken Widiastut ໄດ້ຢືນຢັນວ່າການເພີ່ມທະວີການຮ່ວມມືກັບ VOV ແມ່ນໜ້າທີ່ຂອງ RRI ດ້ວຍບົດບາດແມ່ນອົງການກະຈາຍສຽງແຫ່ງຊາດຂອງອິນໂດເນເຊຍ.
“ການຮ່ວມມືລະຫວ່າງ RRI ແລະ VOV ຜ່ານການລົງນາມໃນບົດບັນທຶກຊ່ວຍຈຳມື້ນີ້ ແມ່ນບາດກ້າວຄຳຄັນ, ຂີດໝາຍຂອງຄວາມມານະພະຍາຍາມຂອງພວກເຮົາໃນການປະກອບສ່ວນໃຫ້ຊົນຊາດ ແລະ ປະເທດຊາດ. ຜ່ານໂຄງການຮ່ວມມືດັ່ງກ່າວ, ພວກເຮົາສາມາດພ້ອມກັນແລກປ່ຽນບົດຮຽນ ແລະ ຍົກສູງດ້ານວິຊາການ, ວິໄສທັດຂອງບັນດາວິທະຍຸກະຈາຍສຽງພາກພາສາຕ່າງປະເທດເຊິ່ງກັນ ແລະ ກັນ. ການຮ່ວມມືດັ່ງກ່າວ ໄດ້ກາຍເປັນໜຶ່ງໃນບັນດາສິ່ງສຳຄັນໃນການຮ່ວມມືລະຫວ່າງ 2 ຊາດພວກເຮົາ, ຊ່ວຍໃຫ້ 2 ຊາດໃຫ້ນັບມື້ນັບໃກ້ຊິດຕິດພັນກວ່າ.”