ກູບາປະກາດແຜນການສັງລວມເພື່ອຮັບມືກັບEbola
ສຳພັນທະມິດ ALBA ຈັດກອງປະຊຸມຢູ່ Havana, Cuba ເພື່ອປຶກສາຫາລືມາດຕະການຮັບມືກັບໂລກພະຍາດ Ebola ໃນວັນທີ 20/10.
(ພາບ: AFP/TTXVN)
(vovworld) – ວັນທີ 29/10, ກູບາ ໄດ້ປະກາດແຜນການຮອບດ້ານສະກັດກັ້ນ ແລະ ຮັບມືກັບໂລກພະຍາດ Ebola. ກ່າວຄຳເຫັນທີ່ກອງປະຊຸມກັບບັນດານັກຊ່ຽວຊານສາທາລະນາສຸກທີ່ມາຈາກ 30 ປະເທດ, ເຊິ່ງດຳເນີນໄປຢູ່ນະຄອນຫຼວງ La Habana, ທ່ານລັດຖະມົນຕີຊ່ວຍວ່າການຜູ້ທີ່ໜຶ່ງກະຊວງສາທາລະນະສຸກ ກູບາ Jose Angel Portal ໃຫ້ຮູ້ວ່າ: ຍຸດທະສາດຮັບມືກັບໂລກພະຍາດ Ebola ຂອງ ກູບາ ລວມມີ: ເພີ່ມທະວີການກວດກາຢູ່ບັນດາດານຊາຍແດນ, ກວດກາບັນດານັກທ່ອງທ່ຽວ, ພິເສດແມ່ນບັນດາຜູ້ມາຈາກບັນດາເຂດຖືກຜົນສະທ້ອນຈາກໂລກພະຍາດ. ຄຽງຄູ່ກັນນັ້ນ, ບັນດາມາດຕະການສະກັດກັ້ນກໍ່ໄດ້ນຳໃຊ້ທັງຢູ່ບ່ອນເຮັດວຽກ ແລະ ບັນດາສະຖານທີ່ສາທາລະນະ. ຕາມທ່ານ Jose Angel Portal ແລ້ວ, ເພື່ອປະຕິບັດແຜນການດັ່ງກ່າວຢ່າງຄົບຊຸດ, ກູບາ ຕ້ອງສົມທົບລະຫວ່າງກະຊວງສາທາລະນະສຸກ, ອົງການປ້ອງກັນພົນລະເຮືອນ ແລະ ອົງການສະເພາະກິດອື່ນໆ. ບົນພື້ນຖານນັ້ນ, ກູບາ ໄດ້ສ້າງຕັ້ງກຸ່ມເຮັດວຽກດ້ວຍໜ້າທີ່ຕິດຕາມກວດກາສະພາບການໂລກພະຍາດໃນລະດັບຊາດ ແລະ ໂລກ.