ກຸ່ມຜູ້ຊ່ຽວຊານເຄມີ ສາກົນທີ 2 ໄປຮອດຊີຣີ
(ພາບ: baotintuc.vn)
(vovworld)- ວັນທີ 10/10, ຜູ້ຊ່ຽວຊານເຄມີສາກົນຕື່ມອີກ 12 ທ່ານໄດ້ເດີນທາງມາຮອດນະຄອນຫຼວງ Damacus ເພື່ອໜູນຊ່ວຍວຽກງານທຳລາຍອາວຸດເຄມີຂອງອຳນາດການປົກຄອງຊີຣີ ອັນໄດ້ຍົກຈຳນວນຄົນໃນອົງການຫ້າມອາວຸດເຄມີ (OPCW) ຢູ່ຊີຣີຂຶ້ນເຖິງ 27 ຄົນ.
ຜູ້ນຳກຸ່ມທຳລາຍອາວຸດເຄມີຊີຣີ, ທ່ານ Ahmet Uzumcu ເນັ້ນໜັກເຖິງການ ຫລຸດຜ່ອນອາວຸເຄມີແມ່ນເພື່ອຜົນປະໂຫຍດລວມຂອງທຸກໆຄົນ. ຂັ້ນຕອນການທຳລາຍອາວຸດເຄມີຕ້ອງໄດ້ຮັບການປະຕິບັດຢ່າງເຂັ້ມງວດທີ່ສຸດ.
ຕາມການຕີລາຄາແລ້ວ, ປະຈຸບັນ, ຊີຣີ ມີອາວຸດເຄມີກ່ວາ 1 ພັນໂຕນ, ໃນນັ້ນມີຫຼາຍທາດພິດເຄມີພວມໄດ້ຮັບການຮັກສາໄວ້ຢູ່ສະຖານທີ່ນັບສີບແຫ່ງໃນທົ່ວປະເທດ. ຕາມແຜນການແລ້ວ, ການທຳລາຍສາງອາວຸດເຄມີນີ້ຈະສຳເລັດໃນກາງປີ 2014.
ສະພາຄວາມໝັ້ນຄົງ ສປຊ ເຫັນດີກັບແຜນການທຳລາຍບັນດາສາງອາວຸດເຄມີຢູ່ຊີຣີ
ໃນວັນທີ 10/10 ດຽວກັນນີ້, ສະພາຄວາມໝັ້ນຄົງ ສປຊ ໄດ້ຮັບຮອງເອົາແຜນການໂດຍທ່ານເລຂາທິການໃຫ່ຍ ສປຊ Ban Ki Moon ສະເໜີເພື່ອແນໃສ່ທຳລາຍບັນດາສາງອາວຸດເຄມີຢູ່ຊີຣີ. ກ່າວຄຳເຫັນພາຍຫຼັງການປະຊຸມລັບ, ທ່ານເອກອັກຄະລັດຖະທູດອັງກິດ ແລະ ລັດເຊຍ ໃຫ້ຮູ້ວ່າ: 15 ປະເທດສະມາຊິກປະຈຳ ສະພາຄວາມໝັ້ນຄົງ ສປຊ ໄດ້ຮັບຮອງເອົາແຜນການຂອງທ່ານ Ban Ki Moon, ສ້າງຕັ້ງຄະນະຜູ້ແທນລວມຂອງອົງການຫ້າມອາວຸດເຄມີ ແລະ ສປຊ ເພື່ຶອແນໃສ່ ທຳລາຍບັນດາສາງອາວຸດເຄມີຢູ່ຊີຣີ ແລະ ຂໍ້ສະເໜີນີ້ຈະຖືກຍື່ນຕໍ່ປະທານສະພາ ຄວາມໝັ້ນຄົງ ສປຊ ເພື່ອຮັບຮອງເອົາໂດຍໄວ.