(vovworld) – ຕອນເຊົ້າວັນທີ 9/9, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ຟ້າມບິ່ງມິງ ໄດ້ມອບຫຼຽນໄຊແຮງງານຊັ້ນໜຶ່ງ ໃຫ້ແກ່ກົມ ອາຊຽນ, ສັງກັດກະຊວງການຕ່າງປະເທດ ຫວຽດນາມ. ກົມອາຊຽນ ໄດ້ຮັບການຈັດຕັ້ງໃນວັນທີ 7/9/1994 ແລະ ໃນເວລາ 20 ປີຜ່ານມາ, ກົມ ອາຊຽນ ມີການປະກອບສ່ວນແທດຈິງ ແລະ ສຳຄັນເຂົ້າໃນການສ້າງສາ ແລະ ປົກປັກຮັກສາປະເທດຊາດ, ເປັນເສນາທິການ, ສະເໜີແນະບັນດາແຜນນະໂຍບາຍ, ຍຸດທະສາດຂອງ ຫວຽດນາມ ເຂົ້າຮ່ວມ ອາຊຽນ, ຕັ້ງໜ້າຊຸກຍູ້ການຮ່ວມມື ອາຊຽນ, ປະກອບສ່ວນຢ່າງຕັ້ງໜ້າເຂົ້າໃນການສ້າງກຳນົດທິດໃຫຍ່ ແລະ ອະນາຄົດຂອງປະຊາຄົມ ອາຊຽນ..., ປະກອບສ່ວນສ້າງສະພາບແວດລ້ອມສາກົນສະດວກໃຫ້ແກ່ການຜັນຂະຫຍາຍນະໂຍບາຍ ແລະ ບັນດາການເຄື່ອນໄຫວພົວພັນຕ່າງປະເທດ, ເຊື່ອມໂຍງເຂົ້າກັບສາກົນ. ກົມກໍ່ປະຕິບັດພາລະໜ້າທີ່ຂອງຄະນະເລຂາອາຊຽນ ແຫ່ງຊາດ ເປັນຢ່າງດີ, ປະສານງານ, ສົມທົບ ແລະ ໜູນຊ່ວຍບັນດາກະຊວງ, ຂະແໜງການ, ທ້ອງຖີ່ນເຂົ້າຮ່ວມອາຊຽນ, ຜ່ານນັ້ນເສີມຂະຫຍາຍບົດບາດນັບມື້ນັບສູງຂອງ ຫວຽດນາມ ໃນພາກພື້ນ ແລະ ສາກົນ. ພິເສດ, ໄລຍະ 2009 – 2013, ກົມໄດ້ປະກອບສ່ວນຕັ້ງໜ້າເຂົ້າໃນຜົນສຳເລັດຂອງ ອາຍຸການເປັນປະທານ ອາຊຽນ ປີ 2010 ດ້ວຍ 2 ຂໍ້ລິເລີ່ມສຳຄັນແມ່ນເປີດກ້ວາງຂັ້ນສູງ ອາຊີ ຕາເວັນອອກ (EAS) ແລະ ຈັດຕັ້ງກົນໄກເປັນປະຈຳ, ປະຕິບັດສຳເລັດບົດບາດປະສານງານໃນການພົວພັນ ອາຊຽນ - ຈີນ.
ກ່າວຄຳເຫັນທີ່ພິທີ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ ຫວັງວ່າ ກົມສືບຕໍ່ມີບັນດາການປະກອບສ່ວນອັນໃຫຍ່ຫຼວງກ່ວາອີກ, ພິເສດແມ່ນໃນສະພາບການ ອາຊຽນ ຈະກາຍເປັນປະຊາຄົມໃນປີ 2015.