ທ່ານນາຍົກລັດຖະມົນຕີ ຫງວຽນຊວນຟຸກ ກ່າວຄຳເຫັນໄຂກອງປະຊຸມ
|
(vovworld) – ຕອນເຊົ້າວັນທີ 26/10, ຢູ່ຮ່າໂນ້ຍ, ໄດ້ຈັດຕັ້ງພິທີໄຂກອງປະຊຸມຂັ້ນສູງຮ່ວມມື ກຳປູເຈຍ - ລາວ - ມຽນມາ - ຫວຽດນາມ ຄັ້ງທີ 8 (CLMV 8) ແລະ ກອງປະຊຸມຂັ້ນສູງຍຸດທະສາດແມ່ນ້ຳ 3 ສາຍອາເຢຢາວາດີ -ເຈົ້າພະຍາ -ແມ່ຂອງ ຄັ້ງທີ 7 (ACMECS 7). ກ່າວຄຳເຫັນໄຂກອງປະຊຸມ, ທ່ານນາຍົກລັດຖະມົນຕີ ຫງວຽນຊວນຟຸກ ຖືວ່າ: ບັນດາກອງປະຊຸມນີ້ເພື່ອແນໃສ່ປຶກສາຫາລືກ່ຽວກັບສະພາບແວດລ້ອມແຫ່ງການພັດທະນາໃໝ່, ຍົກອອກບັນດາມາດຕະການເພື່ອສ້າງເຂດເສດຖະກິດ ຂະຫຍັນຂັນເຄື່ອນ, ແກ່ງແຍ້ງ, ພັດທະນາແບບຍືນຍົງ ແລະ ທົ່ວເຖິງ. ທ່ານນາຍົກລັດຖະມົນຕີ ຊີ້ແຈ້ງວ່າ: ພາຍຫຼັງເຄື່ອນໄຫວເປັນເວລາໜຶ່ງທົດສະວັດ, ການຮ່ວມມືກຳປູເຈຍ - ລາວ - ມຽນມາ - ຫວຽດນາມ ແລະ ການຮ່ວມມືຍຸດທະສາດ ແມ່ນ້ຳ 3 ສາຍ ອາເຢຢາວາດີ -ເຈົ້າພະຍາ -ແມ່ຂອງ ບັນລຸໄດ້ຫຼາຍໝາກຜົນສຳຄັນ, ປະກອບສ່ວນຊຸກຍູ້ການພັດທະນາເສດຖະກິດ - ສັງຄົມຂອງແຕ່ລະປະເທດ, ປະກອບສ່ວນເຂົ້າໃນວິວັດທະນາການສ້າງປະຊາຄົມ ອາຊຽນ, ປັບປຸງການພົວພັນຖານບ້ານໃກ້ເຮືອນຄຽງອັນດີງາມ, ສັນຕິພາບ ແລະ ສະຖຽນລະພາບຂອງພາກພື້ນ. ບັນດາປະເທດແມ່ຂອງໄດ້ກາຍເປັນກຳລັງໜູນສຳຄັນຂອງເສດຖະກິດ ອາຊີ ຕາເວັນອອກສ່ຽງໃຕ້. ທ່ານນາຍົກລັດຖະມົນຕີ ຖືວ່າ: ໝາກຜົນນັ້ນສະແດງໃຫ້ເຫັນຄວາມຕັດສິນໃຈ ແລະ ຄວາມມານະພະຍາຍາມຂອງ 5 ປະເທດ ແລະ ກໍ່ແມ່ນໝາກຜົນແຫ່ງຄວາມມານະພະຍາຍາມອັນໃຫຍ່ຫຼວງ, ການຮ່ວມມືມີປະສິດທິຜົນຂອງບັນດາຄູ່ຮ່ວມມືພັດທະນາ, ບັນດານັກອຸປະຖຳສາກົນ, ພິເສດແມ່ນ ອາຊຽນ:
“ພວກເຮົາພວມຢື່ນຕໍ່ໜ້າບັນດາກະລະໂອກາດພັດທະນາທີ່ສະດວກໃຫ້ແກ່ການພັດທະນາຂອງ CLMV ແລະ ACMECS. ໃນບັນດາກອງປະຊຸມ ມື້ນີ້, ພວກເຮົາຈະພ້ອມກັນປຶກສາຫາລືກ່ຽວກັບສະພາບແວດລ້ອມແຫ່ງການພັດທະນາໃໝ່ ແລະ ເປັນເອກະພາບບັນດາເນື້ອໃນ ແລະ ມາດຕະການຮ່ວມມືເພື່ອສ້າງເຂດເສດຖະກິດຂະຫຍັນຂັນເຄື່ອນ, ແກ່ງແຍ້ງ, ພັດທະນາແບບຍືນຍົງ ແລະ ທົ່ວເຖິງ. ລັດຖະບານ ຫວຽດນາມ ຖືການຮ່ວມມື CLMV ແລະ ACMECS ເປັນສຳຄັນ, ພ້ອມແລ້ວທີ່ຈະສົມທົບກັບບັນດາປະເທດສະມາຊິກ ກໍ່ຄືບັນດາຄູ່ຮ່ວມມືພັດທະນາ, ເພື່ອສັນຕິພາບ, ສະຖຽນລະພາບ, ການພັດທະນາແບບຍືນຍົງ ແລະ ຄວາມວັດທະນາຖາວອນລວມຂອງພາກພື້ນ.”