(ພາບ:baomoi.com)
(VOV)- ວັນທີ 25/10, ກອງທັບຊີຣີ ປະກາດຈະເຫັນດີກັບຂໍ້ຕົກລົງຢຸດຍິງໃນເວລາ 4 ວັນເນື່ອງໃນກາດງານບຸນສັກກະລະບູຊາ Eid al Adha ຂອງຊາວມຸດສະລິມ ຕາມຂໍ້ລິເລີ່ມຂອງທ່ານ Brahimi ທູດພິເສດລວມຂອງ ສປຊ ແລະ ສະຫະພາບອາຣັບ. ໃນບົດຖະແຫຼງທາງໂທລະພາບຊີຣີ, ກອງທັບປະເທດນີ້ຢັ້ງຢືນວ່າບັນດາບັ້ນຮົບການທະຫານຈະຖືກຢຸດຕິຊົ່ວຄາວນັບແຕ່ຕອນເຊົ້າຂອງວັນທີ 26/10 ຈົນຮອດວັນທີ 29/10. ແຕ່ກອງທັບຊີຣີ ຍັງຮັກສາສິດໂຕ້ຕອບຄືນຖ້າຫາກວ່າບັນດາກຸ່ມກຳລັງປະກອບອາວຸດຝ່າຍຄ້ານສືບຕໍ່ບຸກໂຈມຕີສາມັນຊົນ ແລະ ກຳລັງລັດຖະບານ. ກ່ອນທີ່ຂໍ້ຕົກລົງຢຸດຍິງດັ່ງກ່າວມີຜົນສັກສິດເປັນເວລາ 1 ວັນ, ວັນທີ 25/10, ຍັງໄດ້ເກີດການປະທະກັນຢ່າງດຸເດືອດລະຫວ່າງກອງທັບລັດຖະບານ ແລະ ກຳລັງຝ່າຍຄ້ານຕ້ານຊີຣີ ດ້ວຍຈຸດເຄັ່ງຮ້ອນແມ່ນສະໜາມຮົບຢູ່ Aleppo ທາງພາກເໜືອປະເທດນີ້. ກຳລັງຝ່າຍຄ້ານໄດ້ບຸກເຂົ້າເມືອງ Ashrafiyeh ຂອງຊາວເກີດ ຂຶ້ນກັບນະຄອນ Aleppo ເຮັດໃຫ້ສາມັນຊົນ 9 ຄົນເສຍຊີວິດ ແລະ ອີກ 15 ຄົນຖືກບາດເຈັບ.
ຕໍໜ້າເຫດການນີ້, ຫາງສຽງໄດ້ສະແດງຄວາມຊົມເຊີຍຕໍ່ຂໍ້ຕົກລົງຢຸດຍິງດັ່ງກ່າວຢູ່ຊີຮີ. ທ່ານເລຂາທິການໃຫຍ່ສະຫະປະຊາຊາດ Ban Ki moon ຊົມເຊີຍບັນດາຝ່າຍເຂົ້າຮ່ວມການສູ້ຮົບຢູ່ ຊີຮີ ໄດ້ເຫັນດີຢຸດຍິງໃນໂອກາດງານບຸນ Eid al-Adha ເປັນເວລາ 4 ວັນ, ເລີ່ມແຕ່ວັນທີ 26/10, ທ່ານ Martin Nesirky ໂຄສົກຂອງສະຫະປະຊາຊາດເນັ້ນໜັກວ່າ, ”ສິ່ງສຳຄັນແມ່ນທຸກຝ່າຍໄດ້ປະຕິບັດຂໍ້ຕົກລົງຢຸດຍິງ” ຕາມຂໍ້ລິເລີ່ມຂອງທູດພິເສດລວມສະຫະປະຊາຊາດ - ສະຫະພັນອາຮັບ.
ໃນຂະນະນັ້ນ, ໂຄສົກກະຊວງການຕ່າງປະເທດລັດເຊຍ ກໍ່ຕີລາຄາວ່າອຳນາດການປົກຄອງ ຊີຮີ ໄດ້ຢັ້ງຢືນພ້ອມແລ້ວທີ່ຈະຮ່ວມມື ເພື່ອມຸ້ງໄປເຖິງການຢຸດຕິສະພາບນອງເລືອດຢູ່ປະເທດຕາເວັນອອກກາງນີ້, ເປີດຊ່ອງທາງໃຫ້ມາດຕະການດ້ານການເມືອງ ເພື່ອແກ້ໄຂວິກິດການຜ່ານການເຈລະຈາຢ່າງຮອບດ້ານ.
ອາເມລິກາ ກໍ່ຊົມເຊີຍຂໍ້ຕົກລົງຢຸດຍິງ, ໂຄສົກກະຊວງການຕ່າງປະເທດອາເມລິກາ ສະແດງຄວາມຫວັງວ່າຂໍ້ຕົກລົງຢຸດຍິງໃນໂອກາດງານບຸນຂອງຊາວມຸດສະລິນນີ້ຈະສ້າງເງື່ອນໄຂໃຫ້ບັນດາຄວາມມານະພະຍາຍາມຊອກຫາວິວັດການມອບໂອນສິດອຳນາດດ້ານການເມືອງຢູ່ຊີຮີ.