(vovworld) – ວັນທີ 5/8, ສະເຫຼີມສະຫຼອງ 50 ປີແຫ່ງວັນມູນເຊື້ອໄດ້ຮັບໄຊຊະນະຄັ້ງທຳອິດຂອງກອງທັບເຮືອປະຊາຊົນ ຫວຽດນາມ. ນີ້ແມ່ນເຫດການທີ່ມີຄວາມໝາຍການເມືອງອັນໃຫຍ່ຫຼວງ, ສະແດງໃຫ້ເຫັນກຳລັງແຮງທາງດ້ານການເມືອງ - ນ້ຳໃຈຂອງທົ່ວປວງຊົນ, ທັງຊາດແມ່ນໄຊຊະນະຂອງເຈດຈຳນົງຕັດສິນໃຈຕໍ່ສູ້, ຍາດເອົາໄຊຊະນະ, ຕໍ່ສູ້ເພື່ອປົກປັກຮັກສາປະເທດຊາດຕໍ່ໜ້າທຸກໆອິດທິກຳລັງທີ່ເປັນປໍລະປັກ.
ຕອບສຳພາດຕໍ່ນັກຂ່າວວິທະຍຸກະຈາຍສຽງ ຫວຽດນາມ, ພົນເຮືອຕີ ດິງຢາເທີດ, ກຳມະການການເມືອງເຫຼົ່າທັບເຮືອ ຫວຽດນາມ, ຢືນຢັນວ່າ: ບັນດາບົດຮຽນອັນລ້ຳຄ່າຈາກບັ້ນຮົບທຳອິດຂອງເຫຼົ່າທັບເຮືອຍັງຮັກສາຄຸນຄ່າເດີມເຖິງປະຈຸບັນ. ໂດຍເສີມຂະຫຍາຍບັນດາບົດຮຽນໃນອະດີດຕະການ, ນຳໃຊ້ເຂົ້າໃນພຶດຕິກຳຕົວຈິງແຫ່ງການສ້າງຕັ້ງ ແລະ ພັດທະນາ, ກອງທັບເຮືອປະຊາຊົນ ຫວຽດນາມ ຍາມໃດກໍ່ປະຕິບັດສຳເລັດພາລະໜ້າທີ່ເປັນກອງທະຫານຕໍ່ສູ້, ປະຕິບັດງານ, ທັງແມ່ນກອງທະຫານອອກແຮງງານທຳການຜະລິດ. ກຳລັງກອງທັບເຮືອຍາມໃດກໍ່ເສີມຂະຫຍາຍບົດບາດປະຈັນບານ, ຮັບປະກັນຄວາມໝັ້ນຄົງ, ເປັນບ່ອນອີງໃຫ້ຊາວປະມົງ ແລະ ບັນດາກຳລັງເສດຖະກິດອື່ນໆອີກ. ພ້ອມກັນນັ້ນ, ເຫຼົ່າທັບກໍ່ຜັນຂະຫຍາຍຫຼາຍຮູບແບບພັດທະນາເສດຖະກິດທະເລ, ດ້ວຍວິທີເຮັດໃໝ່, ນຳມາເຊິ່ງປະສິດທິຜົນ, ປະກອບສ່ວນປັບປຸງຊີວິດການເປັນຢູ່ຂອງທະຫານ, ພ້ອມທັງເປັນກຳລັງຫຼັກແຫຼ່ງ, ບ່ອນອີງຢ່າງໜັກແໜ້ນ, ຊ່ວຍເຫຼືອ, ປົກປ້ອງຊາວປະມົງເມື່ອໄປຫາປາໄກຝັ່ງ, ທັງຢືນຢັນອະທິປະໄຕ, ທັງເຂົ້າຮ່ວມການຕໍ່ສູ້ປົກປັກຮັກສາທະເລ, ໝູ່ເກາະຂອງ ປະເທດຊາດ. ໃນວຽກງານພົວພັນຕ່າງປະເທດ, ກອງທັບເຮືອ ຫວຽດນາມ ຕັ້ງໜ້າເພີ່ມທະວີການຮ່ວມມືກັບກອງທັບເຮືອບັນດາປະເທດໃນພາກພື້ນ ແລະ ໃນໂລກ ເພື່ອສ້າງກົນໄກຮ່ວມມືຫຼາຍຝ່າຍ, ຊຸກຍູ້ການພັດທະນາການພົວພັນມິດຕະພາບ, ຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ແບ່ງປັນບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ ແລະ ຮັກສາສັນຕິພາບ, ສະຖຽນລະພາບ, ຄວາມສະຫງົບ, ຄວາມປອດໄພໃນການເດີນທະເລຢູ່ທະເລຕາເວັນອອກ, ກໍ່ຄືພາກພື້ນ ອາຊີ - ປາຊີຟິກ.
ພົນເຮືອຕີ ດິງຢາເທີດ
ກ່ຽວກັບທິດທາງການເຄື່ອນໄຫວຂອງເຫຼົ່າທັບເຮືອ ໃນໄລຍະຈະມາເຖິງ, ພົນເຮືອຕີ ດິງຢາເທີດ, ໃຫ້ຮູ້ວ່າ:
“ກອງທັບເຮືອ ຫວຽດນາມ ສືບຕໍ່ສ້າງເຫຼົ່າທັບເຮືອທັນສະໄໝ, ເປັນກຳລັງຫຼັກແຫຼ່ງໃນພາລະກິດປົກປັກຮັກສາ ອະທິປະໄຕ, ຜືນແຜ່ນດິນອັນຄົບຖ້ວນ ທະເລ, ໝູ່ເກາະຂອງປະເທດຊາດຢ່າງແທດຈິງ. ຄຽງຄູ່ກັນນັ້ນ, ຍູ້ແຮງວຽກງານໂຄສະນາຢ່າງເລິກເຊິ່ງ, ກ້ວາງຂວາງໃນປະຊາຊົນທຸກຊັ້ນວັນນະ. ເຫຼົ່າທັບສືບຕໍ່ສົມທົບລະຫວ່າງບັນດາກຳລັງປະຕິບັດກົດໝາຍບົນທະເລເພື່ອແນໃສ່ຄຸ້ມຄອງເຂດທະເລ, ໝູ່ເກາະຂອງປະເທດຊາດຢ່າງແໜ້ນແຟ້ນ ແລະ ເພີ່ມທະວີການໜູນຊ່ວຍບັນດາການເຄື່ອນໄຫວຕ່າງໆຂອງປະຊາຊົນຜູ້ທຳມາຫາກິນບົນທະເລ.”