ຄວາມໄຝ່ຝັນຂອງເດັກທຸກຍາກແມ່ນໄດ້ໄປໂຮງຮຽນ
ພາບປະກອບ: internet
|
(vovworld) - ວັນທີ 24/9 ຢູ່ ຮ່າໂນ້ຍ, ກອງທຶນອະນຸຊົນ ສະຫະປະຊາຊາດ (UNICEF) ປະຈຳ ຫວຽດນາມ ໄດ້ສົມທົບກັບກະຊວງການເງິນ ຫວຽດນາມ ຈັດການປະຊຸມຂ່າວເນື່ອງໃນໂອກາດໄຂກອງປະຊຸມ ອາຊີ - ປາຊີຟີກ ກ່ຽວກັບການເງິນຂອງລັດ, ນະໂຍບາຍສັງຄົມ ແລະ ເດັກນ້ອຍ ແຕ່ວັນທີ 24 - 26/9/2012 ພາຍໃຕ້ຫົວຂໍ້ວ່າ: ແກ້ໄຂບັນຫາເດັກທຸກຍາກ ແລະ ຂາດຄວາມສະເຫມີພາບ ຜ່ານການລົງທຶນທີ່ມີຄຸນນະພາບໃຫ້ແກ່ເດັກນ້ອຍ. ກ່າວຄຳເຫັນທີ່ການປະຊຸມຂ່າວ, ທ່ານ Daniel Toole ຜູ້ອຳນວຍການ UNCEF ພາກພື້ນອາຊີ ປາຊີຟີກ ໄດ້ເນັ້ນຫນັກວ່າ: ພາກພື້ນ ອາຊີ - ປາຊີຟີກ ໄດ້ມີຄວາມກ້າວຫນ້າອັນໃຫຍ່ຫລວງເພື່ອປັບປຸງຄວາມເປັນຕາຍ, ສຸຂະພາບຂອງເດັກນ້ອຍກໍຄືສະພາບຄອບຄົວຂອງເດັກທຸກຍາກ. ປະຈຸບັນ ໂລກຖືວ່າ ອາຊີ ແມ່ນແບບຢ່າງແຫ່ງການພັດທະນາຢູ່ ແລະ ໂລກພວມລໍຖ້າການຫນູນຊ່ວຍ ແລະ ແຫລ່ງກຳລັງແຮງຈາກອາຊີ ເພື່ອສະຫນັບສະຫນູນແກ່ການພັດທະນາທົ່ວໂລກ. ທ່ານ Truong Chi Trung ຮອງລັດຖະມົນຕີກະຊວງການເງິນ ຫວຽດນາມ ໃຫ້ຮູ້ວ່າ: ກອງປະຊຸມຄັ້ງນີ້ ມີຜູ້ຕາງຫນ້າຂອງລັດຖະບານ 17 ປະເທດ ໃນພາກພື້ນ ອາຊີ - ປາຊີຟີກ ພ້ອມກັນປຶກສາຫາລືສາຍກ່ຽວພັນລະຫວ່າງການເງິນຂອງລັດ ແລະ ນະໂຍບາຍສັງຄົມ. ບັນດາຜູ້ແທນໄດ້ປຶກສາຫາລືມາດຕະການນຳໃຊ້ແຫລ່ງກຳລັງແຮງເພື່ອຮັດແຄບຊ່ອງຫວ່າງ ແລະ ຍົກສູງຄຸນນະພາບແຫລ່ງຊັບພະຍາກອນມະນຸດ ແລະ ປ້ອງກັນ ຕ້ານການທາລຸນເດັກນ້ອຍ.