ກອງປະຊຸມ ອາຊຽນ +3 ຍູ້ແຮງການຮ່ວມມືປ້ອງກັນ, ຕ້ານອາດຊະຍາກຳ
ກອງປະຊຸມລັດຖະມົນຕີ ອາຊຽນ +3 (ຈີນ, ຍີ່ປຸ່ນ, ສ ເກົາຫຼີ) ຄັ້ງທີ 6
(ພາບ: Hoàng Chương/Vietnam+)
(vovworld) – ຕອນເຊົ້າວັນທີ 18/9, ຢູ່ ວຽງຈັນ, ໄດ້ດຳເນີນກອງປະຊຸມລັດຖະມົນຕີ ອາຊຽນ +3 (ຈີນ, ຍີ່ປຸ່ນ, ສ ເກົາຫຼີ) ຄັ້ງທີ 6 ກ່ຽວກັບການປ້ອງກັນ, ຕ້ານອາດຊະຍາກຳຂ້າມຊາດ (AMMTC+3). ກອງປະຊຸມຢືນຢັນຄວາມຕັດສິນໃຈຮ່ວມມືຕໍ່ສູ້, ສະກັດກັ້ນບັນດາປະເພດອາດຊະຍາກຳຂ້າມຊາດຄື: ການຄ້າມະນຸດ, ຂາຍເຖື່ອນອາວຸດ, ຕ້ານການເຂົ້າເມືອງຜິດກົດໝາຍ, ຕ້ານອາດຊະຍາກຳເສດຖະກິດ, ອາດຊະຍາກຳຢາເສບຕິດ... ຝ່າຍຕ່າງໆກໍ່ໃຫ້ຄຳໝັ້ນສັນຍາເພີ່ມທະວີການແລກປ່ຽນຂໍ້ມູນຂ່າວ, ວຽກງານບຳລຸງສ້າງເພື່ອໃຫ້ການຮ່ວມມືປ້ອງກັນ, ຕ້ານອາດຊະຍາກຳຂ້າມຊາດບັນລຸປະສິດທິຜົນສູງກ່ວາ ຮັບປະກັນສັນຕິພາບ ແລະ ສະຖຽນລະພາບ ແລະ ການພັດທະນາໃນພາກພື້ນ, ປະກອບສ່ວນສ້າງປະຊາຄົມ ອາຊຽນ ແລະ ບັນດາພາກພື້ນ ອາຊີເໜືອ ສັນຕິພາບ, ສະຖຽນລະພາບ ແລະ ວັດທະນາຖາວອນ. ກ່າວຄຳເຫັນທີ່ກອງປະຊຸມ, ທ່ານລັດຖະມົນຕີກະຊວງຕຳຫຼວດ ຫວຽດນາມ ເຈີ່ນດ້າຍກວາງ, ຫົວໜ້າຄະນະຜູ້ແທນ ຫວຽດນາມ ໄດ້ຊີ້ແຈ້ງການຮ່ວມມືຕັ້ງໜ້າຂອງ ຫວຽດນາມ ກັບບັນດາອົງການປະຕິບັດກົດໝາຍ ຈີນ, ຍີ່ປຸ່ນ, ສ ເກົາຫຼີ, ປະຕິບັດຄຳໝັ້ນສັນຍາລະຫວ່າງ ອາຊຽນ ກັບ 3 ປະເທດຄູ່ເຈລະຈາກ່ຽວກັບການຕໍ່ສູ້ປ້ອງກັນ, ຕ້ານອາດຊະຍາກຳຂ້າມຊາດ. ທ່ານລັດຖະມົນຕີ ເຈີນດ້ານກວາງ ຫວັງວ່າ: ບັນດາຄຳໝັ້ນສັນຍາຮ່ວມມື ອາຊຽນ +3 ທີ່ໄດ້ຮັບການເຫັນດີເຫັນພ້ອມທີ່ກອງປະຊຸມຈະໄດ້ຮັບການຜັນຂະຫຍາຍຢ່າງຕັ້ງໜ້າຈາກຝ່າຍຕ່າງໆ, ສ້າງບາດກ້າວກະໂດດຂັ້ນໃນການຮ່ວມມືປ້ອງກັນ, ຕ້ານອາດຊະຍາກຳຂ້າມຊາດ, ຕອບສະໜອງຄວາມມຸ່ງມາດປາດຖະໜາຂອງປະຊາຊົນບັນດາປະເທດ ອາຊຽນ ແລະ ບັນດາຄູ່ຮ່ວມມື, ຄູ່ເຈລະຈາເພື່ອສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງ.