(vovworld) - ທ່ານນາຍົກລັດຖະມົນຕີຫວຽດນາມ Nguyen Tan Dung ຫາກໍຕົກລົງຫັນດີກັບຂໍ້ສະເໜີຂອງກະຊວງແຜນການ ແລະ ການລົງທຶນ ກ່ຽວກັບເລື່ອງຈັດຕັ້ງກອງປະຊຸມກຸ່ມທີ່ປຶກສາບັນດານັກອຸປະຖຳໃຫ້ແກ່ຫວຽດນາມ ຢ່າງເປັນທາງການ ໃນວັນທີ 10/12 ຈະມາເຖິງ ຢູ່ຮ່າໂນ້ຍ. ກ່ອນໜ້ານັ້ນ, ໃນເດືອນ 6 ຜ່ານມາ, ກອງປະຊຸມກາງສະໃໝກຸ່ມທີ່ປຶກສາບັນດານັກອຸປະຖຳໃຫ້ແກ່ຫວຽດນາມ ປີ 2012 ໄດ້ດຳເນີນຢູ່ນະຄອນ Dong Ha, ແຂວງ Quang Tri ດ້ວຍຫົວຂໍ້ວ່າ “ການເຈລະຈາກັບບັນດາແຂວງພາກກາງ”. ຜູ້ຕາງໜ້າ 14 ແຂວງທາງທິດເໜືອພາກກາງ ແລະ ເຂດແຄມທະເລພາກກາງ, ບັນດາອົງການຄຸ້ມຄອງ ແລະ ນັກອຸປະຖຳ ໄດ້ມີການເຈລະຈາ, ປຶກສາຫາລືກ່ຽວກັບສະພາບການ ແລະ ທິດຮ່ວມມືພັດທະນາໃໝ່, ທີ່ແຂງແຮງກວ່າໃນການໜູນຊ່ວຍພັດທະນາເສດຖະກິດສັງຄົມ, ຫຼຸດຜ່ອນຄວາມທຸກຍາກ ແລະ ຮັບມືກັບການປ່ຽນແປງຂອງດິນຟ້າອາກາດຢູ່ເຂດນີ້… ກອງປະຊຸມກຸ່ມທີ່ປຶກສາບັນດານັກອຸປະຖຳໃຫ້ແກ່ຫວຽດນາມ ແມ່ນເວທີປາໄສແລກປ່ຽນຄວາມເຫັນລະຫວ່າງລັດຖະບານຫວຽດນາມ ແລະ ປະຊາຄົມບັນດານັກອຸປະຖຳໃຫ້ແກ່ການພັດທະນາກ່ຽວກັບບັນດາບັນຫານະໂຍບາຍເສດຖະກິດ, ຍຸດທະສາສາດຫຼຸດຜ່ອນຄວາມທຸກຍາກ ແລະ ນຳໃຊ້ແຫຼ່ງທຶນ ODA ຢ່າງມີປະສິດທິຜົນ.