ພິທີລົງນາມໃນໂຄງການຮ່ວມມືປີ 2016 ລະຫວ່າງ
ກະຊວງຍຸຕິທຳສອງປະເທດໃນຂົງເຂດກົດໝາຍ ແລະ ຕຸລາການ
(ພາບ: vietnam+)
(vovworld) - ຕອນບ່າຍວັນທີ 24/12, ຢູ່ນະຄອນຫຼວງວຽງຈັນ, ຄະນະຜູ້ແທນຂັ້ນສູງກະຊວງຍຸຕິທຳຫວຽດນາມ ໂດຍທ່ານລັດຖະມົນຕີວ່າການ ຮ່າຮຸ່ງເກື່ອງ ນຳໜ້າ, ໄດ້ມີການເຈລະຈາກັບຂັ້ນສູງຄະນະຜູ້ແທນກະຊວງຍຸຕິທຳລາວ, ໂດຍທ່ານລັດຖະມົນຕີວ່າການ ບຸນເກີດ ສັງສົມສັກ ເປັນຫົວໜ້າຄະນະ. ທີ່ການເຈລະຈາ, ສອງຝ່າຍໄດ້ພ້ອມກັນຕີລາຄາສະພາບການປະຕິບັດ ການເຄື່ອນໄຫວຮ່ວມມືປີ 2015 ລະຫວ່າງກະຊວງຍຸຕິທຳສອງປະເທດ. ສອງຝ່າຍເຫັນດີເປັນເອກະສັນນຳກັນວ່າ ຈະສືບຕໍ່ເພີ່ມທະວີວຽກງານແລກປ່ຽນຄະນະ, ແລກປ່ຽນກ່ຽວກັບວຽກງານສ້າງກົດໝາຍ; ການຄຸ້ມຄອງຄະນະນັກທະນາຍຄວາມ ແລະ ບັນດາບໍລິສັດກົດໝາຍ… ສອງຝ່າຍພ້ອມກັນແລກປ່ຽນ ແລະ ເພີ່ມທະວີການຮ່ວມມືໃນພາກພື້ນ ແລະ ສາກົນ, ການຮ່ວມມືດ້ານກົດໝາຍ ແລະ ຕຸລາການໃນຂອບເຂດອາຊຽນ, ໃນນັ້ນມີການປະຕິບັດບັນດາຂໍ້ລິເລີ່ມເຊິ່ງໄດ້ຮັບການຮັບຮອງເອົາຢູ່ກອງປະຊຸມລັດຖະມົນຕີວ່າການກະຊວງຍຸຕິທຳບັນດາປະເທດອາຊຽນ.
ສິ້ນສຸດການເຈລະຈາ, ລັດຖະມົນຕີວ່າການທັງສອງທ່ານ ໄດ້ເປັນສັກຂີພິຍານ ພິທີລົງນາມໃນໂຄງການຮ່ວມມືປີ 2016 ລະຫວ່າງ ກະຊວງຍຸຕິທຳສອງປະເທດໃນຂົງເຂດກົດໝາຍ ແລະ ຕຸລາການ.