(vovworld) - ພາຍຫຼັງທີ່ເຮັດວຽກມາເປັນເວລາ 15 ວັນ, ກອງປະຊຸມຄັ້ງທີ 6 ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ອັດລົງໃນຕອນບ່າຍວັນທີ 15/10 ຢູ່ຮ່າໂນ້ຍ. ທີ່ກອງປະຊຸມ, ຄະນະບໍລິຫານງານສູນກາງພັກ ໄດ້ປຶກສາຫາລື, ໃຫ້ຄຳຄິດຄຳເຫັນກ່ຽວກັບບັນດາບົດລາຍງານ, ແຜນຮ່າງທີ່ກ່ຽວຂ້ອງຄື: ສະພາບການເສດຖະກິດສັງຄົມປີ 2012, ແຜນການພັດທະນາເສດຖະກິດ - ສັງຄົມ ແລະ ແຜນງົບປະມານແຫ່ງລັດປີ 2013; ສືບຕໍ່ມີການຊັບຊ້ອນ, ປ່ຽນໃໝ່, ຍົກສູງປະສິດທິຜົນການເຄື່ອນໄຫວຂອງລັດວິສາຫະກິດ; ວາງແຜນຊັບຊ້ອນພະນັກງານຄະນະບໍລິຫານງານສູນກາງພັກ, ກົມການເມືອງ, ຄະນະເລຂາສູນກາງພັກ ແລະ ບັນດາຕໍາແໜ່ງພະນັກງານຫຼັກແຫຼ່ງຂອງພັກ ແລະ ລັດ; ບົດລາຍງານໝາກຜົນຂອງການຕຳນິຕິຊົມຕົນເອງ ແລະ ຕຳນິຕິຊົມກັນຂອງກົມການເມືອງ, ຄະນະເລຂາສູນກາງພັກແລະອື່ນໆ. ກອນທີ່ອັດກອງປະຊຸມ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong ໄດ້ມີບົດກ່າວປາໄສທີ່ສຳຄັນໂດຍສັງເຂບກ່ຽວກັບບັນດາໝາກຜົນທີ່ບັນລຸໄດ້ທີ່ກອງປະຊຸມ. ກ່ຽວກັບສະພາບການເສດຖະກິດ - ສັງຄົມປີ 2012, ແຜນການພັດທະນາເສດຖະກິດ - ສັງຄົມປີ 2013, ທ່ານເລຂາທິການໃຫຍ່ໃຫ້ຮູ້ວ່າ; ກອງປະຊຸມໄດ້ເປັນເອກະພາບກັນໃຫ້ຂໍ້ສັງເກດວ່າ:
“ໃນຊຸມເດືອນຍັງເຫຼືອຂອງປີ 2012 ແລະ ປີ 2013, ຈຳເປັນຕ້ອງສືບຕໍ່ເພີ່ມທະວີການສ້າງຄວາມສົດໄສ, ຮັບປະກັນເສດຖະກິດມະຫາພາກເປັນປົກກະຕິ; ພິເສດເອົາໃຈໃສ່ເຖິງຄວາມສະຖຽນລະພາບ, ຄວາມສົດໄສ, ຮັບປະກັນຄວາມປ້ອດໄພຂອງລະບົບການເງິນ - ທະນາຄານ; ປະຕິບັດການປະຢັດ, ຕ້ານໄພສໍ້ລາດບັງຫຼວງ, ຟູ້ມເຟືອຍໃນການລົງທຶນ ແລະ ການໃຊ້ຈ່າຍສ່ວນລວມ. ປົວແປງສະພາບແວດລ້ອມແຫ່ງການລົງທຶນດຳເນີນທຸລະກິດ; ສຸມໃສ່ແກ້ໄຂສະພາບການໜິ້ເສຍ, ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ; ສົ່ງເສີມການລົງທຶນຢູ່ພາຍໃນປະເທດ ແລະ ຍູ້ແຮງການດຶງດູດການລົງທຶນຈາກຕ່າງປະເທດ; ໃຫ້ບຸລິມະສິດໃຫ້ການລົງທຶນພັດທະນາກະສິກຳ ແລະ ທ່ອງທ່ຽວ. ພ້ອມທັງຍູ້ແຮງການປະຕິບັດ 3 ຂອດບຸກທະລຸຍຸດທະສາດຢ່າງກະໂດດຂັ້ນ ຕິດພັນກັບການປ່ຽນໃໝ່ຮູບແບບການເຕີບໂຕ, ສ້າງໂຄງປະກອບພື້ນຖານເສດຖະກິດຄືນໃໝ່; ຮັບປະກັນຄວາມໝັ້ນຄົງດ້ານການເມືອງ - ສັງຄົມ; ສ້າງພື້ນຖານພັດທະນາຢ່າງເຂັ້ມແຂງກວ່າໃນຊຸມປີຕໍ່ໆໄປ.”
ກ່ຽວກັບການສ້າງແຜນຊັບຊ້ອນພະນັກງານໃນຄະນະບໍລິຫານງານສູນກາງພັກ, ກົມການເມືອງ, ຄະນະເລຂາສູນກາງພັກ ແລະ ບັນດາຕຳແໜ່ງທີ່ສຳຄັນອື່ນໆຂອງພັກ ແລະ ລັດ. ທ່ານເລຂາທິການໃຫຍ່ Nguyen Phu Trong ເນັ້ນໜັກວ່າ (ເທບ)
“ ນີ້ເປັນຄັ້ງທຳອິດທີ່ສູນກາງພັກປຶກສາຫາລື ແລະ ອອກມະຕິກ່ຽວກັບບັນຫານີ້. ສູນກາງພັກເນັ້ນໜັກວ່າ ການຂຶ້ນແຜນຊັບຊ້ອນພະນັກງານຂັ້ນຍຸດທະສາດ ແມ່ນຕ້ອງເລີ່ມມາຈາກຄວາມຕ້ອງການ, ໜ້າທີ່ການເມືອງ, ໜ້າທີ່ກໍ່ສ້າງພັກ, ສ້າງສາ ແລະ ປົກປັກຮັກສາປະເທດຊາດໃນໄລຍະຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ; ເປັນເຈົ້າການ ແລະ ຄົ້ນພົບພະນັກງານທີ່ມີແງ່ຫວັງນຳພາ, ຄຸ້ມຄອງທີ່ເຕີບໃຫຍ່ຈາກພຶດຕິກຳຕົວຈິງ; ເອົາໃຈໃສ່ເຖິງເປົ້າໝາຍພະນັກງານທີ່ເຕີບໃຫຍ່ຈາກຊົນຊັ້ນກຳມະກອນ, ຊາວນາ, ປັນຍາຊົນ, ເພີ່ມອັດຕາພະນັກງານໜຸ່ມ, ພະນັກງານຍິງ, ພະນັກງານຊົນເຜົ່າສ່ວນໜ້ອຍ, ລູກເຕົ້າຜູ້ທີ່ມີຄຸນງາມຄວາມດີຕໍ່ການປະຕິວັດ, ພະນັກງານຂະແໜງວິທະຍາສາດ-ເຕັກໂນໂລຢີ, ວັດທະນະທຳ, ສິລະປະ”
ທ່ານເລຂາທິການໃຫຍ່ Nguyen Phu Trong ຢືນຢັນວ່າ ກອງປະຊຸມຄັ້ງທີ່ 6 ຄະນະບໍລິຫານງານສູນກາງພັກກອມມູນິດຫວຽດນາມໄດ້ປະສົບຜົນສຳເລັດຢ່າງດີງາມ, ຊຶ່ງໄດ້ປຶກສາຫາລື ແລະ ເປັນເອກະສັນກັນຢ່າງສູງກ່ຽວກັບບັນດາແຜນນະໂຍບາຍ, ນະໂຍບາຍທີ່ສຳຄັນໃນບັນດາຂົງເຂດ ເສດຖະກິດ-ສັງຄົມ, ການສຶກສາ-ບຳລຸງສ້າງ, ວິທະຍາສາດ-ເຕັກໂນໂລຢີ ແລະ ວຽກງານກໍ່ສ້າງພັກ.