ກອງປະຊຸມຄະນະກຳມະການປະສົມການຄ້າ ຫວຽດນາມ - ມາເລເຊຍຄັ້ງທີ 2

ວັນພະຫັດ ທີ 7 ມີນາ ຄ.ສ. 2013 | 15:04:19

(vovworld) - ຕອນເຊົ້າວັນທີ 7/3 ຢູ່ ຮ່າໂນ້ຍ, ຢູ່ນອກກອງປະຊຸມລັດຖະມົນຕີ ເສດຖະກິດອາຊຽນ ຄັ້ງທີ 19(6-9/3/2013) ໄດ້ດຳເນີນກອງປະຊຸມຄະນະກຳມະການປະສົມການຄ້າ ຫວຽດນາມ - ມາເລເຊຍຄັ້ງທີ 2. ທ່ານ ຫວຸຮູຍຮ່ວາງ ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ແລະ ທ່ານ Dato Sri Mustapa Mohamed ລັດຖະມົນຕີກະຊວງການຄ້າສາກົນ ແລະ ອຸດສາຫະກຳ ມາເລເຊຍເປັນປະທານຮ່ວມ. ທີ່ກອງປະຊຸມ, ສອງຝ່າຍໄດ້ປຶກສາຫາລືບາງບັນຫາສຳຄັນໃນການພົວພັນດ້ານການຄ້າສອງຝ່າຍ ແລະ ບັນດາມາດຕະການຊຸກຍູ້ການພົວພັນຮ່ວມມືດ້ານເສດຖະກິດການຄ້າ ເພື່ອຂຸດຄົ້ນຄວາມສາມາດບົ່ມຊ້ອນຂອງແຕ່ລະປະເທດຢ່າງມີປະສິດທິຜົນ. ກ່າວຄຳເຫັນນະທີ່ນີ້, ທ່ານ ລັດຖະມົນຕີກະຊວງອຸດສາຫະກຳ ການຄ້າ ຫວຽດນາມ ຫວູຮູຍຮ່ວາງ ຖືວ່າ:

“ພາຍຫລັງກອງປະຊຸມຄັ້ງທີ 1 ໃນເດືອນ 11/2009 ມາຮອດປະຈຸບັນ, ການພົວພັນຮ່ວມມືຮອບດ້ານລະຫວ່າງ ຫວຽດນາມ ແລະ ມາເລເຊຍ ກ່ຽວກັບດ້ານການເມືອງ, ເສດຖະກິດ, ການຄ້າ ໄດ້ມີບັນດາບາດກ້າວພັດທະນາໃຫມ່. ການພົວພັນດ້ານການເມືອງລະຫວ່າງສອງປະເທດພວມພັດທະນາຢ່າງຈົບງາມ. ຄຽງຄູ່ກັນນັ້ນ ສອງປະເທດກໍໄດ້ແລກປ່ຽນການຢ້ຽມຢາມ ແລະ ການເຮັດວຽກໃນຂັ້ນກະຊວງ, ຂະແຫນງການຄັ້ງຕ່າງໆ. ການພົວພັນລະຫວ່າງສອງປະເທດສືບຕໍ່ໄດ້ຮັບການເພີ່ມທະວີກວ່າອີກໃນປີ 2013 ເມື່ອພວກເຮົາສະເຫລີມສະຫລອງ 40 ປີແຫ່ງການສ້າງຕັ້ງການພົວພັນທາງການທູດລະຫວ່າງສອງປະເທດ.”

ທີ່ກອງປະຊຸມ, ສອງຝ່າຍໄດ້ເປັນເອກະສັນກັນສ້າງກົນໄກແລກປ່ຽນ, ແບ່ງປັນຂໍ້ມູນຂ່າວສານ ແລະ ສົມທົບກັນໃນການສືບສວນປ້ອງກັນດ້ານການຄ້າ ເພື່ອແກ້ໄຂຄວາມຫຍຸ້ງຍາກ ແລະ ຮັບປະກັນສິດຜົນປະໂຫຍດອັນຊອບທຳຂອງວິສາຫະກິດສອງປະເທດ. ເມື່ອອັດກອງປະຊຸມ ລັດຖະມົນຕີທັງສອງທ່ານ ໄດ້ລົງນາມໃນບົດບັນທຶກຊ່ວຍຈຳກອງປະຊຸມຄັ້ງທີ 2 ຂອງຄະນະກຳມະການປະສົມການຄ້າ ຫວຽດນາມ - ມາເລເຊຍ.