(vovworld) - ຕອນເຊົ້າວັນທີ 10 ກັນຍາ, ຢູ່ຮ່າໂນ້ຍ, ສະມາຄົມອະດີດຊາວໜຸ່ມຕະລຸມບອນຫວຽດນາມ ໄດ້ຈັດກອງປະຊຸມສະຫຼຸບຍ້ອງຍໍ ແລະ ເສີມຂະຫຍາຍບົດບາດຂອງຜູ້ເປັນພະຍານຫຼັກຖານປະຫວັດສາດ ເພື່ອຊ່ວຍໃຫ້ພັກ, ລັດ ປະກາດໃຊ້, ແກ້ໄຂນະໂຍບາຍໃຫ້ແກ່ອະດີດຊາວໜຸ່ມຕະລຸມບອນໃນສະໄໝຕໍ່ຕ້ານ. ທ່ານອະດີດເລຂາທິການໃຫຍ່ ເລຂາຟຽວ, ທ່ານຮອງນາຍົກລັດຖະມົນຕີ ຫວູວັນນິງ ແລະ ຜູ້ແທນດີເດັ່ນ 250 ຄົນ ທີ່ຕາງໜ້າໃຫ້ອະດີດຊາວໜຸ່ມຕະລຸມບອນໃນທົ່ວປະເທດ 40 ໝື່ນຄົນເຂົ້າຮ່ວມກອງປະຊຸມ. ກ່າວຄຳເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີ ຫວູວັນນິງ ຢືນຢັນວ່າ ຍາມໃດພັກ ແລະ ລັດກໍ່ເອົາໃຈໃສ່, ເບິ່ງແຍງດູແລເຖິງຊີວິດການເປັນຢູ່ຂອງບັນດາຄອບຄົວທະຫານເສຍອົງຄະ, ນັກຮົບທີ່ເສຍສະຫຼະຊີວິດເພື່ອຊາດ, ຜູ້ມີຄຸນງາມຄວາມດີຕໍ່ການປະຕິວັດ, ໃນນັ້ນມີຊາວໜຸ່ມຕະລຸມບອນ. ຜ່ານບັນດາໄລຍະປະຫວັດສາດ, ລະບອບ, ນະໂຍບາຍກ່ຽວກັບອະດີດຊາວໜຸ່ມຕະລຸມບອນ ໄດ້ຮັບການປັບປຸງເປັນປະຈຳ ແລະ ປະຕິບັດຢ່າງມີປະສິດທິຜົນ. ທ່ານຮອງນາຍົກລັດຖະມົນຕີ ຫວູວັນນິງ ສະເໜີວ່າ, ໃນໄລຍະຈະມາເຖິງ, ບັນດາອົງຄະນະພັກ, ຫົວໜ່ວຍທີ່ກ່ຽວຂ້ອງ ຕ້ອງຊາບຊືມບັນດາມະຕິ, ຄຳຊັ່ງກ່ຽວກັບວຽກງານເບິ່ງແຍງດູແລຜູ້ທີ່ມີຄຸນງາມຄວາມດີຢ່າງມີປະສິດທິຜົນ; ຮີບເຮັ່ງຜັນຂະຫຍາຍໂຄງການເຄື່ອນໄຫວຂອງລັດຖະບານກ່ຽວກັບບາງບັນຫານະໂຍບາຍາສັງຄົມ... ບັນດາກະຊວງ, ຂະແໜງການ, ທ້ອງຖິ່ນ ແລະ ສະມາຄົມຊາວໜຸ່ມຕະລຸມບອນ ຕ້ອງຕັ້ງໜ້າ, ເປັນເຈົ້າການເປັນເສນາທິການໃຫ້ລັດຖະບານ ບັນດາຄວາມຕິດຂັດໃນສະພາບຕົວຈິງ, ເພື່ອແນໃສ່ຮັບປະກັນສິດ ແລະ ຜົນປະໂຫຍດຂອງຊາວໜຸ່ມຕະລຸມບອນ.