(vovworld) - ຕອນເຊົ້າວັນທີ 2/5, ຢູ່ຮ່າໂນ້ຍ, ລັດຖະບານໄດ້ຈັດກອງປະຊຸມທົ່ວປະເທດ ຜ່ານເຄືອຂ່າຍ ອີນເຕີເນັດ ກ່ຽວກັບວຽກງານຕ້ອນຮັບພົນລະເມືອງ, ແກ້ໄຂການກ່າວຟ້ອງ, ຮ້ອງທຸກ. ກ່າວຄຳເຫັນທີ່ການປະຊຸມ, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ເນັ້ນໜັກວ່າ: ການຕ້ອນຮັບພົນລະເມືອງ, ການແກ້ໄຂກ່າວຟ້ອງ, ຮ້ອງທຸກຂອງພົນລະເມືອງ ແມ່ນໜ້າທີ່ການເມືອງທີ່ມີຄວາມສຳຄັນ ເປັນປະຈຳຂອງຄະນະພັກ ແລະ ອຳນາດການປົກຄອງທຸກຂັ້ນ. ໃນໄລຍະຜ່ານມາ, ອຳນາດການປົກຄອງທຸກຂັ້ນ ໄດ້ເອົາໃຈໃສ່ປະຕິບັດວຽກງານນີ້ ແລະ ບັນລຸໄດ້ບັນດາຜົນງານຢ່າງຕັ້ງໜ້າ ປະກອບສ່ວນເຂົ້າໃນຜົນສຳເລັດລວມຂອງປະເທດຊາດ. ທ່ານນາຍົກລັດຖະມົນຕີ Nguyen Tan Dung ຊີ້ແຈງວ່າ:
“ການຕ້ອນຮັບພົນລະເມືອງ ແລະ ແກ້ໄຂການຮ້ອງທຸກຂອງພົນລະເມືອງ ແມ່ນໜ້າທີ່ເປັນປະຈຳ ແລະ ສຳຄັນຂອງຄະນະພັກ, ອຳນາດການປົກຄອງທຸກຂັ້ນ. ພວກເຮົາຕ້ອງປະຕິບັດດີກ່ວາ ຕາມ 2 ທິດທາງ: ທີ່ໜຶ່ງແມ່ນແກ້ໄຂ 528 ກໍລະນີທີ່ຍັງຄົງຄ້າງໃຫ້ຖືກຕ້ອງຕາມກົດໝາຍຢ່າງເດັດຂາດ, ທິດທາງທີ 2 ແມ່ນ ພວກເຮົາຕ້ອງພັດທະນາເສດຖະກິດ - ສັງຄົມ, ຕ້ອງຫັນເປັນປະເທດອຸດສາຫະກຳ - ທັນສະໄໝ, ຕ້ອງລົງທຶນໃສ່ພື້ນຖານໂຄງລ່າງ, ຕ້ອງພັດທະນາຕົວເມືອງ, ສັງຄົມ. ໃນການພັດທະນາ ຕ້ອງຖອນທີ່ດິນຕາມແຜນກຳນົດແຕ່ວ່າບໍ່ເຮັດໃຫ້ເກີດການກ່າວຟ້ອງ ຮ້ອງທຸກ”
ບົນຈິດໃຈດັ່ງກ່າວ, ທ່ານນາຍົກລັດຖະມົນຕີ Nguyen Tan Dung ຮຽກຮ້ອງໃຫ້ປະທານ, ຮອງປະທານຄະນະກຳມະການປະຊາຊົນແຂວງ,ນະຄອນທີ່ເຂົ້າຮ່ວມກອງປະຊຸມຕີລາຄາສະພາບການ, ໄຈ້ແຍກສາຍເຫດ, ໂດຍສະເພາະແມ່ນເປັນຫຍັງມີນະໂຍບາຍດຽວກັນ ມີຫຼາຍທ້ອງຖີ່ນປະຕິບັດໄດ້ດີ, ແຕ່ພັດມີຫຼາຍທ້ອງຖີ່ນຍັງເກີດການກ່າວຟ້ອງ, ຮ້ອງທຸກຢ່າງສັບສົນ.
ຕອນບ່າຍວັນດຽວກັນ, ກອງປະຊຸມທົ່ວປະເທດຜ່ານເຄືຍຂ່າຍອີນເຕີເນັດກ່ຽວກັບວຽກງານຕ້ອນຮັບພົນລະມືອງ, ແກ້ໄຂການກ່າວຟ້ອງ, ຮ້ອງທຸກ ສືບຕໍ່ດຳເນີນໄປ ດ້ວຍບັນດາບົດທາບທາມຄວາມເຫັນຂອງອຳນາດການປົກຄອງທ້ອງຖີ່ນ.