(vovworld) - ວັນທີ 31/3 ແລະ ວັນທີ 1/4, ທ່ານນາຍົກລັດຖະມົນຕີ Nguyen Tan Dung ເປັນປະທານວາລະປະຊຸມປະຈຳເດືອນ 3 ຂອງລັດຖະບານ ເພື່ອຕີລາຄາສະພາບການພັດທະນາເສດຖະກິດ ສັງຄົມໃນໄຕມາດ 1 ປີ 2012 ດ້ວຍຫລາຍສັນຍານດີພໍສົມຄວນ, ຢືນຢັນປະສິດທິຜົນຂອງບັນດານະໂຍບາຍ ແລະ ມາດຕະການບໍລິຫານພື້ນຖານເສດຖະກິດຢ່າງຈະແຈ້ງ, ເປັນຕົ້ນແມ່ນໃນການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ ແລະ ຮັບປະກັນຊີວິດສັງຄົມ. ລະດັບໄພເງິນເຟີ້ໃນເດືອນ 3 ແມ່ນ 0,16% ແລະ ນີ້ແມ່ນລະດັບຕ່ຳສຸດເມື່ອທຽບໃສ່ກັບໄລຍະດຽວກັນຂອງຊຸມປີກ່ອນນີ້.
ວາລະປະຊຸມປະຈຳເດືອນ 3 ຂອງລັດຖະບານຫວຽດນາມ
ພາບ:chinhphu.vn
|
ທ່ານນາຍົກລັດຖະມົນຕີ Nguyen Tan Dung ຢືນຢັນ: ລັດຖະບານ ຕັ້ງໝັ້ນໃຫ້ບູລິມະສິດການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ. ນາຍົກລັດຖະມົນຕີ ຊີ້ນຳໃຫ້ທະນາຄານແຫ່ງລັດ ສືບຕໍ່ບໍລິຫານນະໂຍບາຍເງິນຕາ, ສິນເຊື່ອ ແລະ ອັດຕາດອກເບ້ຍຢ່າງມີໄຫວພິບ, ເໝາະສົບກັບຈຸດໝາຍຄວບຄຸມໄພເງິນເຟີ້. ເພື່ອຮັກສາການຈະເລີນເຕີບໂຕຢ່າງເໝາະສົມປະມານ 6% ຂອງທັງປີ 2012, ນາຍົກລັດຖະມົນຕີ Nguyen Tan Dung ສະເຫນີໃຫ້ບັນດາກະຊວງ, ຂະແຫນງການ ແລະ ບັນດາທ້ອງຖິ່ນ ຕ້ອງກຳແຫນ້ນສະພາບການ, ສຸມໃສ່ແກ້ໄຂຄວາມຫຍຸ້ງຍາກສຳລັບແຕ່ລະຕະຫລາດພາຍໃນ, ເປີດກວ້າງຕະຫລາດຕ່າງປະເທດ ເພື່ອຍູ້ແຮງການສົ່ງອອກ ພ້ອມທັງເດັດດ່ຽວແກ້ໄຂຂໍ້ຕິດຂັດໃນລະບຽບການບໍລິຫານ. ນາຍົກລັດຖະມົນຕີ Nguyen Tan Dung ຊີ້ແຈງວ່າ:
“ຫນ້າທີ່ຂອງລັດຖະບານ ແມ່ນແກ້ໄຂຄວາມຫຍຸ້ງຍາກເພື່ອຮັກສາການພັດທະນາການຜະລິດ. ປະຈຸບັນ ກະສິກຳແມ່ນທ່າໄດ້ປຽບ ສະນັ້ນພວກເຮົາຕ້ອງສືບຕໍ່ບຸລິມະສິດດ້ານທຶນຮອນໃຫ້ແກ່ການຜະລິດກະສິກຳ, ການສົ່ງອອກຜະລິດຕະພັນກະເສດ. ນອກນັ້ນ ບັນດາວິສາຫະກິດຂະຫນາດນ້ອຍ ກໍໄດ້ປະກອບສ່ວນໃຫ້ແກ່ການຈະເລີນເຕີບໂຕກວ່າ 2% ສະນັ້ນ ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດຂະຫນາດກາງ ແລະ ນ້ອຍ.”
ນາຍົກລັດຖະມົນຕີ Nguyen Tan Dung ສະເຫນີໃຫ້ກະຊວງແຜນການ ແລະ ການລົງທຶນ ຄິດໄລ່ວິທີການດຶງດູດແຫລ່ງທຶນຈາກພັນທະບັດຂອງລັດຖະບານ ແລະ ທຶນສົມທົບໂດຍໄວເພື່ອປ່ອຍເງິນແຫລ່ງທຶນ ODA. ບັນດາກະຊວງ, ຂະແຫນງການ ແລະ ທ້ອງຖິ່ນຕ້ອງສຸມໃສ່ຜັນຂະຫຍາຍບັນດານະໂຍບາຍ, ລາຍການຮັບປະກັນຊີວິດສັງຄົມ, ພັດທະນາສາທາລະນະສຸກ, ການສຶກສາ, ລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ແກ້ໄຂວຽກເຮັດງານທຳ, ຈຳກັດ ແລະ ຍູ້ສະພາບອຸບັດຕິເຫດ ແລະ ລົດຕິດໃຫ້ຖອຍໄປ, ຮັບປະກັນຄວາມສະຫງົບຄວາມເປັນລະບຽບຮຽບຮ້ອຍທາງສັງຄົມ.