ກອງປະຊຸມຜັນຂະຫຍາຍມະຕິກອງປະຊຸມໃຫຍ່ຄັ້ງທີ12ກ່ຽວກັບວຽກງານຂົນຂວາຍປະຊາຊົນ
ທ່ານເລຂາທິການໃຫຍ່ ຫງວຽນຟູຈ້ອງ
ກ່າວຄຳເຫັນຊີ້ນຳກອງປະຊຸມ
(ພາບ: TTXVN)
(vovworld) - ວັນທີ 27/05 ຢູ່ຮ່າໂນ້ຍ ຄະນະຂົນຂວາຍປະຊາຊົນສູນກາງຈັດຕັ້ງກອງປະຊຸມຜັນຂະຫຍາຍໂຄງການດຳເນີນງານປະຕິບັດມະຕິກອງປະຊຸມໃຫຍ່ທົ່ວປະເທດຄັ້ງທີ 12 ຂອງພັກ ແລະ ບັນດາຄຳສັ່ງ, ສະຫຼຸບຂອງກົມການເມືອງ, ຄະນະເລຂາສູນກາງກ່ຽວກັບວຽກງານຂົນຂວາຍປະຊາຊົນ. ກ່າວຄຳເຫັນຊີ້ນຳກອງປະຊຸມ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູຈ້ອງ ຢືນຢັນວ່າ: ບັນດາຜົນງານລວມຂອງປະເທດຊາດທີ່ບັນລຸໄດ້ໃນໄລຍະຜ່ານມາ ມີການປະກອບສ່ວນສຳຄັນຂອງວຽກງານຂົນຂວາຍປະຊາຊົນ ແລະ ຖັນແຖວຜູ້ປະຕິບັດວຽກງານຂົນຂວາຍປະຊາຊົນ, ປະກອບສ່ວນເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນ. ທ່ານເລຂາທິການໃຫຍ່ ຫງວຽນຟູຈ້ອງ ຊີ້ແຈ້ງວ່າ: ປະຈຸບັນ ບັນຫາທີ່ມີຄວາມໝາຍຕັດສິນ ເພື່ອເພີ່ມທະວີການພົວພັນລະຫວ່າງພັກ ແລະ ປະຊາຊົນ ແມ່ນພັກຕ້ອງເບິ່ງແຍງດູແລຊີວິດການເປັນຢູ່, ຜົນປະໂຫຍດຂອງປະຊາຊົນຢ່າງຄົບຖ້ວນ; ເຄົາລົບ ແລະ ເສີມຂະຫຍາຍສິດເປັນເຈົ້າຂອງປະຊາຊົນຢ່າງແທ້ຈິງ; ປັບປຸງ ແລະ ສ້າງອົງການຈັດຕັ້ງພັກໃຫ້ປອດໃສ…ທ່ານເລຂາທິການໃຫຍ່ ຫງວຽນຟູຈ້ອງ ປາດຖະໜາວ່າ: ບັນດາຜູ້ທີ່ປະຕິບັດວຽກງານຂົນຂວາຍປະຊາຊົນໂດຍກົງຄວນຮັບຮູ້, ເຂົ້າໃຈ ແລະ ຊາບຊຶມຢ່າງເລິກເຊິ່ງຕໍ່ບັນຫາດັ່ງກ່າວ ເພື່ອເຮັດສຳເລັດຄວາມຮັບຜິດຊອບທີ່ສຳຄັນຂອງຕົນ.
ແລະກໍ່ໃນຕອນບ່າຍວັນດຽວກັນ, ກອງປະຊຸມໄດ້ປະຕິບັດສຳເລັດໂຄງການດຳເນີນງານທີ່ໄດ້ວາງອອກ. ກ່າວຄຳເຫັນສະຫລຸບກອງປະຊຸມ, ທ່ານນາງ ເຈືອງທິມາຍ, ຫົວໜ້າຄະນະຂົນຂວາຍປະຊາຊົນສູນກາງ ໄດ້ສະເໜີບັນດາອົງການພັກຮີບເຮັ່ງຊາບຊຶມ, ເຜີຍແຜ່ເຖິງພະນັກງານ, ສະມາຊິກພັກ ແລະ ປະຊາຊົນບັນດາເນື້ອໃນມະຕິກອງປະຊຸມໃຫຍ່ທົ່ວປະເທດຄັ້ງທີ 12 ຂອງພັກ ແລະ ບັນດາເອກະສານສຳຄັນຂອງພັກກ່ຽວກັບວຽກງານຂົນຂວາຍປະຊາຊົນ, ພ້ອມທັງນຳເນື້ອໃນວຽກງານຂົນຂວາຍປະຊາຊົນໃນມະຕິກອງປະຊຸມໃຫຍ່ຄັ້ງທີ 12 ຂອງພັກເຂົ້າໂຄງການເຄື່ອນໄຫວຂອງທ້ອງຖິ່ນ, ຫົວໜ່ວຍເພື່ອແນໃສ່ຫັນປ່ຽນສະຕິຄວາມຮັບຮູ້ໃນທົ່ວລະບົບການເມືອງຈາກສູນກາງລົງຮອດຮາກຖານກ່ຽວກັບວຽກງານຂົນຂວາຍປະຊາຊົນ.