(vovworld) - ຕອນບ່າຍວັນທີ 15/11, ຢູ່ຮ່າໂນ້ຍ, ໄດ້ໄຂກອງປະຊຸມຂັ້ນລັດຖະມົນຕີ ລະຫວ່າງ 3 ປະເທດ ຫວຽດນາມ - ລາວ - ກຳປູເຈຍ ກ່ຽວກັບການຮ່ວມມືປ້ອງກັນ ຕ້ານຢາເສບຕິດຄັ້ງທີ 21. ກ່າວຄຳເຫັນໄຂກອງປະຊຸມ, ທ່ານຮອງນາຍົກລັດຖະມົນຕີຫວຽດນາມ Nguyen Xuan Phuc ຢືນຢັນວ່າ; ໃນຫຼາຍປີຜ່ານມາ, ລັດຖະບານຫວຽດນາມ ໄດ້ສຸມໃສ່ຜັນຂະຫຍາຍລົງທຶນໃຫ້ແກ່ວຽກງານປ້ອງກັນ, ຕ້ານ ແລະ ຄວບຄຸມຢາເສບຕິດ; ເປັນເຈົ້າການຜັນຂະຫຍາຍຢ່າງຄົບຊຸດ ແລະ ຮອບດ້ານບັນດາແຜນນະໂຍບາຍ, ມາດຕະການຢ່າງຕັ້ງໜ້າ ເພື່ອປ້ອງກັນ, ຕ້ານອາດຊະຍາກຳຢາເສບຕິດ; ສືບຕໍ່ຮັກສາຜົນສຳເລັດໃນວຽກງານລົບລ້າງເລື່ອງປູກຕົ້ນໄມ້ທີ່ມີທາດເສບຕິດ; ຄວບຄຸມຈຳນວນຜູ້ຖືກຕິດຢາເສບຕິດ, ເພີ່ມທະວີການຮ່ວມມືສາກົນໃນການປ້ອງກັນ ແລະ ຕ້ານໄພຢາເສບຕິດ. ທ່ານຮອງນາຍົກລັດຖະມົນຕີ ໄດ້ຖືວ່າ ວຽກງານປ້ອງກັນຕ້ານໄພຢາເສບຕິດ ແມ່ນການຕໍ່ສູ້ລວມ, ໃນນັ້ນຜົນສຳເລັດຢູ່ແຕ່ລະປະເທດແມ່ນໄຊຊະນະລວມຂອງ 3 ປະເທດ. ທ່ານຮອງນາຍົກລັດຖະມົນຕີ Nguyen Xuan Phuc ກ່າວວ່າ.
“ນີ້ແມ່ນເວທີປາໄສທີ່ສຳຄັນ ເພື່ອໃຫ້ພວກເຮົາສາມາດແລກປ່ຽນ ຕີລາຄາສະພາບການກ່ຽວກັບບັນດາຂໍ້ຕິດຂັດ, ຄວາມຫຍຸ້ງຍາກ, ວາງອອກມາດຕະການສົມທົບກັນ ແລະ ຊ່ວຍເຫຼືອເຊິ່ງກັນ ແລະ ກັນ, ສ້າງບາດກ້າວເດີນໃໝ່ໃນວຽກງານປ້ອງກັນຕ້ານ ແລະ ຄວບຄຸມຢາເສບຕິດລະຫວ່າງ 3 ປະເທດ ໃນໄລຍະຈະມາເຖິງ ເພື່ອແນໃສ່ສ້າງກຳລັງແຮງສັງລວມເພື່ອຍູ້ໄພຢາເສບຕິດໃຫ້ຖອຍຫຼັງ, ກ້າວໄປເຖິງການຍາດເອົາໄຊຊະນະໃນການຕໍ່ສູ້ຕ້ານໄພຢາເສບຕິດ.”