ພາບປະກອບ
(vovworld) – ກອງປະຊຸມລັດຖະມົນຕີການຄ້າກຸ່ມບັນດາພື້ນຖານເສດຖະກິດພັດທະນາ ແລະ ຫາກໍ່ພົ້ນເດັ່ນຂຶ້ນຂອງໂລກ (ຈີ 20) ຖືກໄຂຂຶ້ນໃນຕອນເຊົ້າວັນທີ 9/7, ຢູ່ ຊຽງໄຮ, ປະເທດ ຈີນ, ເພື່ອແນໃສ່ປຶກສາຫາລືບັນດາມາດຕະການແກ້ໄຂບັນດາບັນຫາເຄັ່ງຮ້ອນ ແລະ ຊຸກຍູ້ການຟື້ນຟູຂອງພື້ນຖານເສດໂລກ. ກອງປະຊຸມດຳເນີນໄປໃນເວລາ 2 ວັນໄດ້ສຸມໃສ່ປຶກສາຫາລືບັນດາບັນຫາລະອຽດໃນນັ້ນມີການເພີ່ມທະວີການສ້າງກົນໄກການຄ້າ, ການລົງທຶນ ຈີ20, ສະໜັບສະໜູນກົນໄກການຄ້າ 2 ຝ່າຍ, ຊຸກຍູ້ການເຕີບໂຕດ້ານການຄ້າໃນທົ່ວໂລກ, ສົ່ງເສີມການສົມທົບ ແລະ ຮ່ວມມືໃນບັນດານະໂຍບາຍລົງທຶນທົ່ວໂລກ, ຍູ້ແຮງບັນດາມູນຄ່າທົ່ວໂລກເຊື່ອມຈອດກັນ.
ກອງປະຊຸມລັດຖະມົນຕີການຄ້າ ຈີ20 ຄັ້ງນີ້ແມ່ນໜຶ່ງໃນບັນດາການເຄື່ອນໄຫວໃຫຍ່ສຸດຂອງປີ ຈີ 20 ຈີນ, ນຳມາເຊິ່ງຄວາມໝາຍພິເສດເພື່ອແນໃສ່ຊຸກຍູ້ການຮ່ວມມືຮອບດ້ານໃນຂົງເຂດການຄ້າ, ການລົງທຶນໃນໂລກ. ກອງປະຊຸມຖືກດຳເນີນໄປໃນສະພາບການເສດຖະກິດໂລກພວມຄ່ອຍໆຟື້ນຟູ, ແຕ່ສະພາບການຍັງຄົງມີຄວາມຫຍຸ້ງຍາກສັບສົນຫຼາຍຢ່າງ, ການຄ້າທົ່ວໂລກເຕີບໂຕຕຳ່, ລະດັບການລົງທຶນບໍ່ເທົ່າກັບໄລຍະກ່ອນທີ່ເກີດວິກິດການການເງິນ, ໃນຂະນະທີ່ຍັງບໍ່ທັນຊອກຫາກຳລັງໜູນເຕີບໂຕແບບຍືນຍົງໃໝ່ໃຫ້ແກ່ເສດຖະກິດໂລກ. ດັ່ງນັ້ນ, ຕາມທ່ານຮອງລັດຖະມົນຕີກະຊວງການຄ້າ ຈີນ ຫວາງຊົວແຫວນ, ບັນດາສະມາຊິກ ຈີ 20 ຕ້ອງສ້າງຍຸດທະສາດເຕີບໂຕດ້ານການຄ້າທົ່ວໂລກ, ໃນນັ້ນລວມມີຊຸກຍູ້ການປະຕິບັດສັນຍາຫັນການຄ້າເປັນງ່າຍດາຍ, ຫລຸດລາຄາການຄ້າທົ່ວໂລກລົງ.