(vovworld) - ໃນລະຫວ່າງວັນທີ 26 – 27/4, ຢູ່ນະຄອນຫຼວງ Bandar Seri Begawan ຂອງ Brunei ໄດ້ດຳເນີນກອງປະຊຸມລັດຖະມົນຕີກະຊວງການຕ່າງປະເທດ ອາຊຽນ - ອີຢູ ຄັ້ງທີ 19 (ຫຼື AEMM 19). ບັນດາລັດຖະມົນຕີໄດ້ຮັບຮອງເອົາແຜນການເຄື່ອນໄຫວ ອາຊຽນ - ອີຢູ ໄລຍະ 2013 – 2017, ສຸມໃສ່ແຫຼ່ງກຳລັງ ແລະ ບຸລິມະສິດໜູນຊ່ວຍອາຊຽນກໍ່ສ້າງປະຊາຄົມ, ເພີ່ມທະວີການເຊື່ອມຕໍ່, ຮັດແຄບຊ່ອງຫວ່າງ, ຄ້ຳປະກັນດ້ານສະບຽງອາຫານ, ຕ້ານອາດຊະຍາກຳຂ້າມຊາດ... ອີຢູ ໄດ້ປະກາດບ້ວງເງິນ 20 ລ້ານ ເອີໂຣ ເພີ່ມເຕີມໃຫ້ແກ່ການໜູນຊ່ວຍວິວັດການເຊື່ອມໂຍງ ແລະ ຮ່ວມສຳພັນອາຊຽນ. ກ່າວຄຳເຫັນທີ່ກອງປະຊຸມ, ທ່ານລັດຖະມົນຕີການຕ່າງປະເທດຫວຽດນາມ Pham Binh Minh ເນັ້ນໜັກວ່າ: ໃນໄລຍະຈະມາເຖິງ, ອາຊຽນ ແລະ ອີຢູ ຄວນສືບຕໍ່ຍູ້ແຮງ ແລະ ເພີ່ມທະວີການຮ່ວມມືບົນພື້ນຖານປະຕິບັດແຜນການເຄື່ອນໄຫວໄລຍະ 2013 – 2017 ຕາມທິດນັບມື້ນັບມີປະສິດທິຜົນ ແລະ ຮອບດ້ານ, ກ່ຽວກັບດ້ານເສດຖະກິດ - ການຄ້າ, ການເມືອງ - ປ້ອງກັນຄວາມສະຫງົບ, ວັດທະນະທຳ - ສັງຄົມ. ຫວຽດນາມ ຈະມານະພະຍາຍາມ ແລະ ຮ່ວມມືຢ່າງແໜ້ນແຟ້ນ ພ້ອມກັບບັນດາປະເທດເພື່ອຊຸກຍູ້ ແລະ ຍົກສູງການພົວພັນ ແລະ ຮ່ວມມືລະຫວ່າງ ອາຊຽນ ແລະ ອີຢູ ຂຶ້ນສູ່ລະດັບສູງໃໝ່.