ກອງປະຊຸມລັດຖະມົນຕີການຕ່າງປະເທດອາຊຽນ-ອີຢູຄັ້ງທີ21
ກອງປະຊຸມໃນວັນທີ 14/10
(ພາບ: VTV)
|
(vovworld) – ວັນທີ 14/10, ຢູ່ນະຄອນຫຼວງ ບາງກອກ, ປະເທດໄທ, ໄດ້ດຳເນີນກອງປະຊຸມລັດຖະມົນຕີການຕ່າງປະເທດ ອາຊຽນ - ອີຢູ ຄັ້ງທີ 21 (AEMM -21). ຄະນະຜູ້ແທນ ຫວຽດນາມ ໂດຍທ່ານຮອງລັດຖະມົນຕີການຕ່າງປະເທດ ຫງວຽນກວກຢູ້ງ ເປັນຫົວໜ້າຄະນະ, ເຂົ້າຮ່ວມກອງປະຊຸມ.
ທີ່ກອງປະຊຸມ, 2 ຝ່າຍຍົກສູງຄວາມສຳຄັນຂອງການພົວພັນ ອາຊຽນ - ອີຢູ ແລະ ປາດຖະໜາວ່ານຳການພົວພັນຂຶ້ນສູ່ລະດັບສູງໃໝ່, ເຮັດໃຫ້ການພົວພັນໃນຫຼາຍຂົງເຂດເລິກເຊິ່ງກ່ວາ. ຕາມນັ້ນແລ້ວ, 2 ຝ່າຍເຫັນດີເປັນເອກະສັນຈະມານະຍາຍາມມຸ່ງໄປເຖິງການຍົກລະດັບການພົວພັນ ອາຊຽນ - ອີຢູ ກາຍເປັນຄູ່ຮ່ວມມືຍຸດທະສາດ, ຜ່ານ “ຖະແຫຼງການ ບາງກອກ ກ່ຽວກັບການຊຸກຍູ້ການພົວພັນຄູ່ຮ່ວມມືທົ່ວໂລກຮອບດ້ານ ອາຊຽນ - ອີຢູ ເພື່ອບັນດາເປົ້າໝາຍຍຸດທະສາດລວມ”.
ຄະນະຜູ້ແທນ ຫວຽດນາມ ໄດ້ເຂົ້າຮ່ວມຢ່າງຕັ້ງໜ້າ ແລະ ມີບັນດາການປະກອບສ່ວນສຳຄັນເຂົ້າໃນຜົນສຳເລັດຂອງກອງປະຊຸມ, ນັບທັງໃນວິວັດການກໍ່ສ້າງເນື້ອໃນເອກະສານ. ກ່າວຄຳເຫັນທີ່ກອງປະຊຸມ, ທ່ານຮອງລັດຖະມົນຕີການຕ່າງປະເທດ ຫງວຽນກວກຢູ້ງ ເນັ້ນໜັກວ່າ: ຮອດເວລາແລ້ວທີ່ນຳການພົວພັນຄູ່ເຈລະຈາ ອາຊຽນ - ອີຢູ ຂຶ້ນລະດັບຍຸດທະສາດ ແລະ ເຮັດໃຫ້ການພົວພັນຮ່ວມມືລະຫວ່າງ 2 ຝ່າຍໃນຫຼາຍຂົງເຂດສຳຄັນເລິກເຊິ່ງຂຶ້ນຕື່ມ, ຕ້ອງໃຫ້ບຸລິມະສິດຍູ້ແຮງການຮ່ວມມືເສດຖະກິດ - ການຄ້າ ແລະ ເຊື່ອມຕໍ່, ເພີ່ມທະວີການຮັບມືກັບບັນດາສິ່ງທ້າທາຍດ້ານຄວາມໝັ້ນຄົງ, ທັງມີມາກ່ອນ ແລະ ບໍ່ເຄີຍມີມາກ່ອນຢູ່ພາກພື້ນ.
ກ່ຽວກັບບັນຫາທະເລຕາເວັນອອກ, ທ່ານຮອງລັດຖະມົນຕີ ຫງວຽນກວກຢູ້ງ ສະແດງຄວາມວິຕົກວັງວົນຢ່າງເລິກເຊິ່ງກ່ຽວກັບບັນດາການຜັນແປທີ່ສັບສົນ, ຢັ້ງຢືນຫຼັກໝັ້ນລວມຂອງ ອາຊຽນ, ຕີລາຄາສູງທັດສະນະຕັ້ງໜ້າຂອງ ອີຢູ ແລະ ສະເໜີ ອີຢູ ສືບຕໍ່ສະໜັບສະໜູນຄວາມມານະພະຍາຍາມຮັກສາສັນຕິພາບ ແລະ ສະຖຽນລະພາບຢູ່ທະເລຕາເວັນອອກ.