ຫົວໜ້າຄະນະເສດຖະກິດສູນກາງ ເວືອງດິ່ງເຫ້ວ ກ່າວຄຳເຫັນທີ່ກອງປະຊຸມສຳມະນາ |
(vovworld) – ກອງປະຊຸມສຳມະນາ “ປັບປຸງລະບົບຕົວເລກຄາດໝາຍແຜນພັດທະນາເສດຖະກິດ - ສັງຄົມ” ໂດຍຄະນະເສດຖະກິດສູນກາງ, ກຳມາທິການເສດຖະກິດຂອງສະພາແຫ່ງຊາດ, ທະນາຄານໂລກປະຈຳ ຫວຽດນາມ, ມະຫາວິທະຍາໄລເສດຖະກິດ ຫວຽດນາມ ສົມທົບກັນຈັດຕັ້ງໃນຕອນເຊົ້າວັນທີ 23/6, ຢູ່ຮ່າໂນ້ຍ. ທີ່ກອງປະຊຸມສຳມະນາ, ບັນດາຜູ້ແທນເຂົ້າຮ່ວມ ໄດ້ສະເໜີບັນດາມາດຕະການລະອຽດເພື່ອກໍ່ສ້າງ ແລະ ຈັດຕັ້ງການປະຕິບັດລະບົບບັນດາຕົວເລກຄາດໝາຍຂອງແຜນພັດທະນາເສດຖະກິດ - ສັງຄົມເຊິ່ງຈະໄດ້ຮັບການປະກາດໃຊ້. ໃນເບື້ອງຕົ້ນ, ກອງປະຊຸມສຳມະນາເຫັນດີເປັນເອກະສັນວ່າການປັບປຸງບັນດາຕົວເລກຄາດໝາຍພັດທະນາເສດຖະກິດ - ສັງຄົມ ຕ້ອງໄດ້ຮັບການດຳເນີນບົນພື້ນຖານເພີ່ມທະວີບົດບາດ, ຄວາມຮັບຜິດຊອບຂອງອົງການວາງແຜນ, ອົງການສະຖິຕິຢູ່ບັນດາກະຊວງ, ຂະແໜງການ, ທ້ອງຖິ່ນ ແລະ ບັນດາຫົວໜ່ວຍກ່ຽວຂ້ອງ, ຍົກສູງຄຸນນະພາບ ແລະ ປະສິດທິຜົນແຫຼ່ງຂໍ້ມູນຂ່າວສານໂດຍອົງການສະຖິຕິຮາກຖານເກັບມາໄດ້, ລະບົບຕົວເລກຄາດໝາຍຂອງແຜນພັດທະນາເສດຖະກິດ - ສັງຄົມຕ້ອງຕອບສະໜອງຄວາມຕ້ອງການພັດທະນາຂອງປະເທດຊາດ, ພ້ອມທັງສະແດງໃຫ້ເຫັນຄວາມເປັນເຈົ້າການໃນການເຊື່ອມໂຍງນັບມື້ນັບເລິກເຊິ່ງ, ກ້ວາງຂວາງກັບສາກົນ, ຕິດພັນກັບການປ່ຽນໃໝ່ບັນດາການເຄື່ອນໄຫວວຽກງານສ້າງແຜນການ, ສະຖິຕິ, ພ້ອມທັງປັບປຸງກົງຈັກການຈັດຕັ້ງ, ຮັບປະກັນແຫຼ່ງຊັບພະຍາກອນມະນຸດ, ສະພາບແວດລ້ອມດ້ານນິຕິກຳ, ພື້ນຖານດ້ານເຕັກນິກ ແລະ ບັນດາເງື່ອນໄຂອື່ນໆເພື່ອຜັນຂະຫຍາຍການປະຕິບັດຢ່າງທັນການ ແລະ ມີປະສິດທິຜົນ.