(vovworld) – “ກອງປະຊຸມສົ່ງເສີມການລົງທຶນເຂົ້າເຂດແຄມທະເລພາກກາງ” ຖືກໄຂຂຶ້ນໃນຕອນບ່າຍວັນທີ 21/3 ຢູ່ນະຄອນ ດ່າໜັງ ໄດ້ດຶງດູດຜູ້ແທນກ່ວາ 400 ທ່ານ ເຊິ່ງແມ່ນການນຳບັນດາກະຊວງ, ຂະແໜງການສູນກາງ, ການນຳ 9 ແຂວງ, ນະຄອນໃນເຂດພາກກາງແຕ່ແຂວງ ເທື່ອທຽນເຫ້ວ ຕະຫຼອດຮອດ ແຂວງ ບິນຖ້ວນ, ບັນດາອົງການສາກົນ, ນັກຊ່ຽວຊານຄົ້ນຄ້ວາ, ນັກລົງທຶນທັງພາຍໃນ ແລະ ຕ່າງປະເທດເຂົ້າຮ່ວມ. ກອງປະຊຸມເພື່ອແນໃສ່ໂຄສະນາເຜີຍແຜ່ຄວາມສາມາດບົ່ມຊ້ອນ ແລະ ກາລະໂອກາດລົງທຶນຂອງພາກກາງ, ຜ່ານນັ້ນກໍ່ຮຽກຮ້ອງ, ເລືອກເຟັ້ນ ດຶງດູດບັນດາໂຄງການລົງທຶນຂະແໜງອາຊີບ ນຳໃຊ້ເຕັກໂນໂລຢີສູງທີ່ເໝາະສົມກັບທ່າແຮງພັດທະນາຂອງທົ່ວເຂດເວົ້າລວມ ກໍ່ຄືແຕ່ລະທ້ອງຖິ່ນເວົ້າສະເພາະ. ທ່ານຮອງສາດາະດາຈານ, ດຣ ເຈີນດິງທຽນ, ຫົວໜ້າສະຖາບັນເສດຖະກິດ ຫວຽດນາມ, ຖືວ່າ:
“ມາດຕະການດີກ່ວາໝູ່ແມ່ນບັນດາທ້ອງຖິ່ນຕ້ອງວາງແຜນກຳນົດການພັດທະນາທີ່ມີລັກສະນະຮ່ວມສຳພັນເຂດຄືນໃໝ່, ສ້າງການພັດທະນາກໍ່ຄືຂະຫຍາຍການພັດທະນາໃນວົງກ້ວາງ. ພາກກາງມີທ່າແຮງພັດທະນາການທ່ອງທ່ຽວ ຖ້າຫາກຢາກຂຸດຄົ້ນທ່າແຮງນີ້ໄດ້ດີ ພວກເຮົາຕ້ອງມີການຮ່ວມສຳພັນກັບເຂດໄຕງວຽນ ອີກ.”
ທີ່ກອງປະຊຸມ, ການນຳບັນດາທ້ອງຖິ່ນທາງພາກກາງ ໄດ້ພົວພັນແລກປ່ຽນໂດຍກົງກັບບັນດາວິສາຫະກິດ, ຄູ່ຮ່ວມມື, ນັກລົງທຶນທັງພາຍໃນ ແລະ ຕ່າງປະເທດ, ຍູ້ແຮງການສົມທົບ, ສ້າງແຜນການສົ່ງເສີມການລົງທຶນທີ່ມີລັກສະນະເປັນເອກະພາບ, ຄົບຊຸດລະຫວ່າງບັນດາທ້ອງຖິ່ນ, ເສີມຂະຫຍາຍບົດບາດຂອງທະນາຄານການຄ້າ ໃນການສະໜອງສິນເຊື່ອໃຫ້ແກ່ໂຄງການລົງທຶນ.
ແລະ ກໍໃນຂອບເຂດການເຄື່ອນໄຫວຂອງ ກອງປະຊຸມສົ່ງເສີມການລົງທຶນເຂດແຄມທະເລພາກກາງຫວຽດນາມ ບັນດາຜູ້ແທນໄດ້ປຶກສາຫາລືມາດຕະການສົ່ງເສີມການລົງທຶນເຂົ້າເຂດດັ່ງກ່າວ. ສອງບັນຫາທີ່ໄດ້ຮັບການສຸມໃສ່ປຶກສາຫາລື ນັ້ນແມ່ນ ຍຸດທະສາດພັດທະນາອຸດສາຫະກຳ ແລະ ທ່ອງທ່ຽວເຂດແຄມທະເລພາກກາງຫວຽດນາມ. ກ່ຽວກັບການພັດທະນາອຸດສາຫະກຳ, ດຣ ບູ່ຍເຕີດທັງ, ຫົວຫນ້າສະຖາບັນຍຸດທະສາດພັດທະນາ, ກະຊວງອຸດສາຫະກຳ ແລະ ການຄ້າ ຖືວ່າ: ເພື່ອພັດທະນາ ແລະ ຮ່ວມສຳພັນຂະແຫນງອຸດສາຫະກຳຢູ່ເຂດແຄມທະເລພາກກາງ ຄວນປະຕິບັດ 3 ໝວດມາດຕະການ, ນັ້ນແມ່ນວາງແຜນກຳນົດລະຫວ່າງເຂດ, ສ້າງພື້ນຖານໂຄງລ່າງດ້ານເຕັກນິກໃຫ້ສຳເລັດ ແລະ ປັບປຸງກົນໄກນະໂຍບາຍ. ທ່ານທັງກ່າວວ່າ:
“ເພື່ອຮ່ວມສຳພັນການພັດທະນາອຸດສາຫະກຳຂອງເຂດ, ບົນພື້ນຖານຕ້ອງ ວາງແຜນກຳນົດລວມຂອງທົ່ວເຂດ. ກົນໄກນະໂຍບາຍກ່ຽວກັບອາກອນທີ່ດິນ ຕ້ອງມີລັກສະນະບຸກທະລຸສູງກວ່າ ແລະ ມາດຕະການກ່ຽວກັບສິ່ງແວດລ້ອມຕ້ອງພັດທະນາແບບຍືນຍົງ.”