(vovworld)- ຕອນບ່າຍວັນທີ 12/3 ຢູ່ນະຄອນຫລວງ ວຽງຈັນ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ພ້ອມກັບທ່ານນາຍົກລັດຖະມົນຕີ ກຳປູເຈຍ ສົມເດັດ ຮູນແຊນ, ຮອງປະທານາທິບໍດີ ມ້ຽນມາ Sai Mauk Kham ແລະ ທ່ານເລຂາທິການໃຫຍ່ ອາຊຽນ ເລເລືອງມີນ ໄດ້ເຂົ້າຮ່ວມກອງປະຊຸມສຸດຍອດການຮ່ວມມື ກຳປູເຈຍ, ລາວ, ມຽນມາ ແລະ ຫວຽດນາມ ຄັ້ງທີ 6 (CLMV 6). ທີ່ກອງປະຊຸມ, ການນຳບັນດາປະເທດໄດ້ໝັ້ນໝາຍເພີ່ມທະວີການພົວພັນມິດຕະພາບທີ່ເປັນມູນເຊື້ອ, ບ້ານໃກ້ເຮືອນຄຽງທີ່ດີ ແລະ ຕ່າງຝ່າຍຕ່າງມີຜົນປະໂຫຍດລະຫວ່າງ 4 ປະເທດ, ຕີລາຄາສະພາບການຜັນຂະຫຍາຍບັນດາໂຄງການ ແລະ ໂຄງການດຳເນີນງານ ນັບແຕ່ເມື່ອກອງປະຊຸມ CLMV ຄັ້ງທີ 5 ຈັດຂຶ້ນຢູ່ ນະຄອນຫລວງ ພະນົມເປັນເມື່ອປີ 2010 ແລະ ປຶກສາຫາລືກ່ຽວກັບການກຳນົດທິດຮ່ວມມືໃນອະນາຄົດ ເພ່ືອຮັດແຄບຊ່ອງຫວ່າງການພັດທະນາລະຫວ່າງ 4 ປະເທດກັບບັນດາປະເທດ ອາຊຽນ ທີ່ຍັງເຫລືອກໍຄືມານະພະຍາຍາມສ້າງປະຊາຄົມ ອາຊຽນ ໃນປີ 2015 ສຳເລັດຜົນ. ກອງປະຊຸມເຫັນດີ ຄວນເພີ່ມທະວີການຮ່ວມມືໃນໄລຍະຈະມາເຖິງ, ສຸມໃສ່ຍູ້ແຮງການຮ່ວມມືກ່ຽວກັບດ້ານການຄ້າ, ການລົງທຶນ ແລະ ການທ່ອງທ່ຽວ, ປະຕິບັດບັນດາສັນຍາຊື່ງໄດ້ຮັບການລົງນາມໃນບັນດາຂອບເຂດສອງຝ່າຍ, ຫລາຍຝ່າຍ ລະຫວ່າງປະເທດຕ່າງໆ, ສືບຕໍ່ນຳໃຊ້ຮູບແບບ “ປະຕູດຽວ - ຈຸດນັດພົບດຽວ” ຢູ່ບັນດາຄູ່ດ່ານຊາຍແດນອື່ນ ແນໃສ່ສ້າງຄວາມສະດວກແກ່ການເຄື່ອນໄຫວດ້ານການຄ້າ, ການລົງທຶນ, ຜັນຂະຫຍາຍວິວັດທະນາການສ້າງປະຊາຄົມໃນອາຊຽນ ແລະ ແຜນການສັງລວມ ອາຊຽນ ກ່ຽວກັບການເຊື່ອມຈອດເພື່ອຍູ້ແຮງວິວັດການເຊື່ອມໂຍງ ອາຊຽນ, ເພີ່ມທະວີການເຊື່ອມຕໍ່ທາງຄົມມະນາຄົມ, ນຳໃຊ້ບັນດາແລວເສດຖະກິດໃນເຂດ ທີ່ດີ, ສ້າງເງື່ອນໄຂສະດວກໃຫ້ແກ່ການຄົມມະນາຄົມຢູ່ບັນດາເສັ້ນທາງເຊື່ອມຕໍ່ລະຫວ່າງ ລາວ, ມຽນມາ ແລະ ຫວຽດນາມ ແລະ ຍູ້ແຮງການຜັນຂະຫຍາຍສັນຍາຫລາຍຝ່າຍ CLMV ກ່ຽວກັບບໍລິການການບິນ.
ການນຳ 5 ປະເທດ CLMV
ພາບ:TTXVN
|
ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ສະເຫນີ ຍູ້ແຮງການຮ່ວມມືລະຫວ່າງ 4 ປະເທດໃນບັນດາຂົງເຂດ: ການຄ້າ, ການລົງທຶນ ແລະ ທ່ອງທ່ຽວ. ທ່ານນາຍົກລັດຖະມົນຕີ ເນັ້ນຫນັກວ່າ: ລັດຖະບານແຕ່ລະປະເທດຄວນມານະພະຍາຍາມປັບປຸງສະພາບແວດລ້ອມແຫ່ງການລົງທຶນ ດຳເນີນທຸລະກິດ ແລະ ປະຕິບັດບັນດາຂໍ້ຕົກລົງ ແລະ ຄຳໝັ້ນສັນຍາກ່ຽວກັບການສ້າງເງື່ອນໄຂໃຫ້ແກ່ການຄ້າ ແລະ ການລົງທຶນຊື່ງໄດ້ຮັບການລົງນາມໃນສັນຍາສອງຝ່າຍ ແລະ ຫລາຍຝ່າຍຢ່າງເຂັ້ມງວດ.
ກ່ອນຫນ້ານັ້ນ, ຕອນບ່າຍວັນດຽວກັນ ທີ່ກອງປະຊຸມສຸດຍອດເຂດສາມຫລ່ຽມພັດທະນາ ລາວ, ຫວຽດນາມ ແລະ ກຳປູເຈຍ ຄັ້ງທີ 7, ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ:
“ເພື່ອໃຫ້ການຮ່ວມມືລະຫວ່າງ 3 ປະເທດ ກຳປູເຈຍ, ລາວ ແລະ ຫວຽດນາມ ບັນລຸປະສິດທິຜົນສູງກວ່າ ແລະ ສົມກັບຄວາມສາມາດບົ່ມຊ້ອນຂອງພາກພື້ນກໍຄືການພົວພັນລະຫວ່າງ 3 ປະເທດ, ລັດຖະບານ 3 ປະເທດ ຄວນມີບາດກ້າວຢ່າງແຂງແຮງ ແລະ ເດັດດ່ຽວກວ່າ. ທີ່ກອງປະຊຸມຄັ້ງນີ້ ພວກເຮົາພ້ອມກັນປຶກສາຫາລື ຍົກຄຳເຫັນຊີ້ນຳ ແລະ ຜັນຂະຫຍາຍບັນດາມາດຕະການຢ່າງມີປະສິດທິຜົນ ເພື່ອຍົກສູງກຳລັງຄວາມສາມາດຜະລິດ, ລັກສະນະແກ້ງແຍ້ງ ແລະ ຄວາມສາມາດດຶງດູດການລົງທຶນ, ຫນູນຊ່ວຍຈາກພາຍນອດຂອງ 13 ແຂວງໃນເຂດສາມຫລ່ຽມພັດທະນາ.”