ກອງປະຊຸມສົນທະນາຍຸດທະສາດລະຫວ່າງ ຫວຽດນາມ - ອັງກິດ
(VOVWORLD) - ກອງປະຊຸມສົນທະນາຍຸດທະສາດລະຫວ່າງ ຫວຽດນາມ - ອັງກິດ ຄັ້ງທີ 7 ໄດ້ດຳເນີນໃນວັນທີ 2 ກໍລະກົດຢູ່ນະຄອນຫຼວງ ລອນດອນ, ປະເທດ ອັງກິດ. ທ່ານ ໂຕແອັງຢຸ້ງ ຮອງລັດຖະມົນຕີກະຊວງການຕ່າງປະເທດ ຫວຽດນາມ ແລະ ທ່ານ Harriett Baldwin ລັດຖະມົນຕີຮັບຜິດຊອບການຕ່າງປະເທດ ອັງກິດ ເປັນປະທານຮ່ວມ.
 ທ່ານ ໂຕແອັງຢຸ້ງ ຮອງລັດຖະມົນຕີກະຊວງການຕ່າງປະເທດ ຫວຽດນາມທີ່ການ ກອງປະຊຸມສົນທະນາຍຸດທະສາດລະຫວ່າງ ຫວຽດນາມ - ອັງກິດ ຄັ້ງທີ 7 (ພາບ: TTXVN) |
ທີ່ກອງປະຊຸມສົນທະນາ, ຫວຽດນາມ ແລະ ອັງກິດ ມີຄວາມປາດຖະໜາຢາກໃຫ້ການພົວພັນດ້ານການຄ້າໄດ້ສືບຕໍ່ຫຼັງຈາກ ອັງກິດ ຖອນຕົວອອກຈາກ EU, ຫຼືເອີ້ນວ່າ Brexit, ລວມມີເລື່ອງຫັນປ່ຽນສັນຍາການຄ້າເສລີ ລະຫວ່າງ ຫວຽດນາມ - EU (EVFTA). ສອງຝ່າຍກໍ່ປຶກສາຫາລືຂໍ້ສະເໜີຂອງລາຊະອານາຈັກ ອັງກິດ ກ່ຽວກັບເລື່ອງຫັນປ່ຽນ ສັນຍາການຮ່ວມມື ແລະ ຄູ່ຮ່ວມມືຮອບດ້ານ ລະຫວ່າງ ຫວຽດນາມ - EU (PCA).
ຫວຽດນາມ ແລະ ອັງກິດໄດ້ໃຫ້ຄຳໝັ້ນສັນຍາຮ່ວມມືກັນຢູ່ບັນດາເວທີປາໄສຫຼາຍຝ່າຍ, ສອງຝ່າຍປາດຖະໜາຢາກຮ່ວມມືກັນຢ່າງແໜ້ນແຟ້ນໃນການຮັກສາສັນຕິພາບ ແລະ ຄວາມໝັ້ນຄົງສາກົນໃນອາຍຸການທີ່ຫວຽດນາມດຳລົງຕຳແໜ່ງເປັນກຳມະການບໍ່ປະຈຳການສະພາຄວາມໝັ້ນຄົງສະຫະປະຊາຊາດ.
ໃນອາຍຸການເປັນປະທານ ອາຊຽນ ໃນປີ 2020 ຂອງ ຫວຽດນາມ, ສອງຝ່າຍຈະສົມທົບກັນຢ່າງແໜ້ນແຟ້ນເພື່ອກະກຽມໃຫ້ແກ່ກອງປະຊຸມການປ່ຽນແປງຂອງດິນຟ້າອາກາດ COP 26 ເພື່ອແນໃສ່ເພີ່ມທະວີບັນດາຄຳໝັ້ນສັນຍາຫຼຸດຜ່ອນການປ່ອຍອາຍພິດເຮືອນແກ້ວ ແລະ ເພີ່ມທະວີການນຳໃຊ້ພະລັງງານຄືນໃໝ່ຢູ່ ຫວຽດນາມ. ສອງຝ່າຍໄດ້ແບ່ງປັນທັດສະນະກ່ຽວກັບບັນດາການຜັນແປ ຢູ່ທະເລຕາເວັນອອກໃນຫວ່າງມໍ່ມານີ້, ສະແດງການສະໜັບສະໜູນໃນການແກ້ໄຂບັນດາການຂັດແຍ່ງຢູ່ທະເລຕາເວັນອອກໂດຍສັນຕິວິທີບົນພື້ນຖານກົດໝາຍສາກົນ